Purguntas di kilis ku ta lei no publikasons

Oca ku Jesus kumsa fasi Sia di Siñor, nunde ku 70 disipulus ki mandaba pa prega staba nel? Sera ki e bandonal?

No ka pirsisa di pensa di kuma, so pabia 70 disipulus ka matiba oca ku Jesus kumsa Sia di Siñor, kila signifika di kuma Jesus ka seta elis o bandona elis. Jesus mistiba so sta juntu ku si apostolus na ki mumentu.

Ki 12 ku ki 70 seduba disipulus di Jesus. Purmeru, Jesus kuji entri manga di disipulus, 12 omis ki coma di apostolus. (Luk 6:​12-16) Kontra i staba na Galileia ‘i junta dozi disipulu’ i “manda elis pa e bai konta di renu di Deus, pa kura duentis tambi.” (Luk 9:​1-6) Dipus oca ku Jesus staba na Judeia i “kuji mas setenta disipulu, i manda elis dus dus.” (Luk 9:51; 10:1) Pa kila, Jesus teneba disipulus na diferenti zonas ku ta pregaba aserka del.

Judeus ku torna disipulus di Jesus, kontinua fasi Paskua kada anu, talves juntu ku se familias. (Sai 12:​6-11, 17-20) Oca ku Jesus pertu muri, i bai pa Jerusalen ku si apostolus. I ka fala tudu si disipulus di Judeia, Galileia, ku Peria, pa e bin fasi Paskua juntu. Na bardadi, Jesus mistiba sta so ku si apostolus nes mumentu. I fala elis asin: “N tarda tene garandi vontadi di kume e sia di Paskua ku bos antis di N sufri”. — Luk 22:15.

I teneba bon motivu di fasil. I ka na tarda Jesus na muri suma “karnel di Deus ku ta tira pekadu na mundu.” (Jon 1:29) I na muri na Jerusalen, nunde ku sakrifisius pa Deus kustumaba fasidu pa manga di tempu. Mortu di Jesus tisi libertason mas garandi di ki karnel ku familias israelitas kume na noti antis de sai di Ejitu. (1 Kor 5:​7, 8) Pabia di sakrifisiu di Jesus, 12 apostolus na pasa sedu alisersu di kongregason kriston. (Ef 2:​20-22) Livru di Apokalipsi fala di sidadi santu ku tene “dozi pedra di alisersu” i ku tene “nomis di dozi apostolu di Karnel.” (Apok 21:​10-14) Asin, apostolus fiel na tene parti importanti na kumprimentu di intenson di Deus. Pa kila, no pudi ntindi ke ku manda Jesus misti sta ku elis na ultimu Paskua i na kil ki na bin fasi dipus, ku sedu, Sia di Siñor.

Ki 70 ku utrus disipulus, ka staba juntu ku Jesus na ki sia. Asin, tudu disipulus ku sedu fiel na benefisia di Sia di Siñor. Tudu es disipulus ku bin sedu kristons unjidu na yentra na kontratu pa Renu ku Jesus fasi ku si apostolus ki di noti. — Luk 22:​29, 30