Jueces
16 Uj pʼunchay Sansonqa Gazaman rerqa. Chaypeqa uj khuchi warmita* rikorqa, wasinmantaj yaykorqa. 2 Gaza llajtayojkunataj yacharqanku Sansonqa chay llajtapi kashasqanta. Chayrayku paykunaqa llajtata muyuykorqanku, punkusninta tutantin qhawaspa. Paykunaqa mana chaymanta kuyurerqankuchu, “qʼaya paqarin inti llojsimusqantawan Sansonta wañuchisunchej” nispa.
3 Sansontajrí chaupi tutakamalla chaypi puñorqa. Chantá chay horasta jatarikuspa llajta punkusta orqhorparerqa, iskaynin sayantasnintinta, trancanantinta ima. Lijrariykukuspataj Hebrón chimpapi kashan chay orqo puntaman aparqa.
4 Chay qhepata Sansonqa Sorec mayumanta* Dalila+ sutiyoj warmiwan sonqonta suwachikorqa. 5 Chantá filisteospa kamachejkunasninkoqa Dalilawan parlaj rerqanku, nerqankutaj: “Sansonta chʼaukiyay.*+ Tapuy maymantachus chay jina sumaj kallpan jamusqanta, imaynatachus atipanaykutapis, jinamanta payta wataykunaykupaj. Sapa ujniyku qanman qosqayku 1.100 qolqesta”,* nispa.
6 Chantá Dalilaqa Sansonta nerqa: “Ama jina kaspa willaway ari maymantachus chay jina kallpayki jamusqanta. ¿Imawantaj wataykusunanku kanman mana kacharichikunaykipajri?”, nispa. 7 Sansontaj kuticherqa: “Sichus qanchis joqʼo ankuswan* wataykuwankuman chayqa, kallpayqa pisiyanman, mayqen runaman jinalla tukuyman”, nispa. 8 Chayta yachaspa filisteospa kamachejkunasninkoqa Dalilaman aparqanku qanchis joqʼo ankusta. Dalilataj chaykunawan Sansonta wataykorqa. 9 Filisteosqa ñaupajmantaña pakaykukorqanku Dalilaj ujnin cuartonpi. Dalilataj qhaparerqa: “Sansón, filisteos yaykuykamunku”, nispa. Sansontaj chay ratopacha chay ankusta pʼitirarqa,* imaynatachus lino hilo ninaman chayajtin chay rato pʼitikun ajinata.+ Ajinamanta paykunaqa mana yachayta aterqankuchu maymantachus kallpan jamusqanta.
10 Dalilataj Sansonta nerqa: “Chʼaukiyaykuwasqanki.* Llullaykukuwasqanki. Ama jina kaspa willaway ari, ¿imawantaj wataykusunanku kanmanri?”, nispa. 11 Sansontaj kuticherqa: “Sichus wataykuwankuman mosoj waskhaswan, manaraj pejpa watasqanwan chayqa, kallpayqa pisiyanman, mayqen runaman jinalla tukuyman”, nispa. 12 Chantá Dalilaqa mosoj waskhasta oqharispa Sansonta wataykorqa, qhaparerqataj: “Sansón, filisteos yaykuykamunku”, nispa. Chaypachapis filisteosqa pakaykukullasqankutaj Dalilaj wasinpi. Sansontaj makinpi kasharqa chay waskhastaqa hilosta jina pʼitirarqa.+
13 Chantá Dalilaqa Sansonta nerqa: “Chʼaukiyashallawankipuni, llullakushallawankipuni.+ Nillawayña ari, ¿imawanpunitaj wataykusunanku kamanri?”, nispa. Sansontaj nerqa: “Qanchis sapʼanasniyta* awana qʼaytuswan simpʼaykunawayki kanman”, nispa. 14 Chaymanta Dalilaqa sapʼanasninmanta estacawan pampaman japʼiykuchiytawan qhaparerqa: “Sansón, filisteos yaykuykamunku”, nispa. Sansontaj rijchʼariytawan chay estacata sikʼirparerqa, awanapaj qʼaytustawan khuska.
15 Chantá Dalilaqa nerqa: “¿Imaynatá niwankiman munakuwasqaykita llullakushawaspari?+ Kaytawanqa kinsa kutitaña llullakuwanki, manarajpuni willawankichu maymantachus kallpayki jamusqanta”,+ nispa. 16 Chayta sapa día nisqanwan Sansonpa umanta nanacherqa. Sansontaj wañupullaytaña munarqa.+ 17 Chayrayku mana llullakuspa Dalilaman willarqa: “Mana jaykʼajpis chujchayta kʼutuwarqankuchu, nacekusqaymantapacha* Diospaj tʼaqasqa nazareo* kani.+ Sichus chujchayta kʼutuwankuman chayqa, kallpay chinkanman, mayqen runa jinallataj mana kallpayoj kayman”, nispa.
18 Dalilaqa Sansón mana llullakuspa willasqanta reparaytawankama, filisteospa kamachejkunasninkuta+ wajyacherqa: “Kunanqa jamuychej, kay kuteqa mana llullakuspa Sansón willawan”, nispa. Filisteospa kamachejkunasninkutaj, qolqe aparisqa Dalilaman rerqanku. 19 Dalilaqa Sansonta moqosnin patapi puñurpachiytawan, uj runata wajyarqa qanchis sapʼanasninta kʼutunanpaj. Ajinamanta Dalilaqa Sansonta llauchʼi runaman tukucherqa, Sansontaj mana kallpayojman tukorqa. 20 Chantá Dalilaqa qhaparerqa: “Sansón, filisteos yaykuykamunku”, nispa. Sansontaj rijchʼariytawan sonqonpi nerqa: “Ñaupaj kutispi jina kacharichikusaj”,+ nispa. Jinapis mana yacharqachu Jehová Dios payta saqerparisqanta. 21 Filisteostaj Sansonta japʼispa ñawisninta orqhorarqanku, Gazamantaj aparqanku. Carcelman apaykuspataj cobre cadenaswan japʼiykuchispa molino rumita muyuchicherqanku. 22 Chaywanpis chujchanta kʼutusqankumanta qhepamanqa, Sansonpa chujchanqa watejmanta wiñallarqataj.+
23 Uj pʼunchay filisteospa kamachejkunasninkoqa tantakorqanku diosninku Dagonpaj+ ashkha uywasta wañuchinankupaj, Sansonta japʼisqankumanta kusikunankupaj ima. Nerqankutaj: “¡Enemigonchej Sansontaqa diosninchej makisninchejman jaywaykuwanchej!”, nispa. 24 Chay llajtayoj runasqa chay diosninkuta rikuspa jatuncharqanku, nerqankutaj: “Enemigonchejtaqa diosninchej makisninchejman jaywaykuwanchej. Chay runaqa chajrasninchejta ruphaykucherqa,+ llajta masisninchejtapis ashkhata wañuracherqa”,+ nispa.
25 May kusisqa kasqankurayku paykunaqa nerqanku: “Sansonta orqhomuychej paymanta asikunanchejpaj”, nispa. Jinataj Sansontaqa carcelmanta orqhomorqanku paymanta asikunankupaj, sayaykucherqankutaj wasej machonesnin* chaupiman. 26 Chantá Sansonqa makinmanta pusaykachaj joventa nerqa: “Kay wasej machonesninman chimpaykuchiway, chayman atiykurikunaypaj”, nispa. 27 Chay wasipeqa juntʼa kasharqanku qharis, warmis ima. Filisteospa tukuy kamachejkunasninkupis chayllapitaj kasharqanku. Altos patapi kashallarqankutaj uj 3.000 qharis, warmis ima. Paykunaqa asikuspa Sansonta qhawasharqanku.
28 Chaypacha Sansonqa+ Jehová Diosmanta mañakorqa: “Tukuyta Kamachej Señor Jehová Diosníy, ama jina kaspa noqamanta yuyarikuway ari. Diosníy, ama jina kaspa kay kutillatawanpis kallpata qoway ari,+ ujnin ñawillaymantapis kay filisteoswan pagachikunaypaj”,+ nispa.
29 Chaymanta Sansonqa chay wasita sujetasharqa chay iskay chaupi machonesman makisninta churarqa, ujninman paña makinta, ujninmantaj lloqʼe makinta. 30 Chantá Sansonqa qhaparerqa: “Filisteoswan khuska wañusaj”, nispa. Chaymantaqa chay machonesta tukuy kallpanwan tanqarqa. Chay wasitaj filisteospa kamachejkunasninkoj patankuman urmaykamorqa, tukuy chaypi kajkunaj patankuman.+ Sansón kausashaspa wañuchisqanmanta nisqaqa, astawanraj chay kutipi wañucherqa.+
31 Chay qhepata Sansonpa hermanosnin, tatanpa tukuy familianpiwan ayanta* maskʼaj uraykorqanku. Apakapuspataj pʼampamorqanku Zoramanta+ Estaolman rinapi, tatan Manoahj+ sepulturanpi. Sansonqa 20 watasta Israelpi juez kasqa.+