Diosqa allinta kausakunanchejta munan

NOTICIASPEQA llakiy willaykunallata uyarinchej: guerras kasqanta, runas wañuchinakusqankuta, imaymana sajra imastataj ruwasqankuta. Ichá qanpis llakisqa kashanki onqoykusqaykirayku chayri mayqen familiarniykipis wañupusqanrayku.

Ajina llakiypi kaspa ichá nisunman:

• ¿Kay jinata kausakunanchejtachu Dios munanman?

• ¿Imataj yanapawasunman llakiypi rikukojtinchej?

• ¿Maykʼajllapis allin kausay kanmanchu?

Bibliaqa tukuy chaykunata sumajta sutʼinchawanchej.

BIBLIAQA NIWANCHEJ DIOSQA ALLIN KAUSAYTA APAMUNANTA

• Manaña sufrisunchu, manaña viejoyasunchu, niñataj wañusunchu (Apocalipsis 21:4).

• “Cojosqa tarukas jina phinkiykachanqanku” (Isaías 35:6).

• “Ciegospis rikuyta atenqanku” (Isaías 35:5).

• Wañusqas kausarimonqanku (Juan 5:28, 29).

• Ni pi onqonqañachu (Isaías 33:24).

• Mikhuna patapi tiyakusun (Salmo 72:16).

  

BIBLIAWAN YANAPACHIKUY

Ichá nisunman, kay ñaupaj paginaspi leesqanchejqa cuentolla kasqanta. Diostajrí niwanchej, chay sumaj imastaqa tumpamantawan ruwanantapuni. Bibliaqa willawanchej imaynatachus Diosninchej chayta ruwananta.

Bibliaqa willallawanchejtaj, kusisqa kausakunapaj imatachus ruwananchejta. Yachanchej jina, ima llakiyninchejpis kanpuni. Ichá llakisqa kashanchej qolqenchej pisiyasqanmanta, familianchejmanta, onqosqa kashasqanchejmanta, chayri pininchejpis wañupusqanmanta. Bibliaqa chay llakiykunata atipanapaj yanapawanchej. Kay tapuykunaman kutichisqantaj sonqochawanchej:

• ¿Imaraykú runa ñakʼarinchej?

• ¿Imatá ruwasunman ima llakiypipis rikukuspa?

• ¿Familianchejwan kusisqa kausakuyta atisunmanchu?

• ¿Maymantaj wañuspa ripunchej?

• ¿Maykʼajllapis wañusqa familiaresninchejwan tinkukapusunmanchu?

• ¿Diosqa imatachus nisqanta juntʼanqachu?

Kay libroqa Bibliaj nisqanta sumajta entiendenapaj yanapawasun. Chayrayku may allinpuni kay librowan yachakunanchejqa. Sapa paginaj ura kantitunpi tapuykuna rikhurin, chaytaj Bibliata astawan entiendenapaj yanapawasunchej. Ashkha runasqa Jehovaj testigosninwan Bibliata estudiaspa mayta kusirikunku. Munayku qanpis ajinata kusirikunaykita. Diostaj yanapawasunchej Bibliaj nisqanta entiendenanchejpaj.