Bu pudi tene sertesa di kuma Jeova amau

1. Pabia ku bu disidi dedika bu vida pa Jeova? (Jubi tambi foto.)

SERA ki bu lembra oca ku bu fasi orason pa dedika bu vida pa Jeova? Bu toma es disison pabia bu aprindi aserka del i bu amal. Bu purmitil di kuma sirbil na sedu kusa mas importanti na bu vida, i bu na kontinua amal ku tudu bu korson, alma, ntindimentu ku forsa. (Mar 12:30) Desdi ki mumentu, bu amor pa rel kirsi i torna kada bias mas forti. Nton, kuma ku bu na ruspundi si algin puntau: “Sera ki bu tene sertesa di kuma bu ama Jeova?” Sin duvida, bu na falal: “N amal mas di ki kualker algin o kualker kusa!”

2-3. Ke ku Jeova misti pa no tene sertesa del, i ke ku no na fala del nes studu? (Jeremias 31:3)

² Kuma ku bu na ruspundiba si un algin puntau: “Sera ki bu tene sertesa di kuma Jeova amau?” Talves bu na tene difikuldadi pa ruspundi, pabia bu pensa di kuma bu ka mersi amor di Jeova. Un irma ku sintiba di kuma i ka amadu ocal pikininu fala sin: “N sibi di kuma N ama Jeova. N ka tene duvida di kila. Ma ke ku N ta duvida sempri i si kontra Jeova aman.” Ma ke ku pudi judau sibi si na bardadi Jeova amau?

³ Jeova misti pa bu tene sertesa di kuma i amau. (Lei Jeremias 31:3.) I misti pa bu aprindi mas aserka del i pa bu sedu si amigu. I ora ku bu dedika bu vida pa rel i batisa, bu risibi un kusa ku tene un balur garandi, ku sedu si amor fiel. Es signifika di kuma amor ki tene pa bo na fika pa sempri. Es ta lebal pa i oja si servus fiel, nkluindu abo, suma si “rikesa spesial”. (Mal 3:17) Jeova misti pa bu tene sertesa di kuma i amau, suma ku apostolu Paulu skirbi aserka di amor ku Jeova tene pa rel. Paulu teneba sertesa di kuma Jeova amal e ku manda i skirbi: “Pabia N fia kuma, nin mortu, nin vida, nin anju, nin otridadi, nin puder di dimoniu, nin e tempu li, nin tempu futuru, nin altura, nin fundura, nin utru kriatura, ka na pudi rapatinu di amor di Deus”. (Rom 8:​38, 39) Nes studu, no na fala di pabia ku no pirsisa di fortalisi no konfiansa di kuma Jeova amanu i ke ku no pudi fasi pa judanu tene es sertesa.

PABIA KU NO PIRSISA DI TENE SERTESA DI KUMA JEOVA AMANU?

4. Kal mintida ku Satanas misti pa no fia nel i kuma ku no pudi nega es mintida?

⁴ Ora ku no tene sertesa di kuma Jeova amanu no pudi luta kontra un di “astusia” di Satanas. (Ef 6:11) Satanas na fasi tudu ki pudi pa mpidinu di adora Jeova. Un di astusia mas garandi di Satanas i di spalia mintida di kuma Jeova ka amanu. Ka bu diskisi nunka di kuma Satanas ka ta disa pa nin un oportunidadi kaplil. I ta ataka manga di bias ora ku no sta fraku, suma ora ku no sta disanimadu ku ke ku kontisi na pasadu, ku purblemas ku no tene gosi o ku ke ku pudi bin kontisi na futuru. (Dit 24:10) Satanas i suma un lion ku sta na buska oportunidadi di ataka un limaria. Pa kila, i ta tenta apruveita ora ku no sta fraku na sintidu emosional, pa fasinu disisti. Ma si no kontinua fortalisi no konfiansa di kuma Jeova amanu, no na pudi sta ben purparadu pa pudi “firma kontra” Satanas ku si astusia. — 1 Ped 5:​8, 9; Tiagu 4:7.

5. Pabia ku no pirsisa di sinti di kuma Jeova amanu i no tene balur garandi pa rel?

⁵ Ora ku no tene sertesa di kuma Jeova amanu, no amisadi ku el na torna mas forti. Jubi pabia ku no pudi fala kila. Jeova kumpunu ku kapasidadi di ama i di sedu amadu. Ora ku un algin mostra amor pa nos, kila ta motivanu amal tambi. Nton, konformi no sinti di kuma Jeova amanu i no tene balur pa rel, no amor pa rel mas na aumenta. (1 Jon 4:19) Nkuantu no amor pa rel na aumenta, si amor pa nos na aumenta tambi. Biblia falanu asin di manera klaru: “Bo ciga pertu di Deus; i ta ciga pa bos.” (Tiagu 4:8) Pa kila, kuma ku no pudi fortalisi no konfiansa di kuma Jeova amanu?

KE KU PUDI JUDANU TENE SERTESA DI KUMA JEOVA AMANU?

6. Pa pudi tene sertesa di kuma Jeova amanu, ke ku no pudi pidi na no orason?

⁶ Kontinua ora pa Jeova judau ntindi pabia ki amau. (Luk 18:1; Rom 12:12) Talves bu pirsisa di ora manga di bias kada dia pa pidi Jeova pa i judau oja bu kabesa suma ku el i ta ojau. Utrora no korson pudi kondenanu tok no ka tene sertesa di kuma Jeova amanu. Ma lembra di kuma Jeova mas garandi di ki no korson. (1 Jon 3:​19, 20) I ta oja bon maneras di sedu ku bu tene, ku te mesmu bu pudi ka nota di kuma bu tene. (1 Sam 16:7; 2 Kron 6:30) Sta avontadi pa “kontal tudu” ke ku bu sta na sinti, i pidil pa i judau tene sertesa di kuma i amau. (Sal 62:8) Dipus aẑi di akordu ku bu orason, i aplika es suẑestons ku na bin faladu del.

7-8. Kuma ku Salmus danu garantia di kuma Jeova amanu?

⁷ Konfia na ke ku Jeova fala. Jeova da si spiritu santu pa omis ku skirbi Biblia. Pa kila, ke ku es omis fala aserka di Jeova i bardadi. Jubi kuma ku salmista Davi splika di manera bonitu kuma ku Jeova ta kuida di nos. I fala sin: “SIÑOR sta pertu di kilis ku tene korson kebrantadu; i ta salba kilis ku tene spiritu kalkadu.” (Sal 34:18) Ora ku bu sta tristi dimas, bu pudi pensa di kuma ningin ka pudi ntindi bu sentimentu o judau. Ma Jeova purmiti di kuma na mumentus asin, i na sta pertu di bo, pabia i sibi di kuma bu na mas pirsisa di si ajuda. Na utru salmu, Davi skirbi asin: “Bu pui ña larmas na bu garafa”. (Sal 56:8) Jeova ta oja ora ku bu sta tristi i ku dur. I ta preokupa ciu ku bo, i ku ke ku bu ta pasa. Suma ku un algin ku sta na viaẑa na disertu ta guarda si yagu ku kuidadu, di mesmu manera Jeova ta guarda no lagrimas i dal balur. Salmu 139:3 fala sin, aserka di Jeova: “Bu kunsi tudu ña manera di yanda.” Jeova ta oja tudu kusas ku bu ta fasi, ma i ta konsentra na bon kusas ku bu ta fasi. (Eb 6:10) Pabia di ke? Pabia i ta da balur garandi pa kada sforsu ku bu ta fasi pa kontental.a

⁸ Jeova ta usa versikulus di Biblia suma esis pa konsolanu, i kontanu di kuma i ta preokupa ku nos i amanu ciu dimas. Ma suma ku no aprindiba, Satanas ta spalia mintida di kuma Jeova ka amau. Pa kila, si utrora bu tene duvida aserka di amor di Jeova pa bo, bu pudi para i bu punta bu kabesa: ‘Kin ku N na fia nel na “pape di mintida” o na “Deus fiel” o di bardadi?’ — Jon 8:44; Sal 31:5.

9. Ke ku Jeova purmiti pa kilis ku amal? (Saida 20:​5, 6)

⁹ Pensa na kuma ku Jeova ta oja kilis ku amal. Jubi ke ku Jeova fala Moisés ku israelitas. (Lei Saida 20:​5, 6.) Jeova purmiti di kuma i na kontinua mostra amor fiel pa kilis ku amal. Suma Jeova i fiel no pudi tene sertesa di kuma nunka i ka na nega ama algin ku amal. (Ne 1:5) Pa kila, si utrora bu misti tene sertesa di kuma Jeova amau, bu pudi para, bu punta bu kabesa: ‘Sera ki N ama Jeova?’ Dipus pensa nes: Si bu amal i bu sta na fasi bu minjor pa kontental, bu pudi tene sertesa di kuma i gosta ciu di bo. (Dan 9:4; 1 Kor 8:3) Na utrus palabras, si bu ka duvida di amor ku bu tene pa Jeova, pabia ku bu na duvida di amor ki tene pa bo? Bu pudi tene sertesa di kuma sempri i na amau i nunka i ka bandonau.

10-11. Kuma ku Jeova misti pa bu oja resgati? (Gálatas 2:20)

¹⁰ Pensa fundu na resgati. Regati di Jesus Kristu i prenda mas garandi ku Jeova da pekaduris. (Jon 3:16) Ma sera ki Jeova manda si fiju pa i muri pa bo? Sin! Jubi isemplu di apostolu Paulu. Lembra di kuma i fasi pekadus gravi antis di torna kriston, i mesmu dipus di torna kriston, i kontinua luta kontra si frakesas. (Rom 7:​24, 25; 1 Tim 1:​12-14) Ma mesmu asin i oja resgati suma un prenda ku bin di Jeova pa rel propi. (Lei Gálatas 2:20.) Lembra di kuma Jeova ku nspira apostolu Paulu pa skirbi es palabras. I tudu ku sta na Biblia i pa nsinanu. (Rom 15:4) Palabras di Paulu mostra di kuma, Jeova misti pa bu oja resgati di Jesus suma un prenda pa bo. Ora ku bu oja resgati des manera, kila na fortalisi bu konfiansa na amor ku Jeova tene pa bo.

¹¹ No na gardisi Jeova pa manera ki manda Jesus pa Tera, pa i bin muri pa nos. Ma utru motivu ku pui Jesus bin pa Tera i pa konta jintis bardadi aserka di Deus. (Jon 18:37) Jesus konta tambi bardadi aserka di amor garandi ku Jeova tene pa si fijus.

JESUS PUDI JUDAU TENE SERTESA DI KUMA JEOVA AMAU

12. Pabia ku no pudi fia na ke ku Jesus fala aserka di Jeova?

¹² Oca Jesus staba na Tera i gostaba di konta jintis kal tipu di algin ku Jeova sedu. (Luk 10:22) No pudi fia na ke ku Jesus fala aserka di Jeova. Pabia? Pabia, i staba na seu ku si Pape pa manga di tempu antis di bin pa Tera. (Kol 1:15) Jesus sibiba kuma si Pape tene amor garandi pa rel. Tambi i oja kuma ku si Pape mostra amor pa si anjus fiel i pa tudu si fijus fiel li na Tera. Kuma ku Jesus judanu tene sertesa di kuma Jeova amanu?

13. Ke ku Jesus misti pa no sibi aserka di Jeova?

¹³ Jesus misti pa no sibi kuma ku Jeova ta ojanu. Na ivanjelius, Jesus coma Jeova di “Pape” mas di 160 bias. Oca Jesus na papia ku si sigiduris, i usa palabras ‘bo pape’ o ‘bo Pape ku sta na seu.’ (Mat 5:16; 6:26) Nota di studu na Mateus 5:16 fala sin: “Servus di Deus di pasadu usa manga di titulus pa fala di Jeova, suma pur isemplu ‘ku ten tudu puder,’ ‘ku sta riba di tudu,’ i ‘kil ku kumpou’. Ma Jesus manga di bias usa palabra ‘Pape’, ki un palabra simplis ku kunsidu, pa mostra di kuma Jeova misti tene un amisadi intimu ku si adoraduris.” Nton, Jesus misti nsinanu di kuma Jeova amanu, suma ku un bon pape ta ama si kiridus fiju. Gosi no jubi dus isemplu, di kuma ku Jesus usa palabra “Pape” pa fala di Jeova.

14. Kuma ku Jesus mostra di kuma, kada un di nos tene balur pa no Pape ku sta na seu? (Mateus 10:​29-31) (Jubi tambi diseñu.)

¹⁴ Purmeru, no jubi ke ku Jesus fala na Mateus 10:​29-31. (Lei.) Jamba i un kacu pikininu ku nunka ka na ama Jeova o adoral. Ma no Pape ku sta na seu da balur pa kada un des jamba, te na puntu di sibi ora ku un son delis kai. Si Jeova da balur pa un kacu pikininu, no pudi tene sertesa di kuma i ta preokupa ciu ku kada un di nos, pabia no amal i no ta adoral! Aserka di palabras ‘te kabelu di bo kabesa i kontadu tudu’, nota di studu na versikulu 30 fala sin: “Kuñisimentu ku Jeova tene di kusas pikininu na nos, ta danu sertesa di kuma i ta mporta ku kada sigidur di Kristu.” Es ta mostra di manera klaru di kuma, Jesus misti pa no tene sertesa di kuma kada un di nos tene balur pa no Pape ku sta na seu.

15. Ke ku palabras di Jesus ku sta na Jon 6:44 ta nsinau aserka di bu Pape ku sta na seu?

¹⁵ Jubi un sugundu isemplu nunde ku Jesus usa palabra “Pape”. (Lei Jon 6:44.) Bu Pape ku sta na seu propi ku tisiu pa bardadi. Pabia ki fasi es? Pabia i oja di kuma bu tene un bon korson. (At 13:48) Nota di studu ku sta Jon 6:44 fala di kuma i pudi sedu ki Jesus sta na rifiri palabras di Jeremias ku sta na testu nunde ki basia es studu. Es testu fala sin: “Ku bondadi ku amor N jundau pa mi.” (Jer 31:3; komparal ku Oseias 11:4.) Pensa na ke ku es signifika. No Pape ku sta na seu kontinua oja bon kusas na bo, ku talves abo propi bu ka oja.

16. (a) Ke ku Jesus nsinanu, i pabia ku no dibi di fia nel? (b) Kuma ku bu pudi fortalisi bu konfiansa di kuma Jeova i Pape ku bu pirsisa del? (Jubi kuadru “Pape ku anos tudu no pirsisa del.”)

¹⁶ Manera ku Jesus coma Jeova di no Pape i suma si falanu: “Jeova i ka so ña Pape; ma i bo Pape tambi. N na garanti bos di kuma i ama bos, tambi i ta preokupa ku kada un di bos.” Pa kila, si utrora bu ka tene sertesa di kuma Jeova amau, bu pudi para, bu punta bu kabesa: ‘Sera ki N dibi di fia na palabras di Fiju ku mas kunsi Pape i ku sempri ta konta bardadi?’ — 1 Ped 2:22.

KONTINUA FORTALISI BU KONFIANSA DI KUMA JEOVA AMAU

17. Pabia ku no dibi di kontinua fortalisi no konfiansa di kuma Jeova amanu?

¹⁷ No dibi di kontinua fortalisi no konfiansa di kuma Jeova amanu. Suma ku no aprindiba, no inimigu Satanas na fasi tudu ki pudi pa punu para sirbi Jeova. Pa pudi nfrakisi no disison, Satanas na kontinua tenta fasinu fia di kuma Jeova ka amanu. Ka no fia na si mintida! — Jo 27:5.

18. Kuma ku bu pudi fortalisi bu konfiansa di kuma Jeova amau?

¹⁸ Nes studu bu aprindi ke ku bu pudi fasi pa tene sertesa di kuma Jeova amau. Bu pudi fasi orason pa i judau oja bon maneras di sedu ki oja na bo. Pensa fundu na versikulus di Biblia ku splika kuma ku Jeova ta preokupa ku kilis ku amal. Lembra di kuma, Jeova na ama sempri kil ku amal. Ka bu diskisi nunka di kuma Jeova da resgati suma un prenda pa bo. Tene sertesa di kuma Jeova i bu Pape ku sta na seu suma ku Jesus fala. I si algin puntau: “Bu tene sertesa di kuma Jeova amau?” Bu na ruspundi ku konfiansa: “Sin, i aman! I kada dia N na fasi ña minjor pa mostra ña amor pa rel!”