Ke ku resgati ta nsinanu?

1. Pabia ki bon pa no ba ta mati Komemorason di mortu di Kristu kada anu?

ANOS tudu no na konkorda di kuma resgati i un prenda garandi dimas! (2 Kor 9:15) Bu pudi sedu amigu di Jeova Deus pabia Jesus muri pa nos. Bu pudi tambi tene speransa di tene vida ku ka ta kaba. No tene manga di motivus di gardisi Jeova pa manera ki danu resgati, pabia di amor garandi ki tene pa nos! (Rom 5:8) Pa judanu kontinua gardisi Jeova ku Jesus, i nunka diskisi di ke ke fasi pa nos, Jesus mandanu pa no ba ta mati Komemorason di si mortu kada anu. — Luk 22:​19, 20.

2. Ke ku no na fala del nes studu?

² Es anu, Komemorason di mortu di Kristu na fasidu dia sabadu, 12 di Abril di 2025. Sin duvida, anos tudu no na fasi planu pa mati. I na sedu bon pa kada un di nos toma tempu na semanas antis i dipus di Komemorason di mortu di Kristu, pa pensa fundu na ke ku Jeova ku si Fiju fasi pa nos. Nes studu, no na fala di ke ku resgati ta nsinanu aserka di Jeova ku si Fiju. Studu ku na bin na judanu ntindi kuma ku no pudi benefisia di resgati, i kuma ku no pudi mostra no gardisimentu pa rel.

KE KU RESGATI TA NSINANU ASERKA DI JEOVA

3. Kuma ku mortu di un omi pudi liberta milyons di jintis? (Jubi tambi diseñus.)

³ Resgati ta nsinanu aserka di justisa di Jeova. (Lei 32:4) Di kal manera? Pensa nes: Oca Adon peka, i kambantanu pekadu ku mortu. (Rom 5:12) Pa libertanu di pekadu ku mortu, Jeova manda Jesus pa da resgati. Ma kuma ku mortu di un omi perfeitu pudi liberta milyons di jintis? Apostolu Paulu fala sin: “Suma ku disobdiensia di un omi [Adon] leba manga di jinti pa e torna kulpadu, asin tambi obdiensia di un omi [Jesus] ta leba manga delis pa e torna justu.” (Rom 5:19; 1 Tim 2:6) Na utrus palabras, Paulu staba na fala di kuma tudu pekaduris tene pekadu i e dibi di muri, pabia un omi perfeitu disobdisi Deus. Asin, pa no pudi libertadu di pekadu ku mortu, un omi perfeitu dibi di obdisi Deus.

4. Pabia ku Jeova ka disa pa fijus di Adon ku obdisil vivi pa sempri?

⁴ Sera ki na bardadi i pirsis pa Jesus muri pa pudi salbanu? Sera ki Jeova ka pudiba disa pa fijus di Adon ku obdisil vivi pa sempri? No pudi pensa di kuma es i un bon manera di risolvi purblema. Ma es manera di pensa ka ta mostra justisa perfeitu di Jeova. Suma Jeova i justu, nunka i ka na aẑi suma si Adon ka ciga di fasi es pekadu gravi.

5. Pabia ku no pudi tene sertesa di kuma Jeova na fasi sempri ke ki justu?

⁵ Ma ke ku na kontisi si Jeova ka da resgati, i ka rispita si normas di justisa, i disa pa fijus di Adon ku tene pekadu vivi pa sempri? Jintis pudi duvida si kontra i na rispita si normas di justisa na futuru. Pur isemplu, sera ki i na bin kumpri alguns purmesas ki fasi? No ka pirsisa di preokupa di kuma kila na kontisi. Pabia? Pabia Jeova fasi ke ki justu, mesmu si kila signifika sakrifika si uniku Fiju. Pa kila, no pudi tene sertesa di kuma i na fasi sempri ke ki justu.

6. Kuma ku resgati ta mostra amor di Jeova? (1 Jon 4:​9, 10)

⁶ I bardadi di kuma, resgati ta judanu ntindi di kuma Jeova i justu, ma i ta judanu inda mas, ntindi amor garandi ku Jeova mostra pa nos. (Jon 3:16; lei 1 Jon 4:​9, 10.) Jeova manda si Fiju pa i muri pa nos, i ka so pabia i misti pa no vivi pa sempri, ma tambi i misti pa no fasi parti di si familia. Pensa so nes: Oca Adon peka, i ka pudi ja mas fasi parti di familia di Jeova. Pa kila, anos tambi no ka fasi parti di familia di Jeova oca no padidu. Ma suma resgati pagadu, tudu pekaduris ku mostra fe i ku ta obdisi Deus pudi un dia fasi parti di si familia. Mesmu gosi, no pudi tene amisadi intimu ku Jeova i ku no ermons ku irmas. Na bardadi, Jeova amanu ciu! — Rom 5:​10, 11.

7. Kuma ku sufrimentu di Jesus ta judanu ntindi di kuma Jeova amanu ciu?

⁷ No pudi ntindi diritu di kuma Jeova amanu ciu, ora ku no pensa na dur garandi ki tene oca ki oja si Fiju na sufri. Satanas fala di kuma, nin un servu di Deus ka na kontinua fiel pa rel, ora ki sedu difisil dimas fasil. Pa mostra di kuma Satanas i munturus, Jeova disa pa si Fiju sufri antis di muri. (Jo 2:​1-5; 1 Ped 2:21) Jeova oja jintis na goza Jesus, soldadus na sutal i dipus e pregal na staka. Jeova oja si Fiju ki ama sufri ciu antis di muri. (Mat 27:​28-31, 39) Jeova pudiba pui pa ki kusas ka kontisi. Pur isemplu oca jintis fala: ‘Pa Deus libral, si i ten amor pa el’, Jeova pudiba fasil. (Mat 27:​42, 43) Ma si Deus fasil, resgati ka na cigaba di pagadu, i no ka na teneba speransa. Pa kila, Jeova disa pa si Fiju nguenta sufrimentu te oca i muri.

8. Pabia ku no pudi tene sertesa di kuma, Jeova sinti dur oca i oja si Fiju na sufri? (Jubi tambi diseñu.)

⁸ No ka dibi di pensa di kuma suma Jeova tene tudu puder, i ka tene sentimentu! I kumpu pekaduris ku kapasidadi di tene sentimentu. Tambi suma ku Biblia fala, i kumpunu suma el. Kila signifika di kuma, el tambi i tene sentimentu. Biblia fala di kuma, i ta fika “tristi” i ku dur. (Sal 78:​40, 41) Jubi tambi isemplu di Abraon ku Isaki. Jeova fala Abraon pa i sakrifika si uniku fiju. (Kum 22:​9-12; Eb 11:​17-19) Pensa na tristesa ku preokupason ku Abraon dibi di tene, oca ki staba pruntu pa mata si propi fiju. Imaẑina tristesa garandi ku Jeova dibi di sinti, oca i oja jintis na kastiga si Fiju i matal! — Jubi video Exemplos de Fé – Abraão (Parte 2), na jw.org.

9. Ke ku bu pudi aprindi di Romanus 8:​32, 38, 39 aserka di amor di Jeova?

⁹ Resgati ta nsinanu di kuma, i ka ten algin ku amanu mas di ki Jeova. Mesmu un membru di no familia ku gosta ciu di nos, o no minjor amigu ka mas amanu di ki Jeova. (Lei Romanus 8:​32, 38, 39.) No pudi tene tudu sertesa di kuma, Jeova amanu mas di kuma ku no ama no kabesa. Sera ki bu misti vivi pa sempri? Jeova mas misti pa bu vivi pa sempri. Sera ki bu misti pa bu pekadus purdadu? Jeova mas misti pa bu pekadus purdadu. Tudu ke ku Jeova misti pa no fasi, i pa no gardisil pa ke ki fasi pa nos, mostra fe i obdisil. Na bardadi, resgati ta mostra di kuma Jeova amanu ciu. Na nobu mundu, no na bin aprindi inda mas aserka di amor di Jeova. — Ekl 3:11.

KE KU RESGATI TA NSINANU ASERKA DI JESUS

10. (a) Pabia ku Jesus staba tristi dimas ku si mortu? (b) Di kal manera ku fidelidadi di Jesus mostra di kuma Satanas i munturus? (Jubi tambi kuadru “Fidelidadi di Jesus mostra di kuma Satanas i munturus.”)

¹⁰ Jesus preokupa ciu ku nomi di si Pape. (Jon 14:31) Jesus staba tristi dimas pa ke ku jintis na pensa aserka di si Pape, pabia i na matadu suma kriminosu, tambi suma algin ku ka rispita Deus. E ku manda i ora asin: “Ña Pape, si i pudi sedu, lunjusi di mi e kopu di sufrimentu.” (Mat 26:39) Ma, suma Jesus kontinua sedu fiel pa Jeova te na mortu, i mostra di kuma ke ku Satanas fala kontra si Pape, i mintida.

11. Kuma ku Jesus mostra di kuma i ama jintis ciu? (Jon 13:1)

¹¹ Resgati ta nsinanu tambi di kuma, Jesus ta preokupa ciu ku jintis, prinsipalmenti si disipulus. (Dit 8:31; lei Jon 13:1.) Pur isemplu, Jesus sibiba di kuma, i ten kusas ki dibi di fasi na Tera ku na sedu difisil dimas, suma sufri antis di muri. Ma, Jesus ka fasi tudu es kusas difisil so pabia Jeova falal pa i fasi elis, ma i pabia i ama jintis. Jesus pui tudu si korson na prega, nsina i juda utrus. Mesmu na noti antis di muri, Jesus toma tempu pa laba pes di si apostolus. I nsina elis i nkoraẑa elis. (Jon 13:​12-15) Mesmu oca ki staba ku dur na staka, Jesus da speransa pa un kriminosu ku staba kuas pa muri. Tambi i mostra preokupason pa si mame, i pidi Jon pa i kuida del. (Luk 23:​42, 43; Jon 19:​26, 27) Jesus mostra amor garandi ki tene pa jintis, i ka so pa manera ki muri pa relis, ma tambi pa manera ki ta trata elis ku amor i ku bondadi.

12. Kuma ku Jesus sta na judanu aos?

¹² I bardadi di kuma Kristu muri “um biás pa sempre,” ma i kontinua fasi manga di kusas pa nos. (Rom 6:​10, NOBO TESTAMENTO NA CRIOL) Ke ki i sta na fasi pa nos? I kontinua tarbaja pa danu manga di bon kusas ku no tene gosi pabia di resgati. Jubi ke ku Jesus sta na fasi gosi. I sta na sirbi suma no Rei, Ŝef di Saserdotis ku kabesa di kongregason. (1 Kor 15:25; Ef 5:23; Eb 2:17) I sta na kuida di tarbaju di junta unjidus ku garandi multidon. Es tarbaju na kabadu antis di fin di garandi tribulason.a (Mat 25:32; Mar 13:27) Jesus ta usa servu jiru di fiansa pa kontinua danu ke ku no pirsisa del, pa sirbi Jeova di manera fiel nes tempu di fin. (Mat 24:45) Tambi na si Renansa di Mil Anu, i na kontinua fasi kusas pa nos. Jesus da tudu si vida pa nos. Na bardadi, el i un prenda di balur ku bin di Jeova!

KONTINUA APRINDI NOBU KUSAS

13. Kuma ku pensa fundu na judanu kontinua aprindi aserka di amor ku Deus ku Kristu tene pa nos?

¹³ Bu pudi kontinua pensa fundu na amor ku Jeova Deus ku Kristu Jesus tene pa nos, si bu kontinua pensa fundu na ke ke fasi pa bo. Na semanas antis i dipus di Memorial des anu, bu pudi lei ku kuidadu un o mas Ivanjelius. Ka bu tenta lei manga di kapitulus un bias. Ma, toma tempu ora ku bu na lei i jubi utrus motivus ku pui no dibi di ama Jeova ku Jesus. Tambi, konta utrus ke ku bu diskubri na bu leitura.

14. Kuma ku piskisa pudi judanu kontinua aprindi aserka di resgati ku utrus nsinus? (Salmu 119:97) (Jubi tambi foto.)

¹⁴ Si bu kunsi bardadi pa manga di anus, talves bu pudi punta si i ten nobu kusas ku bu pudi aprindi aserka di justisa di Deus, si amor ku resgati. Na bardadi, no na tene sempri nobu kusas pa aprindi aserka des asuntus ku utrus asuntus. Pa kila, ke ku bu pudi fasi? Lei i studa bon informasons ku sta na no publikasons. Ora ku bu lei un kusa na Biblia ku bu ka ntindi diritu, fasi piskisa. Dipus na ki dia, pensa fundu na ke ku bu aprindi aserka di Jeova, si Fiju ku amor ke mostra pa bo. — Lei Salmu 119:97.

15. Pabia ki importanti pa no kontinua buska nobu kusas ku sta na Biblia?

¹⁵ Ka bu disanima si bu ka oja un kusa nobu o interesanti dimas, kada bias ku bu na lei Biblia o fasi piskisa. Imaẑina di kuma, bu sedu algin ku sta na tenta buska uru. Manga di bias, un algin ku ta buska uru pirsisa di pasa manga di oras o dias, antis di oja un padas di uru. Ma, i ta kontinua buska, pabia kada padas di uru ki oja tene balur garandi pa rel. Kada nobu kusa ku no aprindi di Biblia, tene mas balur di ki uru! (Sal 119:127; Dit 8:10) Pa kila, sedu pasenseru, kontinua lei Biblia i kontinua aprindi nobu kusas. — Sal 1:2.

16. Kuma ku no pudi kopia Jeova ku Jesus?

¹⁶ Ora ku bu na studa, pensa na kuma ku bu pudi aplika ke ku bu aprindi. Pur isemplu, kopia justisa di Jeova ora ku bu na trata utrus sin fasi skuju. Kopia amor ku Jesus tene pa si Pape i pa utrus, ora ku bu sta dispostu pa fasi ke ku Jeova misti. Sta tambi dispostu pa juda bu ermons ku irmas, mesmu si utrora i ta sedu difisil dimas fasil. Tambi, kopia Jesus ora ku bu na prega utrus, asin e na tene oportunidadi di kunsi kusas bonitu ku Jeova fasi pa pekaduris i pa e mostra fe na resgati.

17. Ke ku no na fala del na studu ku na bin?

¹⁷ Ora ku no kontinua aprindi aserka di resgati, no amor pa Jeova ku Jesus ta torna mas forti. Suma no ama elis, e na mas amanu tambi. (Jon 14:21; Tiagu 4:8) Pa kila, no usa Biblia ku publikasons di no organizason pa kontinua aprindi aserka di resgati. Na studu ku na bin, no na oja bon kusas ku no tene, pabia di resgati. Tambi no na oja kuma ku no pudi gardisi Jeova pa amor ki mostra pa nos.