Bibliaca religioncunamundaca ¿imatati nin?

1. ¿Tuqui religioncunachu alli can?

Tuqui religiocunapimi alli shunguta charic gentecuna tiyan. Taita Diosca chi gentecunata llaquishcamunda, precuparishcamundami ayudasha nin. Guaquin religioncunaca na alli cosascunatami rrashcacuna (2 Corintios 4:3, 4; 11:13-15). Noticiacunapica guaquin religioncunaca guerracunapi, terrorismopi, guañuchinacunapi, guaguacunata llaquichinapi satirishcacunatami uyanchi. Cai cosascunata rricushami achca gentecunaca religioncunamundaca na yachasha nincuna. Mateo 24:3-5, 11, 12​ta liyi.

Alli religionca Taita Diospu shutitami jatunyachin, cutin panda religioncunaca llullacunata yachachishami Taita Diospu shutita mapayachincuna. Paicunaca Bibliapi yachachishca shinaca na yachachincunachu. Taita Diosmunda, guañushcacunamundashi panda yuyicunatami yachachincuna. Chimundami Taita Diosca Bibliapi ima nishcata yachachun munan. Ezequiel 18:4 y 1 Timoteo 2:3-5​ta liyi.

2. Bibiaca religioncunamundaca ¿imatati nin?

Guaquin religioncunaca Taita Diosta juyanchi nincunami. Shinashi paicunaca cai mundopu mana alli cosascunatami juyancuna (Santiago 4:4). Noepu funllacuna jipami Babilonia llactapi panda religiocunaca tiyimu callarirca. Chimundami Bibliapica tuqui cai panda religioncunataca Babilonia jatun pueblo nisha shutichin. Taita Diosca ñallami gentecunata pandachic, llaquichic religioncunata tucuchinga. Revelación (Apocalipsis) 17:1, 2, 5, 16, 17 y 18:8​ta liyi.

Taita Diosca panda religioncunapi alli shunguta charic gentecunataca na cungarishcachu. Chimundami Taita Diosca chi gentecunataca paipu Shimita yachachisha tandachicun. Miqueas 4:2, 5​ta liyi.

3. Alli shunguta charic gentecunaca ¿imatati rrana can?

Jehova Diosca Bibliata yachasha niccunamunda, allita rrasha niccunamundaca precuparinmi. Chimi paica panda religioncunamunda utca llucshichun munan. Taita Diosta tuqui shunguguan juyishaca na alli cosascunata, na alli costumbrecunata saquingapumi munangacuna. Revelación 18:4​ta liyi.

Jesus guañushca jipaca alli shunguta charic gentecunami apostolcunapu yachachishcacunata alli chasquircacuna. Taita Diosca paicunamuca contento, maravillata causachunmi yachachirca. Ñucunchishi paicuna cuentami Bibliamunda yachana canchi. Shina rreshami Taita Diosta primer lugarpi churashcata rricuchishun. 1 Tesalonicenses 1:8, 9 y 2:13​ta liyi.

Panda religioncunamunda llucshisha, paita juyimu callaricpica Taita Diosca contentomi chasquin. Shinami paicunaca Taita Diospu amigo tucuncuna, tuquicunapurami guauquindi panindi cuenta juyanacuncuna. Shinaiti paicunaca shamuc funllacunapi mana guañushalla para siempre causita chari pudincuna. Quiquinca ¿shina causasha ninguichu? Marcos 10:29, 30 y 2 Corintios 6:17, 18​ta liyi.

4. Taita Diosca gentecuna tranquilo, alli causachunca ¿imatashi rranga?

Taita Diosca tuqui panda religioncunatami tucuchinga. Shinami tuquicuna tranquilo, alli causashun. Cai panda religioncunaca ña mana gentecunata pandachingachu. Chipica tuquicunami Taita Diosllata cazungacuna. Caica ¿nachu shuc alli noticia can? Revelación 18:20, 21 y 21:3, 4​ta liyi.