Bu pudi tene filisidadi di bardadi

1. Ke ku signifika tene “nesesidadi spiritual”, i kal relason ki tene ku no filisidadi?

FILISIDADI di bardadi i ka so un simplis kontentamentu ku ta bin i bai. I pudi fika na vida di un algin pa tudu tempu. Kuma ku es pudi sedu? Jesus splika es na si nsinamentu na monti. I fala sin: “Filis i kilis ku sibi kuma e tene nesesidadi spiritual.” (Mat 5:3, TNM) Jesus sibi di kuma, pekaduris kumpudu ku diseẑu garandi di kunsi i adora se Kriadur, Jeova Deus. Es i no “nesesidadi spiritual.” Suma Jeova i ‘Deus filis’, kilis ku ta adoral pudi tambi sedu filis. — 1 Tim 1:11.

2-3. (a) Di akordu ku Jesus, kin mas ku pudi sedu filis? (b) Ke ku no na fala del nes studu, i pabia ki pirsis?

² Sera ki no pudi sedu filis so ora ku no ka tene purblemas? Nau. Na si nsinamentu na monti, Jesus fala un kusa ku ta dimira. “Kilis ku na cora”, talves pabia e sinti mal dimas aserka di se pekadus o pabia e tene purblemas gravi, e pudi sedu filis. Jesus fala mesmu kusa aserka di “kilis ku na sufri pirsigison pabia di yanda suma ku Deus misti”, o kilis ku ‘kobadu mal’ pabia e sedu sigiduris di Kristu. (Mat 5:4, 10, 11) Ma kuma ku un algin pudi tene filisidadi di bardadi nes tipu di situasons?

³ Jesus staba na nsinanu di kuma, i ka ora ku no ka tene purblemas na vida ku no ta tene filisidadi, ma i ora ku no kuida di no nesesidadi spiritual i pertusi di Deus. (Tiagu 4:8) Kuma ku no pudi fasi kila? Nes studu, no na fala di tris kusas ku pudi judanu tene filisidadi di bardadi.

LEI I STUDA BIBLIA

4. Kal ki purmeru kusa ku no dibi di fasi pa tene filisidadi di bardadi? (Salmu 1:1-3)

⁴ PURMERU KUSA: Pa tene filisidadi di bardadi, no dibi di lei i studa Biblia. Jesus kompara Palabra di Deus ku kumida. Tantu pekaduris suma limarias pirsisa di kumida pa vivi. Ma, so pekaduris ku pudi lei Palabra di Deus, i e pirsisa di fasi kila. E ku manda Jesus fala sin: “I ka son kumida ku ta da omi vida, ma tambi i tudu palabra ku ta sai na boka di Deus.” (Mat 4:4) Pa kila, no ka dibi di disa un dia pasa sin lei Palabra di Deus ku tene balur, ku sedu Biblia. Salmista fala sin: ‘Filis i omi ku ta kontenti ku lei di SIÑOR, i ta leil di dia ku di noti.’ — Lei Salmu 1:1-3.

5-6. (a) Ke ku no pudi aprindi na Biblia? (b) Kuma ku lei Biblia pudi judanu?

⁵ Suma Jeova amanu, i mostranu na Biblia ke ku no dibi di fasi pa no sedu filis. No aprindi ke ki misti fasi pa nos. No aprindi kuma ku no pudi pertusi del, i ke ku no pirsisa di fasi pa i purda no pekadus. Tambi no aprindi aserka di si purmesa bonitu pa futuru. (Jer 29:11) Es bardadis ku no aprindi atraves di studu di Biblia, inci no korson di kontentamentu!

⁶ No sibi kuma Biblia tene manga di konsijus pratiku pa vida di kada dia. Ora ku no sigi es konsijus, no pudi tene filisidadi. Kualker mumentu ku bu sinti disanimadu pabia di purblemas na vida, pasa mas tempu na lei Palabra di Jeova i medita nel. Jesus fala sin: ‘Filis i kilis ku ta obi palabra di Deus, e ta fasi suma ki fala.’ — Lukas 11:28.

7. Ke ku pudi judau aproveita ben di tempu ku bu ta pasa na lei Palabra di Deus?

⁷ Ora ku bu na lei Palabra di Deus, toma tempu pa sinti gustu di ke ku bu na lei. Pur isemplu, sera ki bu ciga ja di pasa es situason? Un algin kusiña un kumida ku bu gosta ciu del. Ma talves bu ka tene manga di tempu o bu sta na pensa na utrus kusas, i bu kume rapidu dimas, sin sinti gustu di kada kusa ku bu na kume. Dipus di bu kaba kume, bu nota di kuma bu kume rapidu i bu na mistiba kume divagar i sinti gustu di kada kusa ku bu kume. Sera ki bu ciga ja di lei Biblia rapidu, sin sinti gustu di si mensaẑen? Toma tempu pa aproveita ben di bu leitura di Palabra di Deus; jubi ke ku sta na pasa, imaẑina kuma bu na obi vos, i pensa na ke ku bu kaba di lei. Si bu fasi es, i na judau pa bu sedu mas filis.

8. Kuma ku “servu jiru, di fiansa” sta na fasi tarbaju ki dadu? (Jubi tambi nota bas di paẑina.)

⁸ Jesus kuji “servu jiru, di fiansa” pa da kumida spiritual na ora sertu, i no ta dadu manga di kumida spiritual.b (Mat 24:45) Na tudu ke ku servu jiru di fiansa ta purpara, Palabra inspiradu di Deus i kusa mas importanti ku ta usadu. (1 Tes 2:13) Es kumida spiritual ta judanu kunsi pensamentu di Jeova ku sta na Biblia. E ku manda no ta lei rivistas Sintinela ku No korda! ku artigus ku sta na jw.org. No ta purpara pa runions di kongregason ku ta fasidu na dias di semana ku fins di semana. No ta jubi tambi programa di JW Broadcasting^® kada mis, si kontra i ten. Si no kontinua lei i studa Biblia, no na konsigi fasi sugundu kusa ku na judanu tene filisidadi di bardadi.

VIVI DI AKORDU KU NORMAS DI JEOVA

9. Kal ki sugundu kusa ku na judanu tene filisidadi di bardadi?

⁹ SUGUNDU KUSA: Pa tene filisidadi di bardadi, no pirsisa di vivi di akordu ku normas di Jeova. Salmista fala sin: ‘Filis i kil ku rispita SIÑOR, i yanda na si kamiñus.’ (Sal 128:1) Rispita Jeova signifika ivita fasi kualker kusa ku ka ta kontental. (Dit 16:6) Asin, no ta kontinua fasi no minjor pa sigi normas di Jeova aserka di ben ku mal, suma ki faladu na Biblia. (2 Kor 7:1) No na sedu filis si no fasi kusas ku Jeova ama i nega kusas ki nuju. — Sal 37:27; 97:10; Rom 12:9.

10. Di akordu ku Romanus 12:2, kal disison ku no dibi di toma?

¹⁰ Lei Romanus 12:2. Un algin pudi sibi di kuma Jeova tene otridadi di disidi ke ki sertu i ke ki eradu, ma tambi i dibi di disidi sigi normas di Jeova. Pur isemplu, un algin pudi sibi kuma, guvernu tene diritu di fiksa limiti di vulusidadi na strada. Ma talves i ka misti sigi limiti ku pudu. Pabia di kila, i ta konduzi ku vulusidadi ku pasa limiti. No ta mostra pa no komportamentu di kuma, na bardadi sigi normas di Jeova i minjor manera di vivi. (Dit 12:28) I asin ku Davi sintiba. E ku manda i fala Jeova: “Bu na mostran kamiñu di vida. Na bu dianti i ten garandi kontentamentu; na bu mon direita i ten kusas sabi ku ka ta kaba.” — Sal 16:11.

11-12. (a) Ora ku no sta preokupadu o disanimadu, kal kuidadu ku no dibi di toma? (b) Kuma ku palabras ku sta na Filipensis 4:8 pudi judanu, ora ku no na kuji kusas ku no na divirti kel?

¹¹ Ora ku no sta preokupadu o disanimadu, no pudi pensa di kuma, no pirsisa di fasi algun kusa ku na judanu para pensa na no purblemas. I normal pensa sin, ma no dibi di toma kuidadu pa ka no lebadu fasi un kusa ku Jeova nuju. — Ef 5:10-12, 15-17.

¹² Na si karta pa Filipensis, apostolu Paulu nsentiva kristons pa e kontinua pensa na kusas ‘justu, puru, bon, tambi di bon fama.’ (Lei Filipensis 4:8.) Apesar di kuma Paulu ka skirbi izatamenti aserka di divirtimentu, ke ki skirbi dibi di influensia divirtimentu ku no ta kuji. Pur isemplu, tenta fala palabras di versikulu des manera: “Jubi si kontra bu musikas i puru, si bu filmis ku nuvelas i di bon fama, i si bu video gaimi mersi ngaba.” Fasi es na judau sibi kal divirtimentu ku pudi sedu bon na ujus di Deus, i kal divirtimentu ku pudi ka sedu bon. No misti vivi di akordu ku normas garandi di Jeova. (Sal 119:1-3) Ku un konsiensia limpu, no na pudi fasi terseru kusa ku na judanu tene filisidadi di bardadi. — At 23:1.

PUI ADORASON DI JEOVA NA PURMERU LUGAR

13. Kal ki terseru kusa ku na judanu tene filisidadi di bardadi? (Jon 4:23, 24)

¹³ TERSERU KUSA: Fasi tudu ku bu pudi pa adorason di Jeova sedu purmeru kusa na bu vida. Suma i Jeova ku kumpunu, no dibi di adoral. (Apok 4:11; 14:6, 7) Pa kila, kusa mas importanti na no vida dibi di sedu adora Jeova di manera ki misti pa i adoradu, ku sedu adoral “ku Spiritu ku bardadi.” (Lei Jon 4:23, 24.) No misti pa spiritu santu di Deus gia no adorason, pa i pudi sta di akordu ku bardadis ku sta na si Palabra. No adorason dibi di bin na purmeru lugar, mesmu si no na vivi na un tera nunde ke ka disanu fasi tudu no tarbaju, o nunde ki tujidu. Te nes mumentu, mas di 100 di no ermons ku irmas prindidu so pabia di kuma e sedu Tustumuñas di Jeova.c Mesmu asin, ku kontentamentu e ta fasi tudu ke pudi pa ora, studa i papia ku utrus aserka di Deus ku di Renu! Ora ku jintis na kritikanu o pirsiginu, no ta kontenti di sibi kuma Jeova na judanu nguenta, tambi i na paganu. — Tiagu 1:12; 1 Ped 4:14.

UN ISEMPLU

14. Ke ku kontisi ku un joven ermon na Tajikiston, i pabia di ke?

¹⁴ Alguns di no ermons ku irmas pasa situasons difisil dimas, ma e tene filisidadi di bardadi pabia e fasi tris kusas ku no kaba di fala del. Jubi ke ku kontisi ku un joven di 19 anu comadu Jovidon Bobojonov, di Tajikiston ku nega sedu tropa. Na 4 di Otubru di 2019, e tiral aforsa di si kasa, e pul na prison pa misis, i e tratal suma kriminosu. Es injustisa faladu del na meius di kumunikason na manga di teras. E konta di kuma e sutal oca e na forsijal fasi juramentu militar i bisti farda. Dipus di kila, un tribunal fala kuma i tene kulpa. I mandadu pa kampu di tarbaju forsadu te oca ku prisidenti di se tera purdal i manda pa libertal. Duranti tudu ki tempu, Jovidon kontinua sedu fiel i filis. Ke ku judal? Sempri i sibi kuma i tene nesesidadi spiritual.

15. Kuma ku Jovidon kontinua aprindi aserka di Jeova ocal na prison?

¹⁵ Ocal na prison, Jovidon kontinua aprindi aserka di Jeova, mesmu manera ki ka tene Biblia o nin utrus publikasons. Kuma ki konsigi fasi kila? Ermons ku irmas ta lebal kumida, i e ta skirbi testu di dia na saku nunde ke pui kumida. Asin, i ta konsigi lei Biblia i medita nel kada dia. Dipus ki libertadu di prison, i da es konsiju pa tudu kilis ku ka pasa inda es situason difisil: “I importanti pa bu usa tudu liberdadi ku bu tene pa kunsi Jeova diritu, atraves di lei si Palabra ku no publikasons.”

16. Na ke ku Jovidon konsentraba nel?

¹⁶ No ermon vivi di akordu ku normas di Jeova. I ka kontinua pensa na mau diseẑus, tambi i ka fasi mau kusas. En ves di kila, i konsentra na Jeova i na ke ki Jeova ta da balur. Jovidon ta dimiraba kusas bonitu ku Jeova kumpu. Kada parmaña i ta korda ku kantiga di kacus. Di noti i ta jubi lua ku strelas. I fala sin: “Es prendas ku bin di Jeova ta fasin sinti filis, tambi i ta dan koraẑen.” Ora ku no da balur pa tudu kusas spiritual i fisiku ku Jeova ta danu, no ta kontenti, i es kontentamentu pudi danu forsa di nguenta.

17. Ora ku no sta na un situason suma di Jovidon, kal ku na sedu rusultadu si no kontinua nguenta? (1 Pedru 1:6, 7)

¹⁷ Jovidon fasi tambi utru kusa: I pui adorason di Jeova na purmeru lugar. I sibi kal ki importansia di manti si fidelidadi pa Deus di bardadi. Jesus fala sin: “Bu na adora Siñor bu Deus; son el ku bu na sirbi.” (Luk 4:8) Kumandantis militar ku tropas misti pa Jovidon disa di sedu Tustumuña di Jeova. Ma en ves di kila, kada dia i ta ora risu parmaña ku di noti, i ta pidi Jeova pa i judal kontinua fiel. Mesmu manera ki tratadu ku injustisa, Jovidon kontinua sedu fiel. Pabia di kila, i tene kontentamentu garandi di tene un kusa ki ka teneba antis di pañadu, sutadu i pudu na prison. Gosi i tene un fe forti, pabia si fe testadu. — Lei 1 Pedru 1:6, 7.

18. Kuma ku no pudi kontinua tene filisidadi?

¹⁸ Jeova sibi ke ku no pirsisa del pa tene filisidadi di bardadi. Si bu sigi tris kusas ku ta juda pa tene filisidadi di bardadi, bu pudi kontinua tene filisidadi mesmu ku manga di purblemas. Tambi bu na pudi fala sin: ‘Filis i ki pobu ku Jeova i se Deus!’ — Sal 144:15.