LISON 38
Da balur pa prenda di vida
I ten manga di kusas bonitu ku no pudi fasi pabia no tene vida. Mesmu si no tene purblemas, no pudi kontenti ku alguns kusas na vida. Kuma ku no pudi mostra kuma no da balur pa prenda di vida? Kal ki rason mas importanti pa fasi kila?
1. Ke ku manda no dibi di da vida balur?
No dibi di da vida balur pabia i un prenda ku bin di no Pape Jeova, ku amanu ciu. El i “fonti di vida” — i kumpu tudu kusas bibu. (Salmu 36:9) ‘El propi i da tudu jinti vida ku folgu ku tudu kusa.’ (Atus 17:25, 28) Jeova danu ke ku no pirsisa del pa pudi vivi. Ma tambi, i fasi kusas ku na pui pa no gosta di vivi. — Lei Atus 14:17.
2. Kuma ku no pudi mostra Jeova di kuma no da balur pa prenda di vida?
Jeova ta kuida di bo desdi oca ku bu sta na bariga di bu mame. Deus nspira si servu Davi, pa fala sin aserka del: “Bu uju oja ña kurpu ku ka formaduba inda.” (Salmu 139:16) Bu vida tene balur garandi na uju di Jeova. (Lei Mateus 10:29-31.) Jeova na sinti mal si kontra un algin pa diskarna tira vida di un algin o tira si propi vida.a (Saida 20:13) Ma tambi Jeova na fika mal si no pui no vida na pirigu sin nesesidadi o si no ka toma mididas pa proteẑi vida di utrus. Ora ku no proteẑi no vida i no rispita vida di utrus no ta mostra kuma no da balur garandi pa es prenda di vida.
APRINDI MAS
Jubi alguns manera ku bu pudi mostra kuma bu da balur pa prenda di vida.
3. Kuida di bu saudi
Suma no purmiti Jeova di kuma no na fasi sempri ke ki misti, no ta usa tudu no vida pa sirbil. I suma si no apresenta no kurpu suma un sakrifisiu pa Deus. Lei Romanus 12:1, 2, dipus bo kombersa aserka des purguntas:
Ke ku dibi di motivau kuida di bu saudi?
Di kal maneras ku bu pudi fasi kila?
4. Toma mididas pa ka ningin molostra o pirdi vida
Biblia nsentivanu pa ivita fasi kusas pirigosu. Mostra VIDEO pa aprindi alguns kusas ku bu pudi fasi pa proteẑi.
Lei Ditus 22:3, dipus bo kombersa kuma ku abo ku utrus bo pudi sta suguru . . .
na bu kasa.
na bu kau di tarbaju.
ora ku bu na fasi disportu.
ora ku bu na usa bu meius di transporti o bu na mbarka na meius di transporti di utrus.
5. Rispita vida di un mininu ku ka padidu inda
Na un poesia, Davi konta kuma ku Jeova sta interesadu na vida i na disinvolvimentu di un mininu na bariga. Lei Salmu 139:13-17, dipus bo kombersa aserka des purgunta:
Na uju di Jeova, vida ta kumsa na bariga o ora ku algin padidu?
Leis di Jeova na antigu Israel ta proteẑi mame ku mininu ku ka padidu inda. Lei Saida 21:22, 23, dipus bo kombersa aserka des purguntas:
Kuma ku Jeova ta oja un algin ku sin misti tira vida di un mininu ku ka padidu inda?
Kuma ku Jeova ta sinti ora ku algin tira vida na diskarna?b
Ke ku bu pensa aserka di manera di Jeova oja es asuntu?
Mesmu un minjer ku valoriza vida pudi sinti di kuma tira bariga i uniku suluson pa rel. Lei Isaias 41:10, dipus bo kombersa aserka des purguntas:
Si un minjer presionadu tira bariga, kin ki dibi di pidi pa i judal? Pabia di ke?
ALGUNS JINTIS TA FALA: “I minjer ku ten diritu di disidi si i na tira bariga o nau pabia i si kurpu.”
Ke ku konvensiu di kuma Jeova da balur pa vida tantu di mame suma di mininu ku ka padidu inda?
RUSUMU
Biblia sinanu ama, rispita, i proteẑi prenda di vida ku Jeova danu. Es nklui tantu no vida suma vida di utrus.
Rekapitulason
Ke ku manda vida di pekadur tene balur pa Jeova?
Kuma ku Jeova ta sinti si kontra un algin tira vida di utru pa diskarna?
Ke ku manda bu da balur pa prenda di vida?
TENE MAS INFORMASON
Kuma ku no pudi gardisi Jeova pa prenda di vida?
Diskubri resposta pa es purgunta: Sera ki Deus na purda un minjer ku tira bariga?
“Ke ku Biblia Fala Aserka di Tira Bariga?” (Artigu na internet)
Kuma ku Biblia pudi juda un algin ku misti mata kabesa?
“N Misti Muri — Sera ki Biblia Pudi Judan ora ku N Misti Mata Kabesa?” (Artigu na internet)
a Jeova ta preokupa ciu ku kilis ku tene korson kebrantadu o ku sta ku dur na korson. (Salmu 34:18) Jeova ta ntindi dur garandi ku pudi pui algin misti mata si kabesa, i misti juda si dunu. Pa oja kuma ku Jeova pudi juda un algin ku misti mata si kabesa, lei artigu “N Misti Muri— Sera ki Biblia Pudi Judan ora ku N Misti Mata Kabesa?” ku sta na parti Tene Mas Informason na fin des lison.
b Kilis ku ciga di tira bariga ka dibi di kulpa se kabesa ciu dimas, Jeova pudi purda elis. Pa tene mas informason, jubi artigu “Ke ku Biblia Fala Aserka di Tira Bariga?” ku sta na parti Tene Mas Informason na fin des lison.