LISON 37
Ke ku Biblia fala aserka di tarbaju ku diñeru
Sera ki bu ciga ja di tene kudadi garandi aserka di tarbaju o diñeru? I pudi sedu disafiu kuida di no nesesidadi i tambi sirbi Jeova di tudu korson. Biblia da bon konsijus ku pudi judanu.
1. Ke ku Biblia fala aserka di tarbaju?
Deus misti pa no kontenti ku no tarbaju. Biblia fala sin: “Minjor kusa ku omi pudi fasi . . . i goza kusa ki ngaña ku si tarbaju.” (Eklesiastis 2:24) Jeova ta tarbaja risu. Ora ku no na kopial na tarbaja risu, no ta kontental i no ta sinti ben.
Tarbaju i importanti. Ma no ka dibi di pirmiti pa i sedu mas importanti di ki no adorason pa Jeova. (Jon 6:27) I purmiti di kuma si no pul na purmeru lugar, i na danu ke ku no pirsisa del pa vivi.
2. Kuma ku no pudi nkara diñeru di un bon manera?
Biblia rikuñisi di kuma “diñeru i suguransa”, ma i avisanu kuma diñeru so ka pudi pui pa no sedu filis. (Eklesiastis 7:12) Pa kila, no nkoraẑadu pa ka ama diñeru, ma pa no ‘fika kontenti ku kil ku no tene.’ (Lei Ebreus 13:5.) Si no kontinua kontenti ku kil ku no tene, no ta libra no kabesa di kudadi di misti tene sempri manga di kusas. No ta ivita dibidas ki ka pirsis. (Ditus 22:7) No ta libra no kabesa di pirigu di juga diñeru o misti sedu riku rapidu sin tarbaja ciu.
3. Kuma ku no pudi usa no diñeru sin pensa so na no kabesa?
Jeova i un Deus ku gosta di pati, i no ta kopial ora ku no sta ‘pruntu pa da, pa rapati ku utrus.’ (1 Timótiu 6:18) No pudi usa no diñeru sin pensa na no kabesa ora ku no na apoia kongregason i juda kilis ku pirsisa di ajuda, spesialmenti no ermons na fe. Jeova sta mas interesadu na ke ku ta lebanu pa no da, nau na kuantidadi ku no na da. Ora ku no da di tudu no korson, no na sedu filis i no na kontenta Jeova. — Lei Atus 20:35.
APRINDI MAS
Jubi kal ki benefisiu di nkara tarbaju di un bon manera i di kontenti ku ke ku no tene.
4. Ngaba Jeova na bu manera di tarbaja
No amizadi ku Jeova dibi di ojadu klaru na manera ku no ta nkara tarbaju. Mostra VIDEO, dipus bo kombersa aserka des purguntas:
Na video, ke ku adimirau aserka di komportamentu di Jon i si asons na kau di tarbaju?
Ke ki i fasi pa nkara tarbaju di un bon manera?
Lei Kolosensis 3:23, 24, dipus bo kombersa aserka des purgunta:
Ke ku manda manera ku no ta nkara tarbaju i muitu importanti?
Tarbaju i importanti. Ma nunka no ka dibi di disa pa tarbaju sedu mas importanti di ki no adorason pa Jeova.
5. Kontenti ku kil ku no tene ta benefisianu
Manga di jintis ta fasi tudu ke pudi pa junta manga di diñeru. Ma Biblia danu un konsiju diferenti. Lei 1 Timótiu 6:6-8, dipus bo kombersa aserka des purgunta:
Ke ku Biblia nkoraẑanu pa fasi?
Nin si no tene so un bokadu, no pudi sedu filis. Mostra VIDEO, dipus bo kombersa aserka des purgunta:
Apesar di kuma e tene un bokadu di diñeru, ke ku juda es familia pa e sedu filis?
Ma ke gora si bu tene ciu, ma bu misti tene mas di ki kila? Jesus fasi komparason aserka des pirigu. Lei Lukas 12:15-21, dipus bo kombersa aserka des purgunta:
Ke ku bu aprindi nes komparason di Jesus? — Jubi versikulu 15.
Lei i kompara Ditus 10:22 ku 1 Timótiu 6:10. Dipus bo kombersa aserka des purguntas:
Ke ku bu pensa kuma i mas importanti? Tene un bon amizadi ku Jeova o tene manga di diñeru? Pabia ku bu pensa asin?
Kal purblemas ku no na tene si no misti mas diñeru?
6. Jeova na danu kil ku no pirsisa del
Si no ka tene tarbaju o no sta ku falta di diñeru, kila pudi judanu sibi si no konfia na Jeova o nau. Mostra VIDEO pa oja ke ku no pudi fasi nes situasons, dipus bo kombersa aserka des purguntas:
Na video, kal purblemas ku es ermon pasa?
Ke ki i fasi pa lida ben ku si purblemas?
Lei Mateus 6:25-34, dipus bo kombersa aserka des purgunta:
Ke ku Jeova purmiti fasi pa kilis ku pul na purmeru lugar?
ALGUNS JINTIS TA FALA: “N ten ku tarbaja risu pa sustenta ña familia. N ka pudi mati runions di kongregason kada semana.”
Kal testus di Biblia ku konvensiu di kuma pui adorason di Jeova na purmeru lugar sempri i minjor disison?
RUSUMU
Tarbaju ku diñeru i importanti, ma nunka i ka dibi di distrainu di no adorason pa Jeova.
Rekapitulason
Ke ku pudi judau nkara tarbaju di un bon manera?
Kuma ku kontenti ku ke ku bu tene pudi benefisiau?
Kuma ku bu pudi mostra bu konfiansa na promesa di Jeova di da si servus ke ke pirsisa del?
TENE MAS INFORMASON
Jubi si kontra Biblia fala i mal tene diñeru.
“Sera ki Diñeru i Rais di Tudu Koldadi Mal?” (Artigu na internet)
Sera ki jugu di diñeru i so un divirtimentu ku ka tene nada di mal?
“Ke ku Biblia fala aserka di jugu di diñeru” (No Korda!, marsu di 2015)
Jubi ke ku leba un omi ku ta juga jugu di diñeru i furta muda si vida.
“N gostaba ciu di kurida di kabalus” (Sintinela di 1 di novembru di 2011)