Un simplis purgunta pudi da bon rusultadu

Maria ku si omi Jon,a mora na un tera nunde ku manga di jintis di Filipinas ta bai buska vida, i e ta kontenti di prega elis. Na tempu di COVID-19, Maria ka kumsa so studa Biblia ku jintis na tera nunde ke mora, ma tambi ku jintis ku sta na vivi na utrus tera. Kuma ki konsigi fasi es?

Maria ta punta si studantis: “Sera ki bu kunsi un algin ku misti studa Biblia?” Si e fala sin, i ta pidi pa e judal kontakta ki algin. Es purgunta simplis ta da sempri bon rusultadu. Pabia di ke? Pabia jintis ku gosta di Palabra di Deus ta misti konta se familia ku amigus kusas ke aprindi. Kal ku sedu rusultadu di fasi es purgunta?

Jasmin studanti di Maria mostral kuatru jintis ku misti studa Biblia. Un delis i Kristina, ku gosta di si studu tok i pidi Maria pa i ba ta studa ku el dus bias na semana. Oca Maria puntal si kunsi utru algin ku misti tambi studa Biblia, Kristina falal: “Sin, N na mostrau ña amigas.” Alguns semanas dipus, Kristina mostra Maria si kuatru amigas ku misti studa Biblia. Dipus, Kristina dal nomi di utrus amigas, i alguns delis dal tambi nomi di utrus jintis ku misti studa Biblia.

Kristina misti tambi pa si familia ku sta na Filipinas studa Biblia. Pa kila, i papia ku si fiju femia comadu Andreia. Na kumsada, Andreia pensaba di kuma ‘Tustumuñas di Jeova i un riliẑion strañu, e ka ta fia na Jesus i e ta usa so Antigu Testamentu’. Ma oca ki studa so un bias, i kaba pa nota di kuma ke ki pensaba aserka di Tustumuñas di Jeova i ka bardadi. Kada bias ki aprindi un nobu kusa na Biblia i ta fala sin: “Si Biblia papia del, i dibi di sedu bardadi!”

Ku tempu, Andreia papia ku Maria di si dus amigas ku un kolega di tarbaju ku kumsa tambi studa Biblia. Andreia teneba tambi un tia segu, comadu Angela. Sempri i ta sukutaba ora ku Maria na studa ku Andreia, ma Maria ka sibiba. Dipus, un dia, Angela fala Andreia si pudi pidi Maria pa i ba ta studa tambi Biblia ku el. Angela gostaba di ke i sta na aprindi. Na un mis i nkorna manga di testus di Biblia, i misti ba ta studa kuatru bias na semana! Ku ajuda di Andreia, Angela kumsa sempri ku mati runions pa videokonferensia.

Oca ku Maria diskubri di kuma omi di Kristina, Josué, ta staba sempri pertu duranti se studu, Maria puntal si misti mati se studu. Josué fala sin: “N misti so ba ta sukuta, ka bu fasin nin un purgunta. Si bu fasin purgunta, N na bai.” Na sinku minutu di studu, i fasi purguntas mas di ki Kristina, tambi i misti studa Biblia.

Purgunta simplis di Maria, pul pa i tene manga di studus di Biblia. I pasa manga di si studus pa utrus ermons ku irmas. Maria kumsa studa Biblia ku 28 jintis na kuatru teras.

Jasmin, purmeru studanti ku faladu del nes spiriensia, batisa na Abril di 2021. Kristina batisa na Maiu di 2022, i riba pa Filipinas pa sta juntu ku si familia. Dus utrus studantis ku Kristina mostra Maria batisa tambi. Alguns misis dipus ku Kristina batisa, Angela batisa i gosi i sedu pioneru regular. Josué, omi di Kristina, ku si fiju femia Andreia, ku manga di utrus studantis kontinua studa Biblia i e sta na torna se amisadi ku Jeova mas forti.

Na tempu di Jesus ku apostolus, manga di jintis konta se familia ku amigus ke ke aprindi aserka di Jesus. (Jon 1:​41, 42a; At 10:​24, 27, 48; 16:​25-33) Fasi bu studantis di Biblia ku kilis ku mostra interesi es purgunta: “Sera ki bu kunsi un algin ku misti studa Biblia?” Kin ku sibi kantu studus di Biblia ku bu pudi kumsa, so ku es simplis purgunta?