PARTE 8

Jesusca ¿imamundati guañurca?

Jesus guañushcamundami ñucunchicunaca mana guañushalla, uni unita causi pudishun. Juan 3:16

Shuc guarmicunaca Jesus guañushca utcu chushic queshcata rricucun

Jesus guañushca quimsa funllacuna jipaca, shuc guarmicunaca Jesusta pambashca pushtupi rricuimu rrirca. Shinashi chi pushtuca chushicmi carca. Jehova Diosmi Jesusta causachishcarca.

Jesusca paipu apostolcunamu rricurin, jipaca jagua cielomu rrin

Jipamuca, paindi siempre puric apostolcunamumi Jesusca rricurirca.

Jipaca, jagua cielomu Jesus rrictami paipu caticcunaca rricurca. Shinashi Jehova Diosca, Jesustaca mana aichaguan, tulluguanchu causachirca. Angelcunapu laya, na rricunalla mushuc cuerpoguanmi causachirca. Cununca Jesusca achca poderrtami charin. Paica nunca na guañungachu.

Jesusta causachishami, Jehova Diosca paipu gobiernopi rey cachun churarca. Daniel 7:13, 14

Jesusca, jagua cielopi mandana pushtumundami alaja, maravilla allpapi cac gentecunata mandacun

Jesus guañushcamundami, Jehova Diosca ñucunchi juchacunata perdonan, guañuimundashi salvan (Mateo 20:28). Shinaiti, Jesusmundami Taita Diosca mana guañushalla, uni uni causita ñucunchimu cui pudin.

Jehova Diosca, cielomunda cai allpata mandachunmi Jesusta agllarca. Jesusca na paillachu mandanga. Jehova Diosta cazuc 144 mil gentecuna causarishami, Jesusguan jagua cielopi mandangapu rringacuna. Chi alli gobiernoca, Diospu gobiernomi can (Revelación o Apocalipsis 14:1-3).

Chi gobiernomi tuqui cai allpataca alaja, maravillata rranga. Guerracuna, shuacuna illangami. Ni pi na pobre causangachu, yariquishi tucuringami. Gentecunaca contento, maravillatami causangacuna (Salmo 145:16).