¿Pitaq kay pachata kamachichkanrí?

May chhika runa juk parlayllawan kutichinku: Dios, nispa. Bibliaqa mana ninchu Jesús, chayri Dios kay pachata kamachichkasqanta. Chayrayku, Jesús nirqa: “Kunanmá kay pachata kamachejqa jawaman wijchʼusqa kanqa”. Nillarqataq: “Kay pachata kamachejqa jamushanña. Payqa contraypi mana imata ruwayta atinchu”, nispa (Juan 12:31; 14:30; 16:11).

Arí, kay pachata kamachiqqa Jesuswan churanakuchkan. ¿Pitaq kanman?

Kay pachapi ñakʼariykuna sutʼinchawanchik

Runaqa allinta kawsakuyta munan, chaywanpis kay pachapiqa ñakʼariy sapa pʼunchay kallanpuni. Chayqa, may chhika runasta tʼukuchin, chayta rikuspa juk yachayniyuq runa, David Lawrence sutiyuq jinata nirqa: “Jallpʼapi mana maqanakuspa kawsay: Yaqha tukuy kay pachapi kaq runasqa, runa masinkupaq allin kaqta munanku. ¿Imaptintaq mana chay rikukunchu? ¿Imaraykutaq maqanakuyta munallankupuni, sunqunkupi mana chay kachkaptinpis?”, nispa nirqa.

Mana entiendenapaqjina, ¿icharí? Runaqa sunqu tiyasqa kawsakuyta munaptinpis, chiqninakun; monte animal jinataq wañuchinakunku. Runa mana khuyakuspa wañuchinakusqanpi tʼukuriy. Runaqa armasta apaykachan runa masinta ñakʼarichinanpaq, mana khuyakuspa wañuchinankama.

Runa allinta kawsakuyta munachkaptin, ¿imaraykutaq chay jinata manchachikunapaqjina maqanakun, wañuchinakun ima? ¿Imataq runata tanqan chayjina saqrata ruwananpaq? ¿Maykʼaqllapis tapurikurqankichu ima saqrataq runata millay ruwaykunaman tanqasqanta?

¿Pikunataq kay pachata kamachichkanku?

Ñuqanchikqa mana iskaychakunchikchu, Bibliaqa sutʼita rikuchin pichus kay pachapi suyusta apaykachachkasqanta; payqa may yachayniyuq, manataq rikunchikchu. Biblia nin: “Kay pachapi kaj chhika runas[qa] Kuraj Supaypa atiynimpi kasqankuta”. Chantá nillantaq: “Pichus sutichasqa Kuraj Supay, Satanás [...] kay pachapi kaj chhika runasta pantachin”, nispa (1 Juan 5:19; Apocalipsis 12:9).

Juk kuti Supayqa, Jesusta urmachinanpaq tukuy suyusta quyta munarqa, Jesustaq mana imatapis kutichirqachu. Chaymanta Biblia willawanchik: “Kuraj Supay pusarqa Jesusta jatun orqo pataman. Chaymantataj tukuy kay pachantimpi kaj llajtasta, qhapaj kapuyninkutawan ima rikuchispa, Jesusta nirqa: Noqa kay tukuy imata qosqayki, qonqorikuspachus yupaychawanki chayqa, nispa. Chaypacha Jesús kuticherqa: Riy kaymanta, Satanás”, nispa (Mateo 4:1, 8-10).

Kaypi tʼukuriy. Satanasqa tukuy kay pachapi kaq llaqtasta, Jesusman qunayarqa. Kay pachata mana kamachichkaptin, ¿Jesusman qunayanmanchu karqa? Mana, Supayqa qhasillata imatapis parlanman karqa. Jesustaq: “mana qampatachu”, nispa kutichinman karqa. Jinamanta ¡Kuraq Supay Satanasqa, kay pachata kamachichkasqanta yachanchik! Chayrayku Biblia payta sutichan, “kay pachamanta dios”, nispa (2 Corintios 4:4). ¿Pitaq chayjina saqraman atiyta qurqa?

Diosqa, juk kʼacha angeltajina payta ruwarqa, Supaytaq Tatanpa atiyninta paypaq munarqa. Diosta mana allin kamachiq kasqanta nispa, kamachiyninwan churanakurqa. Satanasqa katariniqta, Evata chʼawkiyarqa, chayjinamanta Adantawan juchallichirqa, paykunataq Diospa kamachiyninta kasunankumantaqa, Satanaspa kamachisqanta kasurqanku (Génesis 3:1-6; 2 Corintios 11:3). Satanasqa Adanpa tukuy mirayninta, Diosmanta karunchananta nillarqataq. Chayrayku, Diosqa Satanasman tiempota qurqa nisqanta juntʼananpaq; kunankamataq llulla kasqanta rikunchik (Job 1:6-12; 2:1-10).

Kay pachataqa, mana Supayllachu kamachichkan. Manaqa wak angelkuna payman kʼaskarqanku Diospa contrampi uqharikunankupaq. Kaykunataq Satanaspa munayninta ruwanku, supaykuna sutikunku. Chayrayku Biblia cristianosta niwanchik, Kuraq Supay urmachiyta munawaptinchik sinchita sayananchikta: “Noqanchejqa mana runaswanchu maqanakushanchej, manachayqa [...], patapi kaj sajra espirituspa contrampi” (Efesios 6:11, 12).

Saqra espirituswan churanakuy

Kay pachata kamachiq saqra espiritusqa millay ruwaykunawan runata pantachiyta munanku, Diosta mana yupaychanankupaq. Chaypaqqa llulla yachachiykunata apaykachanku, ninkutaq runa wañuptin, alman chayri espiritun mana wañusqanta, Biblia sutʼita rikuchisqamanjinataqri, runa wañuptinqa mana imanpis kawsaspa qhipakunchu (Génesis 2:17; 3:19; Salmo 146:3, 4; Eclesiastés 9:5, 10). Supaykunaqa layqasniqta wañusqakunap parlayninta yachapayanku, familianku mana wañusqankuta creenanpaq. Chay parlayqa wañuqpa parlayninjina uyarikun, chaywanpis supaykunalla parlanku.

Chay parlayta uyarispa ama chʼawkiyachikuychu. Nisqanta ama uyarillaypischu, Jesusjina kutichiy: ¡Riy kaymanta Satanás!, nispa (Mateo 4:10; Santiago 4:7). Ama layqasman riyta munasqaykiwan atipachikuychu, chay ruwayqa, saqra espiritusllaman apasunkiman. Diosqa payta yupaychaqkunaman, tukuy kay ruwaykunamanta jarkʼakunankuta nin. Bibliaqa juchachan adivinosta, layqasta, yatirista, wañusqasta tapuqkunatapis (Deuteronomio 18:10-12; Gálatas 5:19-21; Apocalipsis 21:8).

Kuraq Supay runata layqasniqta apaykachasqanrayku, mana chay ruwaykunawan chʼawkiyachikunaykichu tiyan. Yachayta munachkaspapis ama chaywan apachikuychu. Runaqa tʼuqluwan adivinaqkunata, cocata qhawaqkunata, makita qhawaqkunata, qʼuwaqkunata, aysirikunata ima. Chantapis, supaykunaqa wakin wasispi imatapis ruwanku, uyarichinku ima, runata creechinankupaq.

Chantapis kay saqra espiritusqa runa juchasapa kasqanta yachaspa, runaniqta millay librosta, videosta, telepi qhawanasta ima, imaymana millay khuchichakuykunata rikuchinku. Supaykunaqa yachanku, chayta qhawaptinchik umanchikpi qhipakunanta, saphichakuspataq paykunatajina millay ruwaykunaman tanqanawanchikta (Génesis 6:1, 2; 1 Tesalonicenses 4:3-8; Judas 6).

Saqra espíritus kay pachata apaykachasqankumanta yachaspa, ichapis may chhika runasqa asikunkuman. Chay yuyayqa mana tʼukuchinawanchikchu tiyan. Biblia jinata chaymanta sutʼinchan: “Satanasqa tukurin kʼanchaq angelman”, nispa (2 Corintios 11:14). Supayqa runata chʼawkiyan, pay mana kawsasqanta yuyanankupaq. Ama chʼawkiyachikuychu. Kuraq Supay, supayninkunawan kawsankupuni, chayrayku churanakullananchikpuni tiyan (1 Pedro 5:8, 9).

Kusikunapaq, ¡tumpamantawan Satanás, supaykuna ima chinkanqanku! Biblia niwanchik: “Kay pachaqa [Satanás supayninkuna ima] tukukapushan [...]; Diospa munayninta ruwajri, wiñaypaj kawsanqa”, nispa (1 Juan 2:17). ¡Paykuna chinkaptinku mayta kusikusunchik! Chayrayku Diospa munayninta ruwaqkunawan qutuchakunanchik tiyan, kay pachapi kusisqas wiñay wiñaypaq kawsanapaq (Salmo 37:9-11, 29; 2 Pedro 3:13; Apocalipsis 21:3, 4).

Tukuy Bibliamanta rimaykunaqa, “Diosmanta Qhelqasqa” Bibliamanta urqhukun.

[4 paginapi dibujo/foto]

¿Satanás Jesusman qunayanmanchu karqa kay pachapi suyusta mana paypata kaptin?