Kuma ki profesia di Daniel falaba ja di tempu ku Mesias na ciga

PROFETA Daniel viviba mas di 500 anu antis di Jesus padidu. Ma mesmu asin, Jeova daba Daniel nformason ku na judal sibi kal tempu ku Jesus na unjidu o kujidu suma Mesias o Kristu. Daniel fala: “Obi, bu ntindi. Disna ku ordi sai pa torna kumpu Jerusalen te na tempu ku ki algin ciga ku Deus kuji pa i sedu rei, i na ten korenta i novi anu.” — Daniel 9:25.

Pa sibi kal tempu ku Mesias na ciga, purmeru, no pirsisa di sibi kal tempu ku profesia di Daniel aserka di tempu ku Mesias na ciga kumsa kumpri. Sugundu profesia, i “disna ku ordi sai pa torna kumpu Jerusalen.” Kal tempu kes “ordi sai”? Sugundu skirbidur di Biblia comadu Neemias, ordi sai pa kumpu muras di Jerusalen “na anu 20 di rei Artaŝersis.” (Neemias 2:1, 5-8) Storiaduris konfirma kuma Artaŝersis kumsa guverna na anu 475 A.E.K. Asin, i kompleta 20 anu di si guvernu na 455 A.E.K. Gosi no sibi ja kal tempu ku profesia di Daniel aserka di Mesias kumsa kumpri, ku sedu na anu 455 A.E.K.

Gosi ke ki falta i pa fasi konta. Si no konta 483 anu apartir di 455 A.E.K., no na ciga na anu 29 E.K. I na ki propi anu ki Jesus batizadu i torna Mesias!a (Lukas 3:1, 2, 21, 22) Manera kes profesia di Biblia kumpri suma ki faladu ta fortalisi fe.