Jintis di idadi tene balur pa kongregason

Talves bu ka pudi tambi fasi manga di kusas ku bu ta fasiba ocau joven. Mesmu manera ku bu ta sirbi Jeova pa manga di anus, talves bu pudi sinti disanimadu pabia bu ka pudi fasi kusas suma antis. Pur isemplu, talves bu ta kompara ke ku bu ta fasi gosi, ku ke ku bu ta fasiba antis. Si asin ku bu ta sinti, ke ku bu pudi fasi pa lida ku es pensamentu?

KE KU JEOVA MISTI PA BU FASI

Punta bu kabesa: ‘Ke ku Jeova misti pa N fasi?’ Bu pudi sinti konsoladu ku palabras ku sta na Ripitison di Lei 6:5: ‘Ama SIÑOR bu Deus ku tudu bu korson, ku tudu bu alma, ku tudu bu forsa.’

Di akordu ku es versikulu, Jeova misti pa bu sirbil ku tudu bu korson, alma ku forsa. Sibi es na judau pa ka kompara ke ku bu ta fasi, ku ke ku utrus ta fasi. O ke ku bu ta fasi gosi, ku ke ku bu ta fasiba ocau mas joven.

Pensa nes: Oca ku bu seduba mas joven, ke ku bu daba Jeova? Maioria di servus di Jeova na fala di kuma e staba na da se minjor pa rel. Abo tambi, bu daba Jeova bu minjor di akordu ku bu situason na ki tempu. Ke ku bu pudi da gosi pa Jeova? Di akordu ku bu situason gosi, i pudi sedu ki bu minjor i ke ku bu pudi da Jeova nes mumentu. Si bu ta pensa asin, bu na nota di kuma, ke ku bu sta na da Jeova gosi, i mesmu ku bu ta dalba ocau joven. Bu daba bu minjor pa rel na ki tempu, i gosi bu sta na da inda bu minjor pa rel.

KE KU BU APRINDI NA VIDA PUDI JUDA UTRUS

Ali utru kusa ku bu pudi pensa nel: En ves di pensa so na ke ku bu ka pudi ja mas fasi, pensa na manga di oportunidadi ku bu tene di juda utrus. Suma servu di Jeova ku tene idadi, bu pudi fasi manga di kusas ku bu ka pudiba fasi, ocau mas joven. Pur isemplu, bu pudi fasi es kusas:

Konta utrus bu spiriensia. Jubi alguns palabras ku sta na Biblia:

Rei Davi: “N seduba nobu, ma gosi N beju; nunka N ka oja algin justu bandonadu, nin si fijus na pidi simola di kumida.” — Sal 37:25.

Josué: “N sta ja na kamiñu ku tudu jinti un dia ten ku bai. Bo sibi diritu dentru di bo korson kuma, nin un palabra son ka maina di tudu ki bon palabras ku SIÑOR bo Deus fala aserka di bos. Tudu purmesa kumpridu; nin un son ka maina.” — Jos 23:14.

Talves bu ciga ja di fala mesmu palabras. Davi ku Josué papia di ke propi ke pasa na se vida. Suma es servus fiel di Jeova konta ke propi ke oja i obi duranti tudu se vida, se palabras teneba mas sintidu.

Si bu sta na sirbi Jeova pa manga di tempu, bu pudi konta ke ku Jeova fasi pa bo o pa utrus. Sera ki bu na lembra di kuma ku Jeova bensua si povu? Si bu lembra, sta avontadi pa konta utrus el! Es pudi nkoraẑa utrus, suma ku bu sintiba nkoraẑadu. Bu pudi nkoraẑa ermons ku irmas ora ku bu konta elis bu spiriensia. — Rom 1:​11, 12.

Utru manera ku bu pudi nkoraẑa utrus, i ora ku bu ta mati runions na Salon di Renu sempri ku bu pudi. Ora ku bu fasi es, bu pudi nkoraẑa bu ermons ku irmas i elis tambi e pudi nkoraẑau. Connie ku faladuba del fala sin: “Bai runion ta judan pa N ka fika disanimadu. Kuma ku N pudi fika disanimadu ku tudu amor ku N ta risibi na Salon di Renu? N ta tenta mostra ña amor pa relis ora ku N da elis prendasiñus. Tambi N ta fasi tudu pa kontinua partisipa na atividadis spiritual, juntu ku ña ermons ku irmas.”

JEOVA DA BALUR PA MANERA KU BU TA SIRBIL KU FIDELIDADI

Biblia tene manga di isemplu di jintis ku Jeova ama mesmu manera ke teneba limitason pabia di se situason. No jubi isemplu di Simeon un israelita ku teneba idadi, i ku vivi na tempu ku Jesus padidu. Oca ku Simeon ta baiba templu, talves i ta ojaba jovens na fasi tarbajus importanti. Ma ke gora di Simeon? Talves i pensaba di kuma i tene puku balur na ujus di Jeova. Ma Jeova ta ojalba di utru manera. I oja Simeon suma algin ku ta “yandaba diritu, i tenba garandi rispitu” pa rel, i Jeova bensual ku privileẑiu di oja Jesus ocal bebe. Te mesmu Jeova usa Simeon pa i konta di kuma Jesus na bin sedu Mesias! (Luk 2:​25-35) Na bardadi, Jeova ka konsentra na forsa fisiku di Simeon, ma i ojal suma un omi ku tene fe forti, i “Spiritu Santu staba riba del”.

Bu pudi tene sertesa di kuma Jeova ta da balur pa manera ku bu ta sirbil ku fidelidadi, i ka mporta kal limitasons ku bu tene. Sakrifisiu ku Jeova ta seta i ‘kil ku bu tene; i ka na pidiu kil ku bu ka tene.’ — 2 Kor 8:12.

Pa kila, konsentra na ke ku bu pudi fasi. Pur isemplu, sera ki bu pensa na diferentis manera ku bu pudi prega, nin si so pa puku tempu? Sera ki bu pudi nkoraẑa bu ermons ku irmas ora ku bu liga elis o skirbi elis karta? Un simplis atu di amor pudi nkoraẑa bu ermons ku irmas, prinsipalmenti ora ki bin di un algin suma bo, ku sta ja na sirbi Jeova pa manga di anu.

Mesmu ku limitasons fisiku, bu pudi fasi manga di kusa pa Jeova. Jubi spiriensia ku bin di Afrika di Lesti ku sta na kuadru “Un irma usa Biblia pa salva vida di un algin.”

Lembra di kuma manera ku bu sirbi Jeova pa manga di anus i bu kontinua sirbil ku fidelidadi, pudi nkoraẑa utrus ciu. Abo i un isemplu di perseveransa, bu pudi tene sertesa di kuma ‘Deus i ka injustu pa diskisi di bu tarbaju, ku amor ku bu mostra pa el, manera ku bu sirbi si pobu, suma ku bu na fasi te gosi.’ — Eb 6:10.

KA BU KANSA FASI KUSAS PA JUDA UTRUS

Studus mostra di kuma ora ku omis ku minjeris di idadi ta juda utrus e ta tene minjor saudi, e ta pensa mas diritu i e ta vivi mas tempu.

I bardadi kuma, fasi bon kusas pa juda utrus ka ta kaba ku tudu efeitu di bejisa. So Renu di Deus ku na bin kaba ku tudu pekadu ku no yarda ku ta kausa bejisa ku mortu. — Rom 5:12.

Mesmu aos, fasi ke ku Jeova pidiu pa bu fasi, suma juda utrus kunsil, na manti bu speransa forti, i te mesmu i pudi benefisia bu saudi. Ermons di idadi, bo tene sertesa di kuma Jeova da balur pa ke ku bo ta fasi na si sirvisu, i bo isemplu di fe tene importansia na kongregason.