Kuma ku no pudi benefisia di amor di Jeova

1. Ke ku no pudi fasi pa kontenta Jeova?

IMAẐINA kuma bu pati un algin ku bu gosta del un prenda spesial, ki na pirsisa del. Bu na fika mal si ki algin toma ki prenda i bai rakadal na mala i ka lembra mas del! Ma bu na kontenti si ta usa sempri ki prenda, tambi si gardisiu pa rel. Ke ku es isemplu ta nsinanu? Jeova da si Fiju pa nos. I na fika kontenti si no gardisil pa es prenda di balur, i pa amor ku lebal na da resgati! — Jon 3:16; Rom 5:​7, 8.

2. Ke ku no na bin fala del nes studu?

² Konformi anus na pasa, no pudi para oja resgati suma un prenda spesial. I pudi sedu suma rakada prenda di Deus na mala. No kontenti tenel, ma i ta sta suma no pul na un kau nunde ku no ka na pudi ojal o pensa nel. Pa ka es kontisi ku nos, no dibi di pensa sempri na ke ku Deus ku Kristu fasi pa nos. Es studu na judanu fasi kila. No na oja tambi kuma ku resgati ta benefisianu gosi, i kuma ki na bin benefisianu na futuru. Tambi no na bin oja kuma ku no pudi mostra no gardisimentu pa amor ku Jeova mostra pa nos, prinsipalmenti na semanas antis i dipus di Memorial.

KUMA KU RESGATI TA BENEFISIANU GOSI

3. Kal ki un di maneras ku resgati ta benefisianu desdi gosi?

³ No sta ja na benefisia di sakrifisiu di resgati di Jesus Kristu. Pur isemplu, i pabia di resgati ku Jeova ta purdanu no pekadu. I ka obrigadu purdanu. Ma i ta purdanu pabia i misti. Un skirbidur di Salmu mostra si gardisimentu pa purdon di Jeova, i fala sin: “SIÑOR, abo i bon, bu sta pruntu pa purda.” — Sal 86:5; 103:​3, 10-13.

4. Pa kal jintis ku Jeova da resgati? (Lukas 5:32; 1 Timótiu 1:15)

⁴ Alguns jintis pudi pensa di kuma e ka mersi purdon di Jeova. Ma na bardadi, nin un di nos ka mersi purdon di Jeova. Apostolu Paulu ntindiba di kuma i ka mersi comadu apostolu. Mesmu asin i fala: “Ma fabur di Deus fasin kil ku N sedu.” (1 Kor 15:​9, 10) Ora ku no ripindi di no pekadu, Jeova ta purdanu. Pabia? I ka pabia no mersi, ma i pabia i amanu. Si bu sta na luta ku sentimentu di kuma bu ka mersi purdon di Jeova, lembra di kuma Jeova da resgati i ka pa jintis ku ka ta peka, ma pa kilis ku peka i ku ripindi. — Lei Lukas 5:32; 1 Timótiu 1:15.

5. Sera ki un di nos pudi fala di kuma i ten diritu di risibi purdon di Jeova? Bu pudi splika.

⁵ Nin un di nos ka dibi di pensa di kuma i tene diritu di risibi purdon di Jeova, mesmu si sirbi Jeova pa manga di anus. I bardadi di kuma, Jeova ka ta diskisi di kusas ku no fasi pa rel. (Eb 6:10) I danu resgati di si Fiju suma un prenda, i ka suma un pagamentu pa bon kusas ku no fasi pa rel. Si no fala di kuma no mersi purdon di Jeova o un tratamentu spesial, i na sta suma si no fala mortu di Kristu ka sedu nada. — Komparal ku Gálatas 2:21.

6. Pabia ku Paulu tarbaja duru pa Jeova?

⁶ Paulu sibiba kuma i ka mporta kantu kusas ki fasi pa Jeova i ka mersi si fabur. Pabia gora ki tarbaja duru pa Jeova? I fasi kila, pa pudi mostra si gardisimentu pa fabur di Jeova ki ka mersi. (Ef 3:7) Suma Paulu, no ta kontinua pega tesu na sirbi Jeova, i ka pabia no mersi si fabur, ma i pa mostra no gardisimentu.

7. Kal ki utru manera ku no pudi benefisia di resgati desdi gosi? (Romanus 5:1; Tiagu 2:23)

⁷ Utru manera ku no pudi benefisia di resgati desdi gosi i di kuma, no pudi tene un amisadi intimu ku Jeova.a Suma ku no oja na studu ku pasa, oca ku no padidu no ka seduba amigu di Jeova. Ma pabia di resgati no pudi “ten pas ku Deus” i asin pertusi del. — Lei Romanus 5:1; Tiagu 2:23.

8. Pabia ku no dibi di gardisi Jeova pa prenda di orason?

⁸ Papia ku Jeova na orason i un kusa spesial ku no pudi fasi, pabia di amisadi ku no tene ku el. Jeova ka ta obi so orasons ku no ta fasi na no runions, ma i ta obi tambi orason di kada un di nos ora ku no sta anos son. Orason pudi kalma no korson i judanu tene sintidu susegadu. Ma es i ka uniku benefisiu ku orason tene. I pudi torna no amisadi ku Deus mas forti. (Sal 65:2; Tiagu 4:8; 1 Jon 5:14) Oca Jesus staba na Tera i ta ora sempri, pabia i sibiba di kuma Jeova na obil, i di kuma orason na manti amisadi ki tene ku si Pape forti. (Luk 5:16) No kontenti dimas, pabia atraves di sakrifisiu di Jesus, no pudi sedu amigu di Jeova i te mesmu papia ku el na orason!

KUMA KU RESGATI NA BIN BENEFISIANU NA FUTURU

9. Kuma ku resgati na bin benefisia servus fiel di Jeova na futuru?

⁹ Kuma ku resgati na bin benefisia servus fiel di Jeova na futuru? E na bin tene vida ku ka ta kaba. Manga di jintis pensa di kuma i ka pusivel tene vida ku ka ta kaba, pabia desdi sempri jintis ta muri. Ma desdi kumsada, intenson di Jeova i pa pekaduris vivi pa sempri. Si Adon ka fasiba pekadu, ningin ka na pensaba di kuma i ka pusivel tene vida ku ka ta kaba. Aos, i pudi sedu difisil imaẑina tene un vida ku ka ta kaba. Ma no pudi fia di kuma no na tenel, pabia no sibi di kuma Jeova paga un pres karu pa no pudi tenel, ku sedu, vida di si propi Fiju. — Rom 8:32.

10. Ke ku unjidus ku utrus karnel na spera tene?

¹⁰ Vida ku ka ta kaba i un kusa ku no na bin tene na futuru, mesmu asin, Jeova misti pa no pensa nel desdi gosi. Unjidus na spera vivi na seu i rena riba di Tera juntu ku Kristu. (Apok 20:6) Utrus karnel na spera vivi na un paraísu na Tera livri di dur ku sufrimentu. (Apok 21:​3, 4) Sera ki bu fasi parti di utrus karnel ku tene speransa di tene vida ku ka ta kaba li na Tera? Vida ku ka ta kaba na Tera i ka un prenda ku tene menus balur di ki vida ku ka ta kaba na seu! Na bardadi, pekaduris kumpuduba pa tenel. Vida na Tera na pui pa no kontenti dimas.

11-12. Kal ki alguns bensons di Paraísu ku no pudi pensa nel desdi gosi? (Jubi tambi diseñus.)

¹¹ Imaẑina kuma ku vida na sedu na Paraísu na Tera. Bu ka na preokupa ku duensa o ku mortu. (Isa 25:8; 33:24) Jeova na bin dau tudu bon kusas ku bu misti. Ke ku bu na gosta di aprindi? Fisika? Kimika? Musika? Diseñu? Sin duvida, i na pirsisadu di arkitetus, pedrerus ku labraduris. Jintis na pirsisa tambi di labra, purpara kumida, kumpu feramentas, fasi jardins i kuida delis. (Isa 35:1; 65:21) Vivi pa sempri na pirmitiu fasi kualker un des kusas ku utrus ku bu misti bin fasi.

¹² I na sedu un kontentamentu garandi risibi jintis ku na lantandadu di mortu! (At 24:15) Imaẑina tambi alegria ku bu na tene di aprindi mas aserka di Jeova, ora ku bu jubi diritu manga di kusas ki kumpu. (Sal 104:24; Isa 11:9) Mas importanti di tudu, bu ka na fasi nin pekadu, pa kila bu ka na pirsisa di pidi Jeova purdon! Sera ki bu na torkia tudu es bensons ku bu na bin tene ku “puku tempu di sabura di pekadu”? (Eb 11:25) Klaru ki nau! Pa tene es bensons i bali pena fasi kualker sakrifisiu desdi gosi. Lembra kuma paraísu na Tera ka na kontinua sedu so un speransa. I na bin sedu un realidadi. Nin un des kusas ka na seduba, si kontra Jeova ka amanuba tok i da si uniku Fiju!

MOSTRA BU GARDISIMENTU PA AMOR DI JEOVA

13. Kuma ku no pudi mostra no gardisimentu pa Jeova? (2 Koríntius 6:1)

¹³ Kuma ku no pudi mostra no gardisimentu pa manera ku Jeova danu resgati? I ora ku no fasi pa sirvisu di Jeova sedu kusa mas importanti na no vida. (Mat 6:33) Na bardadi, Jesus muri “pa tudu kilis ku na vivi, pa e ka vivi mas pa se kabesa, ma pa kil ku muri pa elis, i torna vivi.” (2 Kor 5:15) Jeova mostra fabur garandi pa nos, tambi i purdanu. Si no fasi tudu ku no pudi pa sirbil, kila na mostra kuma no ntindi kusas garandi ki fasi pa nos, tambi kila na mostra no gardisimentu. — Lei 2 Koríntius 6:1.

14. Kuma ku no pudi mostra fe na orientason di Jeova?

¹⁴ No pudi tambi mostra no gardisimentu pa amor di Jeova, ora ku no mostra fe na orientason ki ta da. Kuma ku no pudi fasil? Ora ku no tene un disison pa toma, suma, te kal nivel ku no na studa o kal tipu di tarbaju ku no dibi di seta, no dibi di pensa na ke ku Jeova misti pa no fasi. (1 Kor 10:31; 2 Kor 5:7) Ora ku no toma disison basiadu na fe ku no tene na Jeova, kila na torna no fe ku amisadi ku no tene ku el mas forti. Tambi no speransa di tene vida ku ka ta kaba na sedu mas forti. — Rom 5:​3-5; Tiagu 2:​21, 22.

15. Kuma ku no pudi mostra no gardisimentu na semanas antis i dipus di Memorial?

¹⁵ I ten tambi utru manera ku no pudi mostra no gardisimentu pa amor di Jeova. I ora ku no na fasi tudu ku no pudi na semanas antis i dipus di Memorial, pa mostra Jeova no gardisimentu pa resgati. Alen di fasi planu pa mati Memorial, no pudi tambi kumbida utrus jintis pa bin mati. (1 Tim 2:4) Konta kilis ku bu na kumbida, nunde ku Memorial na fasidu. I na sedu bon mostra elis video Ke ku Manda Jesus Muri? ku video Lembra di mortu di Jesus ku sta na jw.org. Ansions dibi di sertifika di kuma e kumbida kilis ku sedu inativu. Imaẑina alegria ku na ten na seu ku Tera, si alguns karnel di Jeova ku pirdi judadu riba pa si koral! (Luk 15:​4-7) Na Memorial, no pudi tene objetivu i ka so fala n̈utru manteña, ma tambi fala manteña pa nobus i pa kilis ku tarda pa matil. No misti pa e sta avontadi! — Rom 12:13.

16. Pabia ku no dibi di pensa na aumenta no atividadi di pregason na tempu di Memorial?

¹⁶ Sera ki bu pudi aumenta bu atividadis spiritual na semanas antis i dipus di Memorial? Es i un bon manera di mostra no gardisimentu pa tudu ke ku Deus ku Kristu fasi pa nos. Si no pasa mas tempu na pregason, no na mas oja kuma ku Jeova na judanu, i kila na aumenta no konfiansa nel. (1 Kor 3:9) Tambi sertifika di sigi programa di leitura di Biblia pa tempu di Memorial ku sta na Examine as Escrituras Diariamente o tabela ku sta na manual pa runion. Bu pudi te mesmu kuji alguns versikulu di Biblia pa studa.

17. Ke ku Jeova ta kontenti ku el? (Jubi tambi kuadru “Maneras di mostra gardisimentu pa amor di Jeova.”)

¹⁷ Bu situason pudi ka pirmitiu fasi tudu ku faladu nes studu. Lembra kuma Jeova ka ta jubi kuantidadi di kusas ku bu fasi ku ke ku utrus fasi, ma i ta jubi ke ku sta na bu korson. I ta kontenti ora ki oja di kuma bu mostra gardisimentu pa prenda spesial ki dau, ku sedu resgati. — 1 Sam 16:7; Mar 12:​41-44.

18. Pabia ku no dibi di mostra gardisimentu pa Jeova Deus ku Jesus Kristu?

¹⁸ I pabia di resgati ku pui no pekadu pudi purdadu, no pudi tene amisadi ku Jeova i bin tene vida ku ka ta kaba. Pa anos tudu no kontinua mostra gardisimentu pa amor di Jeova. Es amor ku na pui pa no tene tudu es bensons. (1 Jon 4:19) Pa anos tudu no mostra tambi gardisimentu pa Jesus, ku amanu te na puntu di da si vida pa nos! — Jon 15:13.