¿Cai tapuicunamunda yachasha ninguichu?

TUQUICUNAMI guaquin tapuicunata rrarinchi. Cai tapuicunamundaca tuquicunami alli yachana canchi. Talvez quiquinshi caita tapurishcanguichari:

• ¿Taita Dioschushi llaquicunata churan?

• ¿Guerracuna, llaquicunaca tucuringachushi?

• Guañushcacunaca ¿maimuti rrin?

• ¿Guañushcacunaca causaringachushi?

• Taita Dios ñucunchita uyachunca ¿imashinati mañana canchi?

• Contento, alli causangapuca ¿imatashi rrana canchi?

Cai tapuicunata yachangapuca ¿imatashi rrana canchi? Achca gentecunaca curacunata, pastorcunata, iglesiamu rric gentecunatami tapuncuna. Paicunapu consejocunaca alli laya rricurishashi, jipamuca ña na valinchu. Tuquicuna diferenteta nishcamundami gentecunaca ima rranata na yachancuna.

Tuqui gentecunata ayudangapuca shuc alli libromi tiyan. Chi libropica mana llulleshalla, alli consejocunami tiyan. ¿Ima libroshi can? Jesusca Taita Diosta mañeshaca: “Jambu shimica na llullanchu” nircami (Juan 17:17). Diospu Shimitaca Biblia nishami rricsinchi. Cai alli libroguan ñaca nishca tapuicunapu respuestacunata rricushun.

¿Taita Dioschushi llaquicunata churan?

¿IMAMUNDATI SHINA TAPURINCHI? Milli, mana alli gentecuna tiyishcamundami juyipota causanchi. Achca religioncunaca llaquicunata rricushaca Diosmi castigacun, paimi llaquicunata churan nincuna. Caica ¿ciertochushi?

BIBLIACA CAITAMI YACHACHIN: Taita Diosca llaquicunataca nunca na churanchu. Job 34:10​pica: “Taita Diosca ima mana alli rranataca ni yuyishcashichu. Tuqui poderta charic Diosca degana llaquichinataca mana yuyishcashichu” nin. Taita Dios ñucunchita achcata juyeshcamundami cai allpapi alaja, maravilla causita cusha nin. Chimunda Jesusca shina mañachun yachachirca: “Jagua cielopi cac ñucunchi Taita Dios, jambu shuti jatunyachishca cachun. Jambu gobierno shamuchun. Jagua cielopi shinaiti cai allpapishi jan nishca shina factarichun” (Mateo 6:9, 10). Caita factachingapumi Taita Diosca paipu shuclla Churita tuquicunamunda guañuchun cacharca. Shinami Taita Diosca ñucunchimunda precuparishcata rricuchin (Juan 3:16).

Cai versocunatashi mashqui: Génesis 1:26-28; Santiago 1:13; 1 Pedro 5:6, 7.

¿Guerracuna, llaquicunaca tucuringachushi?

¿IMAMUNDATI SHINA TAPURINCHI? Guerracunapica achca gentecunami guañun. Shinaiti tuquicunatami tuqui laya llaquicuna japin.

BIBLIACA CAITAMI YACHACHIN: Taita Diosca tuqui guerracunata, llaquicunata tucuchisha alli causita cusha nin. Paipu gobierno cai allpata mandemu callaricpica “guerrata rranatashi ni pi na yachangacunachu”. Ashtaguanshi “paicunapu espadacunataca yapuna rrejacunatami rrangacuna” ninmi (Isaías 2:4). Shinaiti Taita Diosca gentecunapu llaquicunata tucuchisha nin. Chimundami Bibliapica Taita Diosca “paicunapu ñagüimundaca tuqui güiquitami fichanga, guañuishi, guaquishi, llaquishi, nanishi ña mana tiyangachu. Ñaupa ima tiyishcacunaca chingaringami” nin (Revelación o Apocalipsis 21:3, 4).

Cai versocunatashi mashqui: Salmo 37:10, 11; 46:9; Miqueas 4:1-4.

Guañushcacunaca ¿maimuti rrin?

¿IMAMUNDATI SHINA TAPURINCHI? Casi tuqui religioncunami guañushca jipaca almaca causesha catin nin. Chimundami gentecunaca guañushcacunata manchan. Guaquincunaca guañushcacunaca causaccunata llaquichi pudin nin. Shinaiti allicunaca jagua cielomu rrin, cutin mana allicunaca infiernomu rrin nincuna. Caica ¿ciertochushi?

BIBLIACA CAITAMI YACHACHIN: Guañushcacunaca mana uyanchu, mana rricunchu, mana rrimanchu, mana nimata yuyancunachu. Eclesiastés 9:5​pica “guañushcacunaca nimata na yachancunachu” nin. Chimundami guañushcacunaca mana llaquichi pudin, mana ayudi pudin, mana nimata rri pudincunachu (Salmo 6:5).

Cai versocunatashi mashqui: Génesis 3:19; Eclesiastés 9:6, 10.

¿Guañushcacunaca causaringachushi?

¿IMAMUNDATI SHINA TAPURINCHI? Tuquicunami ñucunchi familiacunaguan, ñucunchi rricsishcacunaguan casha ninchi. Chimundami ñucunchi guañushca familiacuna cutin causarichun munanchi ¿nachu?

BIBLIACA CAITAMI YACHACHIN: Achca guañushcacunaca causaringami. Jesusca: “Tuqui pambashcacuna paipu nishcata uyana horesmi chayamucun. Chimi paicunaca jataringacuna” nirca (Juan 5:28, 29). Guañushcacuna cai allpallapiti causarishami, Taita Diospu nishcacuna imashina factarishcata rricungacuna. Imashina callaripi Eden pushtu carca, shinaitimi cai allpashi alaja, maravilla canga (Lucas 23:43). Taita Diosta cazuccunaca mana ungushalla para siempremi causashun. Bibliaca: “Alli cosasta rraccunami allpata japingacuna. Paicunaca para siempremi chipi causangacuna” nin (Salmo 37:29).

Cai versocunatashi mashqui: Job 14:14, 15; Lucas 7:11-17; Hechos 24:15.

Taita Dios ñucunchita uyachunca ¿imashinati mañana canchi?

¿IMAMUNDATI SHINA TAPURINCHI? Tuquicunami Taita Diosta mañanchi. Shinashi guaquin gentecunaca Taita Diosca ñucataca na uyanchu nincunami.

BIBLIACA CAITAMI YACHACHIN: Taita Diosta mañeshaca mana chi shimicunallatati rripitinachu canchi. Jesusca: “Taita Diosta mañeshaca cutishuc gentecuna cuenta ama chillatati, chillatati nichu” nirca (Mateo 6:7). Taita Dios ñucunchita uyachunca, pai nishca shinami mañana canchi. Chipuca pai ima munashcatami yachana canchi. Chita yachesha Taita Diosta mañi pudinchi. 1 Juan 5:14​pica “paipu muni queshca shina mañecpica, ñucunchi imata mañecpishi paica uyanllami” nin.

Cai versocunatashi mashqui: Salmo 65:2; Juan 14:6, 14; 1 Juan 3:22.

Contento, alli causangapuca ¿imatashi rrana canchi?

¿IMAMUNDATI SHINA TAPURINCHI? Alli causasha nishami gentecunaca universidadmu rrin, politicapi chagrurin, achca cullquitashi mashcancuna. Shinashi mana contento causancunachu.

BIBLIACA CAITAMI YACHACHIN: Jesusca contento, alli causangapu ima minishtirishcatami yachachirca. Paica “Taita Diosmunda yachasha niccunami contento causancuna” nirca (Mateo 5:3). Contento, alli causangapuca Taita Dios ima munashcatami Bibliapi yachana canchi. Shinami alli causangapu ima minishtirishcata, ima rrana queshcata yachashun. Biblia nishcata cada funlla factachishaca contento, allimi causashun (Lucas 11:28).

Cai versocunatashi mashqui: Proverbios 3:5, 6, 13-18; 1 Timoteo 6:9, 10.

Ñami 6 tapuicunapu respuestacunata Bibliaguan rricushcanchi. Bibliamunda ¿cutishuc tapuicunatashi yachasha ninguichu? Bibliamunda mas yacheshaca cutishuc tapuicunatashi yachi pudingui. Nachu guaquinpica yuyeshcangui, Taita Dios ñucunchimunda precuparishaca ¿imamundati achca llaquicuna tiyachun saquishca? Familia ucupi, alli causangapuca ¿imatati rrana can? Cai laya tapuicunatami Bibliaca yachachin.

Achca gentecunaca Bibliamunda na yachasha nincunachu. Paicunaca achca letracunata charishcamunda quillanayan, mana intindishachu nincunami. ¿Quiquinshi shinaitichu yuyangui? Testigo de Jehovacunaca Bibliata alli intindingapumi ishqui ayudacunata charinchi.

Primerr ayudaca, Mana guañushalla uni unita causangapuca Taita Diosta cazushunchi folletomi. Cai folletoca Bibliata jaguallata intindichunmi ayudan. Shinaiti Bibliata yachasha nicpica, quiquinpu guasimu rrishami gratis Bibliamunda yachachishun. Ima funlla, ima hores quiquin maipi visitachun muneshcapimi contento visitashun. Semanapi shuc vueltata Bibliamunda yachachishun. Achca gentecunami cada semana testigo de Jehovacunaguan Bibliamunda yachesha contento sintirishcacuna.

Quiquinshi Bibliapu consejocuna achca valishcata rricushaca contentomi sintiringui. Taita Diospu ayudaguanmi religioncunapu panda yuyicunata, mana alli costumbrecunatashi saquingui. Shamuc funllacunapi alli causi tiyigrishcata yuyeshami contento, alli causangui. Jesusca: “Mana llulla shimita yachanguichi. Mana llulla shimimi jancunata cacharichinga” nirca (Juan 8:32).