Taita Diosca ¿imamundati llaquicuna tiyachun saquishca?

1. ¿Imamundati llaquicuna tiyan?

Diablo llullashcamundami llaqui causimu callarircanchi. Callaripica Diabloca jucha illac, alli angelmi carca. Jipamumi paica mana allita rrimu callarirca (Juan 8:44). Diabloca Taita Diosllata cazucta rricushami paitashi cazuchun munarca. Chimundami Taita Diosta ama cazuchun llullacunaguan Evata pandachirca. Adanshi Eva cuentami Taita Diosta na cazurca. Chimundami guañuishi, llaquishi tiyan. Génesis 3:1-6, 19​ta liyi.

Diabloca Evata pandachishami Taita Diospu contra tucurca. Paica Taita Dios mandachunca na munarcachu. Achca gentecunaca Taita Diosta mana cazushami Diablopu lado tucushcacuna. Chimundami Diabloca cai mundopu mandac tucushca. Juan 14:30 y 1 Juan 5:19​ta liyi.

2. Taita Diospu tuqui rrashcacunaca ¿allichu can?

Taita Diosca tuquitami alli rrarca. Chimundami angelcunashi, gentecunashi Taita Diosta tuquipi cazui pudircacuna (Deuteronomio 32:4, 5). Taita Diosca allita, mana allita ñucunchillati agllachunmi saquishca. Ñucunchica Taita Diosta juyishcamundami paita cazuna canchi. Santiago 1:13-15 y 1 Juan 5:3​ta liyi.

3. Taita Diosca ¿imamundati llaquicuna tiyachun saquishca?

Taita Diosca gentecuna munashcata rrachunmi saquishca. ¿Imamunda? Diosta mana cazuc gobiernocuna gentecunata mana ayudi pudishcata rricuchun (Eclesiastés 7:29; 8:9). Cai 6 mil guatacunapica cai gobiernocunaca shuacunata, llaquicunata, unguicunata, guerracunatashi na tucuchi pudishcacunachu. Jeremías 10:23 y Romanos 9:17​ta liyi.

Taita Dios ñucunchita mandachun saquishaca alaja, maravillatami causashun (Isaías 48:17, 18). Taita Diosca ñallami cai mana alli gobiernocunata tucuchinga. Taita Diospu gobiernota cazuccunallami cai allpapi alaja, maravillata causangacuna (Isaías 11:9). Daniel 2:44​ta liyi.

Cai uchilla peliculata rricui: Taita Diosca ¿imamundati llaquicuna tiyachun saquishca?

4. Taita Dios cai llaquicunata nari tucuchicllapiti ¿imatashi rrana canchi?

Diabloca nircami gentecunamu Taita Dios tuquita cushcamundami paitaca cazuncuna nisha. Pero chica na ciertochu. Chimundami Taita Dios llaquicunata nari tucuchicllapiti Diablo llulla cashcata rricuchi pudinchi. ¿Imashina? Ñucunchi causiguan. Caipi tiyishca gobiernocunata apoyangapu rrandica Diospu gobiernotami apoyana canchi. Job 1:8-12 y Proverbios 27:11​ta liyi.

5. Taita Diospu lado cashcataca ¿imashinati rricuchi pudinchi?

Diospu gobiernota apoyana canchi. Chipuca paimundami Bibliapi yachana canchi. Shinaiti Bibliapi yachashcata ñucunchi causipi rricuchina canchi (Juan 4:23). Jesus cuenta politicacunapi, guerracunapishi na chagrurishami Diablopu contra cashcata rricuchishun. Juan 17:14​ta liyi.

Diabloca milli, mana alli cosascunata alli cuenta rricuchingapumi paipu poderta utilizan. Mana alli cosascunata saquicpica guaquin familiacuna, amigocunashi burlaringacunami (1 Pedro 4:3, 4). Shina tucucpica Taita Diosta cazuccunaguan apanacui, llaquicuna rricuricpishi Taita Diosta cazusha cati. Shina rreshami Diablo llulla cashcata rricuchingui. 1 Corintios 6:9, 10 y 15:33​ta liyi.

Taita Dios ñucunchita achcata juyishcamundami ñalla tuqui llaquicunata, na alli cosascunatashi tucuchinga. Diospu gobiernota apoyaccunallami mana guañushalla para siempre cai allpapi causangacuna. Juan 3:16​ta liyi.