N ta burguñuba ciu, ma N bin torna misionariu

N padidu na 1951 na Viena, Austria, ña familia seduba katoliku. N ta burguñuba papia ku jintis, ma N ta sta avontadi pa papia ku Deus na orason. Ocan ku novi anu, ña pape kumsa studa Biblia ku Tustumuñas di Jeova, puku tempu dipus ña mame kumsa studa tambi.

I ka tarda, no fasi parti di kongregason di Döbling na Viena. No ta fasiba manga di kusas juntu suma familia. No ta lei i studa Biblia juntu, no ta mati runions di kongregason i no ta sedu vuluntarius na asembleias. Desdi ocan mas puku, ña pape judan disenvolvi amor garandi pa Jeova. Ña pape ta oraba sempri pa N sedu pioneru, ami ku ña irma. Ma es ka seduba ña objetivu.

N KUMSA SIRVISU DI TEMPU KOMPLETU

N batisa na 1965 ku 14 anu. Ma pa mi, i ta seduba difisil pa N papia ku jintis ku N ka kunsi na pregason. Tambi manga di bias, N ta pensaba di kuma utrus jovens seduba minjor di ki mi, N ta mistiba pa e gosta di mi. Pa kila, puku tempu dipus di ña batismu, N kumsa ku fasi amisadi ku kilis ku ka ta sirbi Jeova. Mesmu ku N gostaba di se kumpañerasku, ña konsiensia ta nkomodanba, pabia N ta pasaba manga di tempu ku kilis ki ka Tustumuñas di Jeova. Ma N ka teneba forsa di para ndianta ku elis. Ke gora ku judan?

Na ki tempu, un bajuda di 16 anu comadu Dorothée bin sedu publikadur na no kongregason. N fikaba tokadu dimas, manera ki gostaba ciu di pregason di kasa pa kasa. N mas el garandi un bokadu, ma N ka seduba ativu na pregason suma el. N fala ña kabesa: ‘Ña papes i Tustumuñas di Jeova, ma papes di Dorothée i ka Tustumuñas di Jeova. I mora ku si mame ku sta duenti, tambi i ta kuida del, ma nin ku sin i ta sai sempri pregason!’ Si isemplu motivan pa N fasi mas pa Jeova. Puku tempu dipus, Dorothée bin sedu ña kumpañer di sirvisu. Purmeru, no sedu pioneru ausiliar, ku ta comaduba di pioneru di ferias, mas tardi no sirbi juntu suma pioneru regular. Manera ku Dorothée gosta ciu di pregason, i fasin tambi pa N gosta ciu di pregason. I judan pa N kumsa ña purmeru studu di Biblia. Ku tempu, N kumsa ku sinti mas avontadi pa papia ku jintis na se kasa, na ruas i na kualker kau.

Na ña purmeru anu di sirvisu di pioneru regular, un ermon comadu Heinz bin pa no kongregason. I kumsa studa Biblia na Kanada, oca ki baiba visita si ermon garandi, ku sedu Tustumuña di Jeova. Heinz disignaduba suma pioneru spesial pa no kongregason na Viena. N gostaba del desdi purmeru dia ku N ojal. El i mistiba sedu misionariu, ma ami N ka pensaba sedu misionariu. Pa kila, na kumsada N ka mostral di kuma N gosta del. Mas tardi, no bin kumsa namora, no kasa i no kumsa ku sirbi suma pioneru na Austria.

N KUMSA KU TENE DISEẐU DI SEDU MISIONARIU

Heinz ta papia sempri ku mi, aserka di si diseẑu di sedu misionariu. Mesmu asin, nunka i presionan, ma pa motivan, i ta fasinba purgunta suma es: “Suma no ka tene fiju, sera ki no ka pudi fasi mas pa Jeova?” Suma N ta burguñuba papia ku jintis, N mediba sedu misionariu. I bardadi di kuma, mesmu manera ku N ta burguñu, N konsigi sedu pioneru, ma N pensaba di kuma i na sedu difisil pa N sedu misionariu. Nin ku sin, Heinz kontinua papia ku mi aserka di si diseẑu di sedu misionariu. Tambi i nsentivan pa N preokupa mas ku jintis di ki ña kabesa. Na bardadi, si konsiju judan.

Puku-puku N kumsa ku tene diseẑu di sedu misionariu, pa kila, no prenŝi pitison pa Skola di Jileadi. Ma ermon ku seduba responsavel di Filial, falan pa N minjoria inda ña inglis. Dipus di tris anu na tenta minjoria ña inglis, no fika surprendidu di risibi un disignason pa sirbi na un kongregason na lingua Iugoslavu, na Salzburg, Austria. Duranti 7 anu, no prega nes tiritoriu, nkluindu un anu ku ña omi sirbi suma superintendenti di sirkuitu. Es lingua seduba difisil, ma no teneba manga di studantis di Biblia.

Na 1979 ermons ku ta tomaba diantera na Filial, pidinu pa no bai Bulgaria, pa puku tempu. Suma no obra tujidu la, e falanu pa no finji suma si no na bai nan ferias la. E falanu pa no ka prega, ma di manera sukundidu, pa no leba publikasons ku fasidu na tamañu pikininu pa 5 irmas ku sta na Sofia, kapital di Bulgaria. N mediba mal, ma Jeova judan. Oja koraẑen des irmas, ku alegria ke teneba apesar di risku de prindidu, dan koraẑen pa N da ña minjor na kualker kusa ku organizason di Jeova dan pa N fasi.

Dipus di algun tempu, no prenŝi mas pitison pa Skola di Jileadi, ma es bias e kumbidanu. No pensaba di kuma, no na mati skola na inglis, na Stadus Unidu di Amerika. Ma na Novembru di 1981, organizason kumsa ku fasi tambi turmas di Jileadi na Almaña. Pa kila, no mati skola na almon, i seduba mas fasil pa N ntindi. Ma nunde ku no bin mandadu?

NO SIRBI NA UN TERA DI GERA

No mandadu pa Kenia! Ma filial di Kenia pidinu pa no bai sirbi na Uganda, un pais visiñu. Mas di 10 anu antis, un ẑeneral comadu Idi Amin fasi golpi di stadu na Uganda. Duranti si mandatu, milyaris di jintis matadu i manga delis sufri ciu. Na 1979 i torna ten mas utru golpi di stadu. Gosi N pensa bo ntindi, pabia ku N teneba medu di muda pa es tera ku tene manga di violensia. Ma Skola di Jileadi purparaduba ja pa no konfia na Jeova. Pa kila, no seta es disignason.

Situason na Uganda seduba difisil dimas. Ali ke ku Heinz fala di situason di Uganda na Anuário de 2010: “Guvernu ka konsigi da jintis yagu ku lus, ku utru kusas ki pirsis. Telefonis ka staba na tarbaja. Jintis ta fugia utrus i furta kusas, spesialmenti di noti. Pa kila, ora ku kau sukuru jintis ta fika na se kasas, e ta ora ku speransa di kuma ningin ka na bin furta elis algun kusa o mata elis.” Mesmu manera ku situason seduba difisil, ermons ku irmas kontinua tene fe forti!

Na 1982, ami ku Heinz no ciga Kampala, kapital di Uganda. Duranti no purmeru 5 mis, no staba na kau di Sam ku Christina Waiswa, juntu ku se 5 fiju ku utrus 4 membru di se familia. Ermon ku irma Waiswa ku se familia ta kumeba so un bias kada dia, ma e staba dispostu pa dividi ku nos kil un bokadiñu ke teneba. Duranti tempu ku no sta ku familia Waiswa, ami ku Heinz no aprindi manga di kusas pratiku ku judanu na no vida suma misionariu. Pur isemplu, no aprindi laba kurpu so ku un bokadiñu di yagu, i dipus no ta bin usa mas ki yagu pa kambia na kasa di bañu. Na 1983, ami ku Heinz no konsigi no propi kau di mora na un zona suguru di Kampala.

No gosta ciu di pregason. Pur isemplu, i tenba un mis ku no da jintis mas di 4.000 rivistas! Ma ke ku mas importanti i di kuma jintis ta setaba mensaẑen di Biblia. E rispita Deus i e gostaba di papia di Biblia. Ami ku Heinz no kustumaba tene entri 10 te 15 studus di Biblia. Tambi no aprindi manga di kusas ku no studantis. Pur isemplu, no apresia kontentamentu ke ta tene pa bin runion kada semana, apesar di kuma e ta yanda, ma nunka e miskiña.

Na 1985 ku 1986, i torna ten mas dus gera na Uganda. Manga di bias, no ta ojaba mininus ku seduba tropas, e pegaba armas garandi i e ta staba na postus di kontrolu. Duranti ki anus, no pidi Jeova manga di bias pa i judanu sedu jiru i ivita pirigu, tambi pa ka no medi. Jeova ruspundi no orasons. Manga di bias, ora ku no kontra ku algin ku seta mensaẑen, no ta diskisi kusas ku ta fasinu sinti medu.

No gostaba di prega stranjerus ku sta na Uganda. Pur isemplu, no studa Biblia ku un kasal ku bin di Tatarstan (Sentru di Rusia), comadu Murat ku Dilbar Ibatullin. Murat seduba mediku. Elis tudu dus e bin batisa, i e kontinua sirbi Jeova di manera fiel. Dipus N bin studa Biblia ku Tatjana Vileyska, un minjer di Ukrania, ku teneba depreson i ku mistiba mata kabesa. Dipus ku Tatjana batisa i riba pa Ukrania, i mas tardi i bin sirbi suma tradutor di no publikasons.a

UN UTRU DISIGNASON

Na 1991 oca ku no staba na pasa ferias na Austria, filial di Austria liganu i e kontanu no nobu disignason: Bulgaria. Duranti manga di anus, tarbaju di pregason tujidu na manga di teras di Europa, ma es situason bin muda i Tustumuñas di Jeova bin pirmitidu prega nes teras. Bulgaria i un des teras. Suma ku no falaba, ami ku Heinz no lebaba alguns publikasons di manera sukundidu oca ku no tarbaju di pregason tujiduba. Ma gosi no mandadu la pa prega.

E falanu pa no ka riba Uganda. Pa kila, no ka pudi riba kasa misionariu nunde ku no staba nel pa toma no kusas o pa dispidi no amigus. No bai pa Betel di Almaña, e danu un karu i no viaẑa pa Bulgaria. No disignadu pa Sofia, na un grupu ku tene serka di 20 publikaduris.

No pasa manga di difikuldadis na Bulgaria. Purmeru i di kuma, no ka obiba lingua. Alen di kila, uniku publikasons ku staba dispunivel na lingua bulgaru i A Verdade Que Conduz à Vida Eterna ku Meu Livro de Histórias Bíblicas. Tambi i difisil kumsa studus di Biblia. Mesmu ku es difikuldadis, es grupu pikininu seduba zelosu i e staba na fasi progresu. Membrus di igreẑa Ortodoksu di Bulgaria ka ta kontenti di ojanu na prega i e kumsa ku pirsiginu.

Na 1994, guvernu ka rikuñisi mas Tustumuñas di Jeova suma un riliẑion, i manga di jintis na Bulgaria ta pensaba di kuma no sedu un grupu riliẑiosu pirigosu. Alguns ermons prindidu. Meius di kumunikason spalia mintida garandi aserka di nos. E fala di kuma Tustumuñas di Jeova ta disa se fijus muri, pabia e ta nega pa e dadu sangi, tambi e ta fala di kuma no ta konvensi utrus Tustumuñas di Jeova pa e mata kabesa. Pregason seduba difisil pa ami ku Heinz. Pabia ora ku no na prega no ta kontra sempri ku jintis violentu ku ta gritanu, coma polisia pa nos i te mesmu e ta fercanu kusas. I ka pusivel ba yentranda publikasons na pais, tambi i difisilba luga kau pa fasi runions. Te mesmu polisia ciga di ntrumpi un di no kongresu. Ami ku Heinz no ka kustuma sta na un ambienti nunde ku jintis tene odiu kontra nos. Es seduba diferenti di jintis na Uganda ku staba dispostu pa studa Biblia! Ke ku judanu kontinua tene alegria?

Pasa tempu ku no ermons ku irmas judanu tene alegria. E kontentiba ku bardadi ku sta na Biblia i manera ku no sta ku elis. No seduba amigus i no ta judaba n̈utru. Ami ku Heinz, no aprindi di kuma no pudi tene alegria na kualker disignason si no kontinua ama jintis.

Ma ku tempu kusas bin minjoria. Na 1998, guvernu torna rikuñisi mas Tustumuñas di Jeova suma un riliẑion, i ka tarda manga di publikasons kumsa ku traduzidu na lingua bulgaru. Dipus na 2004, i fasidu dedikason di filial, ku kumsa kumpudu. Aos, Bulgaria tene 57 kongregasons ku 2.953 publikaduris. Na anu di sirvisu ku pasa, 6.475 jintis mati Memorial. Pa un tempu i tenba so 5 irmas na Sofia, ma gosi i ten 9 kongregason! Na bardadi no oja ‘kilis ku sedu mas puku, sedu mil.’ — Isa 60:22.

LIDA KU DIFIKULDADIS KU NO PASA

N pasa manga di purblemas di saudi na ña vida. Manga di bias, medikus diskubri di kuma N tene manga di tumor. Un bias e diskubri kuma N tene un tumor na kabesa. N fasidu un tratamentu difisil pa tira tumor. N bai India, nunde ku un mediku fasin operason duranti 12 ora di tempu pa pudi tira maior parti di ki tumor na kabesa. Dipus di operason, N fika pa algun tempu na Betel di India, pa pudi rekupera. Dipus no riba pa no disignason na Bulgaria.

Na mesmu tempu, Heinz yarda un duensa ki difisil di oja comadu di Huntington. Pabia des duensa, i tene difikuldadi di yanda, papia i kontrola si muskulus. Suma duensa sta na piora, Heinz kumsa ku dipindi kada bias mas di mi. Utrora N ta kansaba mal, i N ta staba preokupadu si N na konsigi kuida del. Ma un ermon joven comadu Bobi sempri ta kumbida Heinz pa prega ku el. Bobi ka ta preokupa ku ke ku jintis pudi pensa di Heinz manera ki ka pudi papia diritu i kontrola si mon ku si pe. N pudiba sempri konta ku ajuda di Bobi ora ku N ka tene forsa pa kuida di Heinz. Mesmu manera ku ami ku Heinz no ka tene fiju na es mundu mau, no sinti di kuma Jeova danu Bobi suma no fiju! — Mar 10:​29, 30.

Heinz tene tambi kankru. Infilismenti, ña omi ku N gosta ciu del muri na 2015. N sinti ciu falta di ña omi. I seduba kin ku ta judan pa N ka sta preokupadu dimas. I difisil vivi sin el. N ta lembra sempri del, i suma si sta inda bibu! (Luk 20:38) Kada dia, N ta lembra manga di bias di bon palabras ku konsiju ki ta danba. N kontenti manera ku no sirbi Jeova juntu pa manga di anus.

N NA GARDISI JEOVA MANERA KI JUDAN

Na bardadi, Jeova judan vensi tudu ña difikuldadis. I judan sedu un misionariu ku gosta di jintis, mesmu manera ku N sedu algin ku ta burguñu. (2 Tim 1:7) N na gardisi Jeova, manera ku ami ku ña irma no sta gosi na sirvisu di tempu kompletu. El ku si omi e ta sirbi na sirkuitu, i e ta viaẑa pa diferentis zonas di Europa pa visita kongregasons ku ta papia serviu. Jeova ruspundi orason ku ña pape ta fasiba ocanu pikininu!

Ña studu di Biblia judan sinti kalmu i tene pas ku ta bin di Jeova. Na tempus difisil, N aprindi ora ku “mas forsa” suma ku Jesus fasi. (Luk 22:44) Un di manera ku Jeova ruspundi ña orason, i atraves di bondadi ku amor di ña ermons ku irmas di kongregason di Nadezhda na Sofia. E ta kumbidan pa jumbai i manga di bias e ta fasin sibi di kuma e amam. Es tudu ta fasin sinti filis.

N ta pensa fundu na resureison. N ta imaẑina oja ña pape ku ña mame, dianti di no kasa, e torna sedu mas joven suma oca ke kumsa kasa. N ta imaẑina oja ña irma na purpara kumida pa risibi elis tudu. Oja ña omi Heinz firma pertu di si kabalu. Imaẑina es kusas ta judan pa N ka konsentra na kusas negativu, ma i ta inci ña korson di gardisimentu pa Jeova.

Ora ku N pensa na tudu bon kusas ku Jeova dan, i na kilis ki na bin dan, N ta sinti suma rei Davi ku fala sin na Salmu 27:​13, 14: “N fia kuma N na oja bondadi di SIÑOR na tera di jintis bibu. Pera na SIÑOR, bu ten koraẑen, bu fortifika bu korson. Pera na SIÑOR.”