Taita Diosta cazuccunaca ¿imamundati shuc solo cuenta cana can?

1. Taita Diosca ¿imamundati ñaupa Israel llactata agllarca?

Taita Diosca Abrahanpu guagua guaguacunatami paipu llacta cachun agllarca. Paicunamuca guaquin leycunatami curca. Cai llactataca Israel nishami shutichirca. Paicunallami Diospu Shimita alli yachashcamunda Taita Diostaca tuquipi alli cazurcacuna (Salmo 147:19, 20). Shinami tuqui llactacunamunda gentecunaca alli causi pudircacuna. Génesis 22:18​ta liyi.

Taita Diosca israelitacunataca paipu güillaccuna o testigocuna cachunmi agllarca. Ñucunchica israelitacunapu causita rricushami Taita Diospu leycunata cazuna alli cashcata yachanchi (Deuteronomio 4:6). Israelitacunamundami cutishuc llactacunashi Jehova Diosmunda yachi pudircacuna. Isaías 43:10, 12​ta liyi.

2. Jesusta caticcunaca ¿imamundati shuc solo cuenta canchi?

Israel llacta Taita Diospu agllashca llacta queshashi paitaca na cazurcacunachu. Chimundami Taita Diosca Jesusta alli caticcunata paipu llacta cachun agllarca (Mateo 21:43; 23:37, 38). Cunun funllacunapica Jesusta alli caticcunami Taita Diosta cazushcamunda paipu llacta can. Hechos 15:14, 17​ta liyi.

Jesusca paipu caticcunamuca mundo enteropi güillachun, yachachichunmi mandarca (Mateo 10:7, 11; 24:14; 28:19, 20). Chimundami tucuri funllacunapi cashcamunda Jesuspu caticcunaca mundo enteropi Taita Diosmunda yachachicun. Shinami Jehova Diosca tuqui ladocunamunda achca guaranga gentecunata alli religionpi canchun tandachicun (Revelación [Apocalipsis] 7:9, 10). Jesusta alli caticcunaca shuc solo cuenta cashcamundami juyanacusha, ayudarisha causancuna. Tandanacuicunapishi mundo enteropimi chillatati Bibliamunda yachancuna. Hebreos 10:24, 25​ta liyi.

3. Testigo de Jehovacunaca ¿imashinati cunun funllacunapi tiyimu callarirca?

1870 guatacunapimi tiyimu callarirca. Chi guatapica shuc uchilla grupo Bibliata liyisha fichi fichi intindimu callarircacuna. Paicunataca estudiantes de la Biblia nishami rricsircacuna. Jesus paipu caticcunata güillachun mandashcata intindishami, paicunaca mundo enteropi Diospu Reinomunda güillimu callarircacuna. Chimundami paicunataca 1931 guatapica testigo de Jehova nisha rricsimu callarircacuna. Hechos 1:8; 2:1, 4, 11; 5:42​ta liyi.

4. Testigo de Jehovacunaca ¿imashinati shuc solo cuenta Taita Diosta sirvincuna?

Apostolcunapu funllacunapimi guaquin guauquicunaca congregacioncunata ñaupumu pushesha ayudarcacuna. Cai guauquicunaca Jesus congregacionpu uma cashcatami intindircacuna (Hechos 16:4, 5). Shinaitimi cunun funllacunapishi Taita Diosta achca guatacunata sirvic guauquicunami testigo de Jehovacunata ñaupumu pushan. Paicuna achca experienciata charishcamundami mundo enteropi tiyac sucursalcunata rricusha ayudan. Cai sucursalcunapimi Bibliamunda japishca librocunata, revistacunata mas de 600 shimicunamu traducin, imprimin, cutishuc gentecunamushi cachan. Shinaiti cai guauquicunaca Bibliaguanmi mas de 100 mil congregacioncunatashi ayudan. Cai congregacioncunapishi ñaupumu pushac guauquicunami tiyan. Cai guauquicunami michiccuna cuenta juyiguan cutishuc guauquicunata cuidan. 1 Pedro 5:2, 3​ta liyi.

Testigo de Jehovacunaca gentecunamu Bibliamunda güillangapu, Jesusta alli caticcuna tucuchun ayudangapumi ordenadocuna can. Paicunaca apostolcunapu ejemplota catishami guasin guasin güillancuna (Hechos 20:20). Shinaiti Bibliamunda yachasha niccunamushi yachachincuna. Testigo de Jehovacuna shuc solo familia cuenta cashcamundami rrandi rrandi juyanacuncuna, Taita Diospu juyitashi charincuna (2 Tesalonicenses 1:3). Testigo de Jehovacunaca Taita Diosta cazushcamunda, cutishuccunata ayudashcamundami tuquicunamunda yalli contento causancuna. Salmo 33:12 y Hechos 20:35​ta liyi.