Bibliataca ¿imamundati mas yachesha catina cangui?

1. Bibliamunda mas yachesha catinaca ¿imashinati ayudanga?

Caicamaca Bibliamunda yacheshcacunaca Taita Diosta juyachunmi ayudashca. Shinashi Taita Diostaca masmi juyisha catina cangui (1 Pedro 2:2). Bibliamunda mas yacheshami Taita Diosmunda na caruyangui, mana guañushalla para siempre causitashi charingui. Juan 17:3 y Judas 21​ta liyi.

Taita Diosmunda mas yacheshaca Taita Diospimi mas cringui, paipu mandashcacunatashi factachingui (Hebreos 11:1, 6). Shinaiti na alli cosascunata guashamu saquishami alli cosascunata rrimu callaringui. Hechos 3:19​ta liyi.

2. Cutishuccunataca ¿imashinati ayudi pudingui?

Alli noticiacunata uyeshaca cutishuccunamumi parrlangui ¿nachu? Shinaitimi Bibliamunda yachashca alli noticiacunataca cutishuccunamu parrlasha ningui. Bibliata mas yachesha catishaca cutishuccunamumi Bibliaguan Taita Diosmunda parrli pudingui, shamuc funllacunapi pai ima rragrishcatashi yachachi pudingui. Romanos 10:13-15​ta liyi.

Bibliamundaca quiquinpu familiacunamu, amigocunamumi parrli pudingui. Parrleshaca mana fiñarishalla, alli shimicunaguanmi parrlana cangui. Na rrimanachu cangui jambu crishcacunaca na valinchu nisha. Ashtaguanshi Taita Dios shamuc funllacunapi ima rragrishcatami juyiguan parrlana cangui. Paicuna na uyasha nishashi, quiquin imashina comportarishcata rricushami paicunaca Bibliamunda yachasha ningacuna. 2 Timoteo 2:24, 25​ta liyi.

3. Diospu amigo cangapuca ¿imatati rrana cangui?

Bibliata yachesha catishami Taita Diospu ñaupupi alli rricuringui, paipu amigoshi tucungui. Shinami Taita Diosca quiquintaca paipu guagua cuenta rricunga. 2 Corintios 6:18​ta liyi.

4. Ñaupumu cantingapuca ¿imati ayudanga?

Bibliamunda yacheshami catina cangui (Hebreos 5:13, 14). Chipuca shuc testigo de Jehovatami ¿Qué nos enseña la Biblia? libroguan Bibliamunda yachachichun mañana cangui. Bibliamunda mas yachesha catishaca contento, allimi causangui. Salmo 1:1-3 y 73:27, 28​ta liyi.

Bibliapi tiyishca alli noticiacunaca Taita Diosmundami shamun. Diosta cazuccunaguan tandanacushami paicuna cuenta Taita Diospumu juchuyangui (Hebreos 10:24, 25). Tuqui shunguguan Taita Diospu mandashcacunata factachishami mana guañushalla para siempre causita chari pudingui. Taita Diospumu juchuyanami achca valishca can. 1 Timoteo 1:11 y 6:19​ta liyi.