Jeova danu garantia di kuma i na torna Tera na un Paraísu

1. Kal ku seduba mensaẑen di profeta Isaias pa si ermons israelitas?

PROFETA Isaias fala di kuma Jeova i “Deus di bardadi.” Palabra traduzidu “bardadi” signifika “amen.” (Isa 65:16) “Amen” signifika “pa i sedu sin” o “ku sertesa.” Ora ku palabra “amen” usadu na Biblia pa fala di Jeova o Jesus, i un garantia di kuma un kusa i bardadi. Pa kila, mensaẑen di Isaias pa si ermons israelitas seduba klaru: Ora ku Jeova fala un kusa, sempri i ta kontisi. Jeova mostra di kuma sempri i ta kumpri si purmesas.

2. Pabia ku no pudi konfia na purmesas ku Jeova fasi aserka di no futuru, i kal purguntas ku no na bin fala del?

² Sera ki no pudi konfia tambi di kuma, purmesas ku Jeova fasi aserka di no futuru na bin kumpri? Kuas 800 anu dipus di tempu di Isaias, apostolu Paulu splika pabia ku purmesas di Jeova sempri na bin kumpri. Paulu fala sin: “Deus ka pudi konta mintida”. (Eb 6:18) Suma ku un fonti ka pudi tene yagu dos i na mesmu tempu yagu salgadu, Jeova tambi ku sedu fonti di bardadi, ka pudi konta mintida. E ku manda, no pudi konfia na tudu ku Jeova fala, nkluindu tudu purmesas ki fasi pa no futuru. Nes studu, no na bin oja respostas des purguntas: Ke ku Jeova purmiti danu na futuru? Kal garantia ku Jeova danu di kuma es purmesa na bin kumpri?

KE KU JEOVA PURMITI?

3. (a) Kal purmesa ku servus di Deus gosta ciu del? (Apokalipsi 21:​3, 4) (b) Ke ku alguns ta fala ora ku no konta elis es purmesa?

³ Purmesa ku no na bin fala del, i kil ku servus di Deus na mundu ntidu gosta ciu del. (Lei Apokalipsi 21:​3, 4.) Jeova purmiti tempu nunde ku “mortu ka na ten mas, nin tristesa, nin cur, nin dur”. Manga di nos ta lei es versikulus pa nkoraẑa jintis ku no ta prega, pa mostra elis kuma ku vida na bin sedu na paraísu. Ke ku alguns ta fala ora ku no konta elis es purmesa? Talves e ta fala: “Es kusas bonitu, ma N ka fia si i bardadi.”

4. (a) Oca Jeova fasi si purmesa di paraísu, ke ki sibi i na bin kontisi na no tempu? (b) Alen di fasi purmesa, kal utru kusa ku Jeova fasi?

⁴ Oca Jeova nspira apostolu Jon pa skirbi es purmesa aserka di Paraísu, i sibiba di kuma aos, no na konta utrus es purmesa ora ku no na prega mensaẑen di Renu. Jeova sibiba tambi di kuma, i na sedu difisil pa manga di jintis fia di kuma i na bin ten es mudansas na futuru. (Isa 42:9; 60:2; 2 Kor 4:​3, 4) Pa kila, kuma ku no pudi konvensi no kabesa ku utrus, di kuma es bensons ku faladu del na Apokalipsi 21:​3, 4 na kumpri? Jeova ka fasi so es purmesa bonitu, ma tambi i danu motivus ku pui no pudi konfia nel. Kal motivus ki danu?

JEOVA DANU GARANTIA DI KUMA SI PURMESA NA KUMPRI

5. Kal versikulus ku danu motivus di konfia na purmesa di Deus, i ke ku es versikulus fala?

⁵ No tene motivus di konfia na purmesa ku Jeova fasi di paraísu na versikulus ku no na lei. Es versikulus fala sin: “Kil ku sinta na tronu i fala: ‘Jubi, N na fasi tudu kusa nobu.’ I fala mas: ‘Skirbi, pabia e palabra i bardadi, i di fiansa.’ I torna falan: ‘I sedu ja. Ami i Alfa ku Omega, kumsada ku kabantada.’” — Apok 21:​5, 6a.

6. Ke ku manda garantia ku faladu del na Apokalipsi 21:​5, 6 ta aumenta no konfiansa na purmesa di Deus?

⁶ Ke ku manda es palabras ta aumenta no konfiansa na purmesa di Deus? Livru Clímax de Revelação fala sin aserka des versikulus: “I suma si Jeova sina un dukumentu ku garantinu di kuma, i na bin kumpri si purmesa.”b Purmesa ku Deus fasi skirbidu na Apokalipsi 21:​3, 4. Dipus, na versikulu 5 ku 6, Jeova buri si sinatura, pa garantinu di kuma si purmesa na bin kumpri. No jubi kuma ku Jeova danu garantia di kuma, no pudi konfia nel.

7. Kin ku kumsa papia na versikulu 5, i ke ku manda es i interesanti?

⁷ Versikulu 5 kumsa ku es palabras: “Kil ku sinta na tronu i fala”. (Apok 21:5a) Na livru di Apokalipsi Jeova papia so tris bias, es i un delis. I ka un anju nin Jesus ku da es garantia, ma i propi Jeova ku dal! Es ta mostra di kuma no pudi konfia na tudu ke ki fala dipus. Pabia ki sedu sin? Pabia Jeova “ka ta konta mintida”. (Titu 1:2) Pa kila, palabras ku no lei na Apokalipsi 21:​5, 6 na kumpri sin falta.

“JUBI, N NA FASI TUDU KUSA NOBU”

8. Ke ku Jeova fala pa mostra di kuma si purmesa na bin kumpri? (Isaias 46:10)

⁸ Dipus, Jeova fala sin: “Jubi”! (Apok 21:​5, 6) Palabra gregu traduzidu pa “jubi!”, usadu manga di bias na livru di Apokalipsi. Un livru fala di kuma, es palabra ta usadu “suma un manera di konta kil ku na lei pa i presta atenson na ke ku na bin dipus.” Ke ku Deus fala dipus? I fala sin: “N na fasi tudu kusa nobu.” Na bardadi, Jeova na bin fasi es mudansas na futuru, ma i tene sertesa di kuma es purmesa na kumpri, e ku manda i fala des purmesa suma si i kumpri ja. — Lei Isaias 46:10.

9. (a) Ke ku frasi “N na fasi tudu kusa nobu” signifika? (b) Ke ku na bin kontisi ku “seu” ku “Tera” di aos?

⁹ No jubi prosimu frasi ku sta na Apokalipsi 21:5: “N na fasi tudu kusa nobu.” Nes kapitulu di Biblia, i na fala di dus kusas ku Jeova na fasi. Purmeru, Jeova na kaba ku es mundu beju, sugundu i na tisi nobu mundu. Apokalipsi 21:1 fala sin: “Purmeru seu ku purmeru tera pasa ja.” “Purmeru seu” na trata di guvernus ku sta bas di influensia di Satanas ku si dimonius. (Mat 4:​8, 9; 1 Jon 5:19) Suma ki usadu na Biblia, “tera” o mundu pudi rifiri jintis ku mora na Tera. (1 Kron 16:31; Sal 96:1) Asin, “purmeru tera” na rifiri jintis mau. Jeova ka na minjoria so “seu” ku “tera” di aos, en ves di kila i na kaba ku elis tudu. Dipus, i na bin torkia elis ku “nobu seu ku nobu tera”, ku sedu, nobu guvernu i ku jintis bon.

10. Kal kusas ku Jeova na bin fasi nobu?

¹⁰ Apokalipsi 21:5 fala di kal kusas ku Jeova na bin fasi nobu. Nota di kuma Jeova ka fala: “N na fasi tudu nobu kusa.” Ma, i fala sin: “N na fasi tudu kusa nobu.” Jeova na fasi pa Tera ku pekaduris sedu nobu i pa e sedu perfeitu. Suma ku Isaias fala, tudu Tera na bin sedu suma jardin di Eden. Tambi i na fasinu nobu ora ki kura kada un di nos di manera kompletu. Manku, segu ku surdu na kuradu, te mesmu kilis ku muri na lantandadu. — Isa 25:8; 35:​1-7.

“E PALABRA I BARDADI, I DI FIANSA . . . I SEDU JA”!

11. Ke ku Jeova fala pa Jon fasi, i pabia di ke?

¹¹ Kal utru kusa ku Deus fala pa danu garantia di kuma no pudi konfia nel? Jeova fala Jon: “Skirbi, pabia e palabra i bardadi, i di fiansa.” (Apok 21:5) Jeova ka da so ordi pa “skirbi”. I da tambi motivu di skirbi. I fala sin: “Pabia e palabra i bardadi, i di fiansa.” No kontenti pa manera ku Jon obdisi ordi di “skirbi”, e ku manda no pudi lei aserka di purmesa di Deus di Paraísu i pensa fundu na bensons garandi ku no na bin tene.

12. Pabia ku Jeova fala: “I sedu ja”!

¹² Ke ku Deus fala dipus? “I sedu ja”! (Apok 21:6) Gosi Jeova fala suma si tudu kusas ki purmiti aserka di Paraísu kumpri ja. I pudi fala sin, pabia ningin ka pudi tujil kumpri ke ki i purmiti. Dipus Jeova fala di utru kusa importanti ku danu garantia di kuma si purmesa na bin kumpri. Ke ki fala?

“AMI I ALFA KU OMEGA”

13. Pabia ku Jeova fala: “Ami i Alfa ku Omega”?

¹³ Suma ki faladu na kumsada, propi Jeova papia tris bias na visons ku Jon tene. (Apok 1:8; 21:​5, 6; 22:13) Kada bias, Jeova fala sin: “Ami i Alfa ku Omega.” Alfa i purmeru letra di alfabetu Gregu, i Omega i ultimu letra. Manera ki fala di kuma el i “Alfa ku Omega,” Jeova misti judanu ntindi di kuma, ora ki kumsa un kusa, i na kabantal.

14. (a) Da isemplu di ora ku Jeova fala el i “Alfa”, i ora ki fala di kuma el i “Omega.” (b) Kal garantia ku sta na Kumsada 2:​1-3?

¹⁴ Dipus ku Jeova kumpu Adon ku Eva, i konta elis ke ki misti pa pekaduris i pa Tera. Biblia fala sin: “Bo padi ciu, bo inci mundu, bo manda riba del.” (Kum 1:28) Oca Jeova konta ke ki misti, i sta suma si fala el i “Alfa”. Tempu na ciga nunde ku fijus obdienti i perfeitu di Adon ku Eva, na inci Tera i tornal na un paraísu. Na ki tempu, i na sta suma si Jeova fala el i “Omega.” Dipus di Jeova kaba kumpu “seu ku tera, ku tudu ki kusas ciu ku staba nelis,” i fala un kusa ku ta mostra di kuma ke ki i misti na bin kumpri sin falta. I sta na Kumsada 2:​1-3. (Lei.) Jeova fala di kuma setimu dia i sagradu. Ke kes misti fala? Jeova da garantia di kuma, sin falta i na kumpri ke ki mistiba pa pekaduris i pa Tera. Ke ki misti na bin kumpri di manera kompletu na ultimu parti di setimu dia.

15. Pabia ku Satanas pensa di kuma, i pudi tuji Jeova kumpri ke ki i misti?

¹⁵ Dipus ku Adon ku Eva rebela, e pasa sedu pekaduris i e kambanta pekadu ku mortu pa se fijus. (Rom 5:12) Asin, i pudi parsi di kuma i ka pusivel pa jintis perfeitu i ku ta obdisi Jeova inci Tera. Sera ki Satanas konsigi tuji Jeova di kumpri ke ki purmiti? Talves Satanas pensa di kuma Jeova ka na kumpri si purmesa. Talves i pensa di kuma, Deus na mata Adon ku Eva i kumpu utru kasal perfeitu pa kumpri ke ki i misti pa pekaduris. Ma, si Deus fasil, Satanas na akusal di kuma i munturus. Pabia? Pabia, suma ki faladu na Kumsada 1:​28, Jeova fala Adon ku Eva di kuma se fijus na inci Tera.

16. Pabia ku Satanas pensa di kuma i pudi akusa Jeova di ka konsigi kumpri ke ki i purmiti?

¹⁶ Kal utru disison ku Satanas pensa di kuma Deus na toma? Talves Satanas pensa di kuma Jeova na disa pa Adon ku Eva tene fijus, ma e ka na ciga nunka di sedu perfeitu. (Ekl 7:20; Rom 3:23) Asin, Diabu na akusa Jeova di ka konsigi kumpri ke ki purmiti. Pabia? Pabia es ka na kumpri ke ki Deus misti, ku sedu, inci Paraísu na Tera ku fijus obdienti i perfeitu di Adon ku Eva.

17. Kuma ku Jeova rosolvi rebelion di Satanas ku di Adon ku Eva, i kal ku na sedu rusultadu? (Jubi tambi diseñu.)

¹⁷ Nunka Satanas imaẑinaba ke ku Jeova na fasi. Jeova teneba suluson mas minjor di kumpri ke ki i misti, mesmu manera ku Satanas ku Adon ku Eva rebela. (Sal 92:5) Manera ku Jeova disa pa Adon ku Eva tene fijus, i mostra di kuma el i ka munturus, ma i algin di konfiansa. Tambi Jeova mostra di kuma, si i fala di kuma i na fasi un kusa, ningin ka pudi tujil. I fasi pa ke ki misti kumpri oca i manda un “jorson” o un fiju ku na salva fijus di Adon ku Eva ku sedu obdienti. (Kum 3:15; 22:18) Satanas dibi di fika dimiradu pa manera ku Jeova na da vida di si Fiju suma resgati pa salva pekaduris! Pabia? Pabia resgati basia na amor di bardadi. (Mat 20:28; Jon 3:16) Satanas ka tene es manera di sedu, i ta pensa so na si kabesa. Ke ku na ten pabia di resgati? Na fin di mil anu, fijus obdienti i perfeitu di Adon ku Eva, na mora na Paraísu na Tera suma ku Jeova mistiba na kumsada. Na ki tempu, i suma si Jeova na fala el i “Omega.”

KUMA KU NO PUDI AUMENTA NO KONFIANSA NA PURMESA KU JEOVA FASI DI PARAÍSU

18. Kal tris garantia ku Deus danu? (Jubi tambi kuadru “Tris motivus di konfia na purmesa di Jeova.”)

¹⁸ Nes studu no oja motivus ku pui no pudi tene sertesa di kuma Tera na bin sedu un Paraísu. Ke ku no pudi fala utrus pa da elis garantia di kuma es na bin sedu? Purmeru, i propi Jeova ku fasi purmesa. Livru di Apokalipsi fala sin: “Kil ku sinta na tronu i fala: ‘Jubi, N na fasi tudu kusa nobu.’” Jeova tene jiresa, puder, ku diseẑu pa kumpri si purmesa. Sugundu, i na kumpri si purmesa sin falta, e ku manda pa rel i suma si kumpri ja. E ku manda i fala sin: “E palabra i bardadi, i di fiansa . . . i sedu ja”! Terseru, nada ka pudi tuji Jeova kaba ke ki kumsa. E ku manda i fala sin : “Ami i Alfa ku Omega.” Jeova na mostra Satanas di kuma i munturus tambi i ka pudi tujil fasi ke ki misti.

19. Ora ku jintis ka fia na purmesa di Deus aserka di Paraísu, ke ku bu pudi fasi?

¹⁹ Lembra kuma, kada bias ku bu konta utrus ke ku Jeova fala pa garantinu di kuma si purmesa na kumpri, bu ta aumenta bu konfiansa nel. Pa kila, ora ku bu lei purmesa nkoraẑanti aserka di Paraísu ku na bin suma ki faladu na Apokalipsi 21:​4, i un algin falau: “Es kusas bonitu, ma N ka fia si i bardadi”, ke ku bu pudi fasi? Pabia ku bu ka na leil i splikal versikulu 5 ku 6? Mostral kuma ku Jeova da garantia di si purmesa, suma si pui sinatura nel. — Isa 65:16.