PARTE 5

Noepu funllacunapica ¿picunati Diosta cazurca?

Noepu funllacunapica, gentecunaca mana allicunallatami rradorr carca. Génesis 6:5

Milli, mana alli angelcunaca gente shina tucushami guarmicunandi cazararca

Adan y Eva guaguacunata charicpimi, cai allpapica achca gentecuna tiyimu callarirca. Chi jipaca, guaquin angelcunaca Diablopu lado tucushami, Diospu contra tucurca.

Chi angelcunaca, cai allpapi guarmicunaguan cazarasha nishami, gente shina tucusha cai allpamu shamurca. Chi angelcunapu churicunaca cutishuc gentecunatashi jatun, milli, manchanaicunami carca.

Shuc jari guambraca, llullu guaguata marqueshca guarmita macacun, nefilimcuna, milli, mana alli angelcunapu guaguacuna, mana alli tratancuna

Tuqui allpapica milli gentecunallami tiyimu callarirca. Bibliapi nishca shinaca, tuqui gentecunami na allicunallata rradorr carca. Imata yuyeshashi mana allita rranallapi yuyadorr carca.

Taita Diosta cazushami, Noeca yacu jaguata rrinalla, jatun cajata rrarca. Génesis 6:13, 14, 18, 19, 22

Noeca alli runami carca. Paimuca Jehova Diosca nircami, allpa pambaringacama manchanaita tamiachisha, tuqui milli gentecunata tucuchigrini nisha.

Noe paipu familiandi jatun cajata rracun

Shinaiti Noemuca nircami, yacu jaguata rrinalla, jatun caspi cajata rrana cangui. Chipica janbu familiata, tuqui laya animolcunatashi yaicuchina cangui nirca.

Noeca manchanai tamia shamugrin nisha gentecunamu güillacun. Pero paicunaca Noemunda asincunami

Manchanai tamia shamugrin nisha Noe güillacpica, gentecunaca na cazurcacunachu. Chipu rrandica, guaquin gentecunaca asirca, burrlarirca. Cutishuccunacari Noetaca na rricunayachircachu.

Noe paipu familiashi arcamu yaicungapu animolcunata tandachicun

Jatun cajata ña tucuchishaca, Noeca tuqui laya animolcunata yaicuchirca.