Alli religiontaca ¿imashinati rricsi pudinchi?

1. ¿Mashna alli religioncunati tiyan?

Jesusca paipu caticcunaguanca shuc solo alli religiontami catircacuna. Jesusca cai religiontaca mana guañushalla para siempre causana apac ñanguanmi compararca. Cai ñantaca ashalla gentecunami tarin nirca (Mateo 7:14). Taita Diosca Bibliapi mandashca shina cazucllapimi alli rricun. Chita rrashami tuquicuna shuc solo cuenta Taita Diostaca cazui pudishun. Juan 4:23, 24; 14:6 y Efesios 4:4, 5​ta liyi.

Cai uchilla peliculata rricui: Taita Diosca ¿tuqui religioncunatachu chasquin?

2. Jesusca mana alli caticunamundaca ¿imatati nirca?

Jesusca llullesha yachachiccunami alli caticcunata pandachingacuna nirca. Caicunaca Jesusta catinchi, Bibliatami yachachinchi nishami llullacunaguan gentecunata pandachin. Taita Diosta alli caticcunataca paicuna imashina puricushcata rricusha, ima rrashcata rricushami alli caticcuna o mana alli caticcuna cashcata yachi pudinchi. Mateo 7:13-23​ta liyi.

3. Taita Diosta alli caticcunataca ¿imashinati rricsi pudinchi?

Pichca yuyicunata rricushun:

• Biblia Taita Diospu Palabra cashcatami crincuna. Gentecunapu nishcata cazungapu rrandica Biblia nishcatami tuqui shunguguan cazuncuna (Mateo 15:7-9). Shinaiti gentecunamu yachachishcatami paicunapu causipi factachincuna. Juan 17:17 y 2 Timoteo 3:16, 17​ta liyi.

• 

  Taita Diospu shutitami jatunyachincuna. Jesus, Taita Diospu shutita gentecunamu yachachishami Taita Diospu shutita jatunyachirca. Chimundami gentecunamuca Taita Diosta mañeshaca jambu shuti jatunyachishca cachun nisha mañanguichi nirca (Mateo 6:9). Quiquin causashca ladopica ¿piti Taita Diospu shutimunda yachachin? Juan 17:26 y Romanos 10:13, 14​ta liyi.

• Diospu Reinomundami yachachincuna. Jesus cai allpapi cashaca Diospu Reinomundami pai guañuna funllacama yachachirca. Shinami rricuchirca Diospu Reinolla gentecunapu llaquicunata tucuchi pudishcata (Lucas 4:43; 8:1; 23:42, 43). Jesusca paita caticcunallami Diospu Reinomunda yachachinga nirca. Quiquinpu guasimu Diospu Reinomunda yachachimu chayacpica ¿ima religionshi canga? Mateo 24:14​ta liyi.

• Cai mundopi tiyishca mapa, mana alli cosascunapica na chagrurincunachu. Jesusta caticcunaca politicacunapi, parocunapi na chagrurincunachu (Juan 17:16; 18:36). Shinaiti cai mundopu na alli cosascunataca na rrancunachu. Santiago 4:4​ta liyi.

• Paicunapuraca achcatami juyanacuncuna. Bibliata yachashcamundami Jesusta caticcunaca: Yanacunata, gringocunata, rrunacunata, mishucunata tuqui laya gentecunata juyancuna. Panda, mana alli religiocunaca guerracunapimi chagrurin. Cutin alli religionta caticcunaca na chipi chagrurincunachu (Miqueas 4:1-3). Alli religionta caticcunaca paicunapu tiempota llucchisha, cullquita gashteshami cutishuccunata ayudancuna. Juan 13:34, 35 y 1 Juan 4:20​ta liyi.

4. Majin alli religion cashcata ¿ñachu yachi pudingui?

¿Majin religionti Bibliamunda yachachin? ¿Majin religionti Taita Diospu shutita jatunyachin? ¿Majin religionti Taita Diospu Reinomundashi güillan? Shinaiti ¿majin religionti tuquicunapura juyanacun, guerracunapishi na chagrurincuna? Quiquinca ¿imatati yuyangui? 1 Juan 3:10-12​ta liyi.