Kuma ku bu pudi sedu amigu di bardadi

SERA ki bu ciga di tene un purblema i bu ka tene ningin ku na judau? No sta na vivi na “dias di kansera”, pa kila, no pudi sinti disanimadu i sinti di kuma no sta anos so, pabia no ka tene ningin di papia ku el. (2 Tim 3:1) Ma, ora ku no tene purblemas, i ten jintis ku pudi judanu. Biblia mostra balur di tene amigus di bardadi na “tempu di foronta”. — Dit 17:17.

KUMA KU AMIGUS DI BARDADI PUDI JUDAU

Apostolu Paulu fasiba bias misionariu ku alguns di si amigus, i e judalba ciu. (Kol 4:​7-11) Oca ki prindidu na Roma, si amigus fasiba kusas ki ka pudiba fasi. Pur isemplu, Epafroditu leba Paulu kusas ki pirsisa del ku ermons ku irmas di Filipus manda. (Fil 4:18) Tíkiku leba kartas di Paulu pa diferenti kongregasons. Ku ajuda di si amigus, Paulu konsigi nkoraẑa kongregasons, mesmu oca ki ka disadu sai di kasa, o oca ki sta na prison. Kuma ku bu pudi sedu amigu di bardadi?

I ten ermons ku irmas aos ku mostra ke ku amigus di bardadi pudi fasi pa juda n̈utru. Elisabet, un pioneru regular na Spaña splika kuma un irma ku sedu si amiga judal na tempus difisil. Oca i diskubridu di kuma si mame tene kankru ku na matal, ki irma manda Elisabet manga di mensaẑens nkoraẑanti ku basia na Biblia. Elisabet fala sin: “Oca ku N oja si mensaẑens, N kontenti di sibi di kuma un algin staba na pensa na mi, i kila dan forsa di fasi ke ku N pirsisaba di fasi.” — Dit 18:24.

No pudi aumenta no amisadi ku no ermons ku irmas, ora ku no ta juda elis bai pregason o bai runions. Pur isemplu, sera ki bu pudi bai buska un ermon o irma di idadi, pa lebal runion o pregason? Si bu fasil, bo pudi nkoraẑa n̈utru. (Rom 1:12) Ma, alguns ermons ku irmas ka pudi sai di se kasa. Kuma ku no pudi sedu amigus di bardadi pa relis?

SEDU AMIGU DI BARDADI PA KILIS KU KA PUDI SAI DI SE KASA

Pabia di purblemas di saudi o utrus situasons, alguns di no ermons ku irmas ka pudi mati runions na Salon di Renu. No jubi isemplu di un ermon comadu David ku teneba kankru. I risibi tratamentu di kankru pa mas di seis mis. Na mumentu ki staba na risibi tratamentu, David ku si minjer, Lidia, ta matiba runions pa videokonferensia.

Kuma ku se amigus di kongregason juda elis? Dipus di kada runion, alguns di kilis ku sta na Salon di Renu, ta fasi sforsu pa papia ku David ku Lidia pa videokonferensia. Tambi, ora ku David ku Lidia da kumentarius na runions, ermons ku irmas ta manda elis mensaẑens dipus di runion, pa fala elis di kuma e gosta di se kumentarius. Kal ku sedu rusultadu? David ku Lidia sintiba di kuma, se ermons ku irmas ama elis.

Sera ki no pudi fasi programa pa prega ku un ermon o irma ku ka pudi sai di si kasa? No pudi fasi alguns mudansas na no programa pa pudi prega ku elis. Asin no na mostra di kuma no ka diskisi delis. (Dit 3:27) Pabia ku bu ka na programa prega ku elis pa skirbi kartas o pa telefoni? Ansions pudi fasi aranẑu pa kilis ku ka pudi sai di kasa, mati runions di saida di pregason pa videokonferensia. David ku Lidia gosta ciu des aranẑu. David fala sin: “Sta juntu ku ermons ku irmas pa un kombersasiñu ku orason, ta nkoraẑanuba ciu.” Di un tempu pa utru, talves bu pudi leba un studanti di Biblia pa kasa di un ermon o irma pa studa ku el la. Ma, lembra punta ermon o irma si i na da.

Ora ku no ta pasa tempu ku no ermons ku irmas ku ka pudi sai di se kasa, no ta kunsi se bon maneras di sedu i torna no amisadi ku elis mas forti. Pur isemplu, ora ku bu ta prega ku elis i nota kuma ke ta usa Palabra di Deus pa toka korson di un algin, bu rispitu pa relis na aumenta. Bu pudi tene nobu amigus ora ku bu ta juda bu ermons ku irmas pa e bai pregason i bai runions. — 2 Kor 6:13.

Oca ku Paulu staba na pasa situasons difisil, si amigu Titu bai jubil i kila nkoraẑal. (2 Kor 7:​5-7) I bon usa palabras ku na nkoraẑa no ermons ku irmas. Ma, isemplu di Titu nsinanu di kuma no ta nkoraẑa tambi no ermons ku irmas, ora ku no ta pasa tempu ku elis i fasi kusas pa juda elis. — 1 Jon 3:18.

SEDU UN AMIGU DI BARDADI NA TEMPU DI PIRSIGISON

No ermons ku irmas na Rusia danu un bon isemplu pa manera ke ta juda n̈utru. Jubi isemplu di Sergey ku si minjer, Tatyana. Pulisia rabista se kasa, dipus i leba elis pa fasi purguntas. Tatyana largadu purmeru i riba kasa. Sergey fala sin: “Oca ku Tatyana ciga kasa, un irma koraẑosu bin logu pa visital. Manga di amigus bin judanu ruma no kau.”

Sergey kontinua fala sin: “Sempri N gosta di Ditus 17:17 ku fala sin: ‘Amigu ta ama sempri. Na tempu di foronta algin ta ngaña ermon.’ Nes tempu di pirsigison, N pirsisaba ciu di ña amigus. N aprindi di kuma palabras di Ditus 17:17 i bardadi. Jeova dan amigus koraẑosu i ku judan.”a

No pirsisa di ajuda di no amigus, ora ku no sta na pasa situasons kada bias mas difisil. No na mas pirsisa delis na garandi tribulason. Pa kila, no sforsa pa sedu amigus di bardadi desdi gosi! — 1 Ped 4:​7, 8.