Agosto

Tantakuykunapeqa imatachus Jehovawan Jesuswan noqanchejrayku ruwasqankuta sapa kuti yuyarichiwanchej. Noqanchejqa Jehová Diosman may agradecesqa kasqanchejrayku sapa día kallpachakunchej Jesús jina kanapaj (2 Cor. 5:14, 15). Jehová Dios Wawanta qosqanrayku sonqonchej aysawanchej payta jatunchanapaj. Diostaqa jatunchasunman tantakuykunapi sonqomantapacha comentaspa. Jehová Diosta, Jesusta ima mayta munakusqanchejta rikuchisunman tukuy imata paykunarayku ruwaspa. Ichapis tantakuykunasninchejman rinapaj mayta kallpachakushanchej. Wakinpataqa semanapi tantakuykunasninchej ichapis trabajonchej pasayta qallarin. Chaynejta ichapis may saykʼusqa kashasunman. Chantapis sabadosta chayri domingosta samariyta munaspapis tantakuyninchejman rinchej. Saykʼusqa kaspapis tantakuykunaman risqanchejqa mana qhasichu, imaraykuchus Jehová Diosqa yachan mayta kallpachakushasqanchejta. Chantapis tantakuykunaman rinanchejpaj tukuy atisqanchejta kallpachakuspaqa, Jehová Diosta mayta munakusqanchejta rikuchisunchej. Jehová Diostaj chayta mana qonqanqachu (Mar. 12:41-44). w19.01 pág. 29 párrs. 12, 13

Jesusqa waj runas jinallataj llakiypi kausayta yacharqa. Jallpʼapi kashaspa, payqa wajcha familiapisina wiñakorqa. Tatan Joseqa carpintero karqa. Chayrayku Jesusqa jumpʼi suruyta llankʼayta yacharqa (Mat. 13:55; Mar. 6:3). Chantapis tatan José wañupojtin, maytachá sonqon nanarqa. Imaraykuchus Joseqa, Jesús niraj Diosmanta predicayta qallarishajtinsina wañuporqa. Payqa yachallarqataj, mana kikinta creej familiareswan kausayta (Juan 7:5). Tukuy chay imasqa, Jesusta yanaparqa runaspa problemasninkuta entiendenanpaj. Jesuspa khuyakuynenqa milagrosninpi rikukorqa. Payqa runasta sufrishajta rikuspa, sonqonta nanachikoj. Paykunamanta khuyakusqanraykutaj milagrosta ruwarqa, nitaj tanqasqa jinachu (Mat. 20:29-34; Mar. 1:40-42). Jesusqa chay runasmanta sonqonta nanachikusqanrayku, paykunata yanaparqa (Mar. 7:32-35; Luc. 7:12-15). w19.03 pág. 16 párrs. 10, 11

Jesús wañuchisqa kananpaj uj chʼisillaña faltashajtin Jesusqa llakisqa kasharqa. Jesusqa tukuy runasrayku kausayninta qonanta yacharqa. Chaywanpis phutisqachá kasharqa wañupunankama Diosta kasukuyta atinanmantachus manachus (Rom. 5:18, 19). Phutikullarqatajchá ruwasqasninwan Tatanta jatunchananmanta. Imaraykuchus paymanta kasharqa Tatan jatunchasqa kananqa chayri pisipaj qhawasqa kananqa (Job 2:4). Ajina phutisqa kashajtin chay chʼisi Jesuspa apostolesnenqa, “sinchʼita siminakuyta qallarerqanku, pichus paykunamanta kurajpaj qhawasqa kananmanta”. Chaywanpis Jesusqa mana paykunapaj phiñakorqachu. Astawanpis apostolesninman munakuywan sutʼincharqa ama kurajpaj qhawasqa kayta maskʼanankuta. Chantá apostolesninta kallpachananpaj nerqa: “Tukuy ima qhatirishawajtinpis noqallawanpuni karqankichej”, nispa (Luc. 22:24-28; Juan 13:1-5, 12-15). Jesusmanta yachakunchej phutisqa kashaspa mana phiñakunachu kasqanta. Tukuyninchej wajkunata phiñachinapaj jina parlanchej chayri ruwanchej. Chayta yuyarikusunchej chayqa, wajkunata aguantayta atillasunchej (Pro. 12:18; Sant. 3:2, 5). Chantapis wajkunata “allinta ruwanki” nisunman allin imasta ruwasqankumanta (Efe. 4:29). w19.02 págs. 11, 12 párrs. 16, 17

Leyqa mana saqejchu uj runa qhasimanta juchachasqa kaspa castigasqa kananta. Qhasimanta juchachasqa runaqa derechoyoj karqa pichus juchachashasqanta yachananpaj (Deu. 19:16-19; 25:1). Chantapis chay runa juchayojpunichus manachus kasqanta ninankupajqa, iskay testigosllapis kananpuni karqa (Deu. 17:6; 19:15). Chaywanpis uj runa juchallikusqanmanta uj testigolla kajtenqa, juchachakoj runaqa mana yuyananchu karqa castigomanta librakusqanta. Imaraykuchus Jehová Diosqa chay runaj juchanta yacharqa. Jehová Dios cheqan kajtapuni ruwasqanta. Diosqa bendecin paymanta mana karunchakojkunata, paypa kamachiykunasninta kasukojkunatapis. Chaywanpis castigan cargonkuman atienekuspa munayninkuman jina ruwajkunata (2 Sam. 22:21-23; Eze. 9:9, 10). Wakinkunaqa sajra imasta ruwajtinkupis ichá mana castigasqachu kankuman. Chaywanpis Jehová Diosqa paykunata maychus tiemponpi juzganqa (Pro. 28:13). Chantapis paykuna mana pesachikojtinkoqa, reparanqanku “kausaj Diospa makisninman urmayqa, manchariywan kharkatitinapaj jinapuni” kasqanta (Heb. 10:30, 31). w19.02 págs. 23, 24 párrs. 20, 21

Moisesqa Jehová Diosta tapukojpuni munayninman jina imatapis ruwananpaj. Moisesmanta parlaspa Biblia nin: “Payqa sinchʼita sayallarqapuni, mana rikukoj Diosta rikushanmanpis jina”, nispa (Heb. 11:24-27). Israelitasqa Egiptomanta ayqekusqankumanta casi iskay killasninman Moisespa contranpi thutorqanku. Paykunaqa niraj Sinaí Orqoman chayashaspa, mayta phiñakuspa yaku mana kasqanmanta quejakorqanku. Moisestaj Jehová Diosman qhaparikorqa: “Imanasajtaj kay runaswanri? Pisimantawanqa rumiswan chʼanqaspachá wañuchiwanqanku ari”, nispa (Éxo. 17:4). Jehová Diostaj Moisesman nerqa: ‘Horeb chhankata tojnuykiwan wajtanki, yakutaj chaymanta phullchimonqa’, nispa. Moisestaj “chayta ruwarqa israelitaspa kurajkunanku qhawashajtinku”. Jinamantataj israelitasqa sajsanankukama yakuta ujyarqanku (Éxo. 17:5, 6). w18.07 pág. 13 párrs. 4, 5

Jehová Diosqa hermanosnejta kallpachawanchej. Hermanosninchejta munakuspaqa, Jehová Diosta munakusqanchejta rikuchinchej. Chantapis hermanosninchejta yanaparinchej Jehová Dios paykunata mayta munakusqanta reparanankupaj (1 Juan 4:19-21). Apóstol Pablo nerqa: “Qankunapura sonqochanakullaychejpuni, kallpachanakuychejtaj, imaynatachus ruwashankichej, ajinata”, nispa (1 Tes. 5:11). Hermanosninchejtaqa mana ancianosllachu sonqochankuman, kallpachankumantaj. Manachayqa sapa ujninchej Jehová Dios jina, Jesús jinataj hermanosninchejta kallpachayta atinchej (Rom. 15:1, 2). Wakin hermanosqa llakisqalla kasqankurayku chayri depresión onqoywan kasqankurayku uj sumaj doctorwan jampichikuyta necesitankuman (Luc. 5:31). Chaywanpis congregacionmanta ancianos, hermanos imaqa mana doctores kaspapis, llakisqa hermanosta sonqochankuman, yanapankumantaj. Chayrayku Biblia niwanchej llakisqa kajkunata sonqochananchejta, llauchhiyajkunata yanapananchejta, tukuypajtaj pacienciayoj kananchejta (1 Tes. 5:14). w18.09 págs. 14, 15 párrs. 10, 11

Jehová Diospi tukuy sonqo atienekunapajqa, payta sumajta rejsinanchej tiyan. Paytataj sumajta rejsisunman Bibliata leespa, leesqanchejpitaj tʼukurispa. Bibliaqa willawanchej imaynatachus Jehová Dios ñaupa tiempopi llajtanta jarkʼasqanta. Chaykunata yachaspaqa Jehová Dios jarkʼanawanchejpi tukuy sonqo atienekusunchej. Isaiasqa Jehová Diosta uj michejwan kikincharqa. Isaías, Jehová Diosmanta nerqa: “Corderosta makisninwan marqʼarikonqa”, nispa (Isa. 40:11). Sonqonchej tiyaykojtin, manataj imamantapis manchachikojtinchejqa, reparanchej Jehová Dios marqʼarikuwasqanchejta. Chayrayku mana llakiyninchejwan atipachikunapajqa, kay diapaj ajllasqa versiculopi tʼukurina. Ajinamanta ima problemaspi rikukuspapis mana llakiywan atipachikusunchu. w19.01 pág. 7 párrs. 17, 18

Wakin jovenesqa ichapis kallpachakushanku Bibliata sapa día leenankupaj chayri reunionespi sumajta comentanankupaj chayri partenkuta sumajta ruwanankupaj manachayrí sumajta predicanankupaj. Jovenesqa congregacionpi ñauparispa mayta kusikunku. Kusikullankutaj wajkuna “sumajta ñauparishanki” nejtinku. Jovenesqa ñauparispa Diospa munayninta ruwashanku, imaynatachus Jesuspis Diospa munayninta ruwarqa, ajinata (Pro. 27:11). Jovenesqa Jehová Diosta astawan sirvinankupaj kallpachakojtinku, aswan kusisqas kanqanku, reparanqankutaj ruwasqasninku mana qhasipajchu kasqanta. Apóstol Pablo nerqa: “Sinchʼita sayaychej, mana kuyurispa. Señorpa ruwayninpi ashkhata llankʼallaychejpuni, yachaspa Señorpaj llankʼasqaykichejqa, mana qhasipajchu kasqanta”, nispa (1 Cor. 15:58). Kay mundopi qhapajyayta chayri may rejsisqa kayta maskʼajkunaqa, mana kusisqachu kanku. Kay mundopi tukuy imayoj kaspapis phutisqallapuni kanku (Luc. 9:25). w18.12 pág. 22 párrs. 12, 13

David nisharqa aswan qhepaman jallpʼantinmanta tukuy runas Diospa kamachiykunasninta kasukunankuta (2 Ped. 3:13). Chantapis Biblia niwanchej: “Ayllusneyqa sachʼas jina kawsanqanku”, nispa (Isa. 65:22). Kay versiculoqa reparachiwanchej Jehová Diosta sirvej runas wiñay wiñaypaj kausanankuta. Chaytaj juntʼakonqapuni. Imaraykuchus Apocalipsis 21:1-4 versiculospi nin mosoj jallpʼapi manaña wañuy kananta, Diostaj runasta bendecinanta. Reparanchej jina Bibliaqa sutʼita niwanchej watejmanta kay jallpʼapi uj Paraíso kananta, imaynatachus qallariypi uj Paraíso karqa, ajinata. Chantapis Jehová Dios nerqa tukuy runasta bendecinanta. Davidnejtapis nerqa cheqan runaswan llampʼu sonqoswan kay Jallpʼata herenciankupaj japʼinankuta, chaypitaj wiñaypaj kausakunankuta (Sal. 37:11). Chantapis Isaiaspa nisqasnenqa, reparachiwanchej kay jallpʼa Paraisoman tukojtin may sumajtapuni kausakunanchejta (Isa. 11:6-9; 35:5-10; 65:21-23). Chaypiraj imatachus Jesús suwa runaman nisqan juntʼakonqa (Luc. 23:43). Tukuypis chay Paraisopi tiyakuyta atisunchej. w18.12 pág. 7 párrs. 22, 23

Runasmantaqa mana tʼaqasqata tʼaqakuyta atisunmanchu, chayrayku imaynamantapis sajra imasta uyarisunpuni (1 Cor. 5:9, 10). Predicacionpipis llulla yachachiykunata, llulla creenciastapis uyarinchej. Chay jina llulla yachachiykunata uyarispaqa, kallpachakunanchej tiyan mana chaykunapi yuyanallapajpuni. Llulla yachachiykuna Satanasmanta jamusqanrayku Señorninchej Jesús jina usqhayllata chay yachachiykunata qhesachananchej tiyan. Kunantaj qhawarinachej imastachus ruwananchej kasqanta mana kay tiempomanta runas jina yuyananchejpaj. Mana kay mundomanta runas jina yuyananchejpajqa, mana pillawanpis masichakunanchejchu tiyan. Bibliapis niwanchej mana allinta purejkunawan tantakojtinchejqa pierdekunanchejta (Pro. 13:20; 1 Cor. 15:12, 32, 33). Imajtinchus wakin imasqa juntʼa kashan maqanakuymanta, millay kausaymanta ima. Tukuy chaykunata qhesachananchej tiyan, imaraykuchus chaykunaqa “Diosmanta yachakuyta jarkʼaj” yuyaykuna kanku (2 Cor. 10:5). w18.11 pág. 21 párrs. 16, 17

Jehová Diosninchejmanta mana karunchakunapajqa, Bibliamanta tukuy atisqanchejta runasman yachachinanchej tiyan. Diospa Palabranqa espadawan ninakun. Unay tiempomanta soldadosqa espadanku japʼirisqapuni purej kanku, noqanchejpis Diospa Palabranta espadata jina makinchejpi japʼinanchej tiyan (Efe. 6:17). Diospa Palabranta japʼishasqanchejta rikuchisunman ‘cheqa kaj palabrata maychus kajta yachachispa’ (2 Tim. 2:15). Bibliamanta runasman yachachispaqa, astawan Bibliata rejsinchej, entiendenchejtaj. Bibliata entiendespataj mana Jehová Diosninchejmanta karunchakuyta yuyallasunpischu. Diospa Palabranpi cheqa kajta rejsisqanchejmanta mayta kusikunchej. Imaraykuchus Bibliata entiendeyqa, astawan Jehová Diosman qayllaykuchiwanchej. Chaytaj ni imawan kikinchakunchu. Jehová Diosninchejqa ashkhataña yachachiwanchej, chaytaj tukuy yachayninmanta kantullan. Chayrayku Jehová Diosqa yachachillawasunpuni. Bibliamanta yachakusqanchejta may valorniyoj perlasta jina qhawananchej tiyan. Chayrayku “cheqa kajta” yachakunapaj kallpachakunallapuni, ‘amataj chaymanta kacharikunachu’ (Pro. 23:23). w18.11 pág. 8 párr. 2; pág. 12 párrs. 15-17

Noeqa manaraj Jatun Para chamushajtin runasman nerqa imatachus ruwanankuta salvakunankupaj. Jesucristopis Noej tiemponmanta parlaspa jinata nerqa: “Chay tiempomanta runasqa manaraj Jatun Para chayamushajtin, mikhusharqanku, ujyasharqanku, casarakusharqanku, arcaman Noé yaykunan pʼunchaykama. Paykunaqa mana reparakorqankuchu Jatun Para chayamunankama, tukuyninkutaj chinkachisqa karqanku. Ajinallataj kanqa noqa kutimunay tiempopis”, nispa (Mat. 24:38, 39). Noeqa runas mana uyarejtinkupis, Jehová Diosninchejpa kamachisqanta juntʼallarqapuni Jatun Para chamushasqanta willaspa. Noqanchejqa, Diospa Gobiernonmanta predicamunchej Diosninchej sumaj kausayta qonawanchejta runas yachanankupaj. Jehová Dios jinataj munanchej, predicasqanchejta tukuy runas uyarinankuta ‘kausanallankupajpuni’ (Eze. 18:23). Wasimanta wasi, plazaspi, waj lugarespitaj predicaspaqa, runasta reparachinchej tumpitamantawan Diospa Gobiernon sajra runasta chinkachinanta (Eze. 3:18, 19; Dan. 2:44; Apo. 14:6, 7). w18.05 pág. 19 párrs. 8, 9

Qhawarinachej imatachus ruwananchej kasqanta autoridades qhatiykachawajtinchej. Ichapis paykunaqa tukuy imata hermanosninchejmanta tapuwasunman. Ajinata tapuwajtinchejqa Señorninchej Jesucristo jina ruwananchej tiyan. Jesusqa Romamanta autoridad tapushajtin chʼinlla qhepakorqa (Mat. 27:11-14). Noqanchejpis Jesús jinallataj rikukuspaqa chʼinlla kakunanchej tiyan hermanosninchejta mana imananankupaj (Pro. 10:19; 11:12). Jesusqa sumajta Bibliaj nisqasninta yacharqa. Chayrayku Biblia nin: “Uj tiempoqa tiyan chʼinyanapaj, uj tiempotaj parlanapaj”, nispa (Ecl. 3:1, 7). ¿Imatataj ruwasunman ujnin amigonchej juchallikusqanta yachaspa? Biblia niwanchej: “Cheqanta parlaj testigoqa maychus kajta sutʼinchan”, nispa. Ancianosqa juchallikojpa ruwasqasninta sumajta yachananku tiyan. Ajinallamanta juchallikoj hermanota yanapayta atenqanku, Diosmanta mana karunchakunanpaj (Sant. 5:14, 15). w18.10 pág. 10 párrs. 17, 18

¿Imaynatataj wajkunata sonqochariyta atisunman? Allinta uyarispa (Sant. 1:19). Llakisqa chayri phutisqa hermanosninchejta allinta uyarispaqa, paykunata munakusqanchejta rikuchinchej. Chantapis paykunaj lugarninkupi churakusunman, imaynachus kashasqankutataj kʼachallamanta tapurisunman. Ajinamanta uyanchejpi yachakonqa paykunamanta llakikusqanchejta, paykunata munakusqanchejtapis. Ajinamanta paykunaqa llakiyninkuta chayri phutiyninkuta willariyta atillawasunchej. Willariwajtinchejtaj paykunata sumajta uyarinanchej tiyan, manataj pantachinanchejchu tiyan. Chayta ruwasunchej chayqa sonqocharishajtinchej paykuna uyarillawasunchej. Paykunataj sonqochakonqanku tukuy sonqonchejwan yanapayta munasqanchejta reparaspa. w18.09 pág. 14 párr. 10; pág. 15 párr. 13

Jehová Diosninchejmanta yachakunapajqa tiempochakorqanchej, wakin ruwanasninchejtataj saqeporqanchej (Efe. 5:15, 16, sutʼinchaynin). Por ejemplo, tiempochakorqanchej Jehová Diospa Gobiernonmanta uyarinanchejpaj, Bibliata, publicacionesta ima leenanchejpaj, estudiananchejpaj, tantakuykunaman wakichisqa rinanchejpaj ima. Wakenqa Diosmanta usqhayllata yachakorqanchej, wakinrí unaypi. Chaywanpis yachakushallanchejpuni Jehová Diosninchejpa yachayninmanta, imayna kʼachachus kasqanmanta, ruwasqasninmantapis (Rom. 11:33). Primera vez Torremanta Qhawaj revista ruwakushajtin, ujnin yachaqananpi nerqa uj verdadta yachayqa uj tʼikitata tariywan ninakusqanta. Chay revistapi nerqa: “Ama uj tʼikitallawanqa contentakunachu, arí, ama uj verdadllawanqa contentakunachu. Astawanqa Diospa Palabranta entiendenanchejpaj kallpachakunallapuni”, nispa. Diosmanta yachakuytaqa ni jaykʼaj tukusunchu, paraisopipis paymanta yachakullasunpuni. Chayrayku ama tiemponchejta usuchinachu, astawanqa Jehová Diosninchejmanta yachakunapaj tukuy atisqanchejta kallpachakuna. w18.11 pág. 4 párr. 7

Biblia niwanchej: “Qosas, sapa ujniykichej warmiykichejwan khuska kausakuychej, imaynachus kasqankupi yuyaspa”, nispa (1 Ped. 3:7, sutʼinchaynin). Señoranpi yuyaj qosaqa, mana señoranta pisipajchu qhawan, wakin imaspi mana kikinchu kajtinpis (Gén. 2:18). Chantapis señoranta mana kʼumuykachachinchu, astawanpis respetan, llakiynintapis, phutiynintapis entienden. Señoranpi yuyaj qosaqa, mana waj warmiswan coqueteanchu, manataj munapayanchu (Job 31:1). Nitaj Internetpipis mensajesnejta wajkunawan coqueteanchu, nillataj Internetpi millay imasta qhawanchu. Jehová Diosninchejta mayta munakusqanrayku, sajra kajtataj chejnisqanrayku warmillanta munakun (Sal. 19:14; 97:10). w18.09 pág. 29 párrs. 3, 4

Kay qhepa pʼunchaykunapi runasqa paykunallata munakunku, qolqeta munakunku, may kasqankuta yuyakunku, jatunchakunku, munayninkuwantaj atipachikunku (2 Tim. 3:1-3). Chayrayku noqanchejpis mana llampʼu sonqo kayta atillanchejchu, nitaj Diospa Palabran nisqanman jina kausakuytapis. Noqanchejqa yachanchej kay mundomanta runas jina kausakuy mana allinchu kasqanta. Chaywanpis sajra runasmanta envidiakushasunman kusisqas kausakusqankuta rikuspa (Sal. 37:1; 73:3). Chayrayku ichapis yuyayta qallarisunman: “Qhasillatasina wajkunaj allinninkuta maskʼani. Llampʼu sonqo kajtiy runasqa muñeconkuta jina apaykachawanqanku”, nispa. Kay mundomanta runas jina yuyayta qallarisunman chayqa, hermanos ukhupi tʼaqanakuy kanman. Chaynejtataj runasqa mana reparayta atinkumanchu Jehovaj testigosnin kasqanchejta. Chaywanpis Jehová Diosninchejpa llampʼu sonqo kamachisninmanta yachakuy mayta yanapawasunman. w18.09 pág. 3 párr. 1

Jehová Diosninchejqa manaraj imatapis ruwashaspa sapallan kasharqa. Chaywanpis tukuyman kausayta qowarqanchej jinallataj angelesmanpis. Kusikuyniyoj Dios kasqanraykutaj kusiywan tukuy ima allin kaj regalota qowanchej (1 Tim. 1:11; Sant. 1:17). Jehová Diosninchejqa pay jina kusikunanchejta munasqanrayku, qorikuyta yachachiwanchej (Rom. 1:20). Jehová Diosqa rijchʼayninman jina ruwawarqanchej (Gén. 1:27). Chayrayku pay jina, runaswan kʼachas kayta atinchej. Kusisqa kananchejpaj, bendecinawanchejpajtaj Jehová Dios jina qorikuyta yachananchej tiyan. Chayrayku wajkunaj allinninta maskʼananchejpaj kallpachakuna, mana michʼakuspataj imallatapis wajkunaman jaywarinanchej tiyan (Fili. 2:3, 4; Sant. 1:5). Jehová Diosninchejqa mana michʼas kananchejpajchu ruwawarqanchej. Chayrayku pantaj runas kaspapis Tatanchej Jehová Dios jina wajkunaman imatapis qoriyta atinchej. Jehová Diosninchejqa pay jina kananchejta munan, wajkunaman qorikojtinchejtaj payqa kusikun (Efe. 5:1). w18.08 pág. 18 párrs. 1, 2; pág. 19 párr. 4

Jesustaqa uyarinchej mana nisqasninta yachaspallachu, manaqa nisqanta kasukuspa. Ama saqenachu ‘kay kausaypa llakiykunasnin’ musphachinawanchejta (Luc. 21:34). Astawanpis llakiykunapi rikukuspapis, Jesuspa kamachiykunasninta kasukunapuni. Ima llakiypi rikukuspapis hermanosqa Jehová Diosta tukuy sonqo sirvishallankupuni. Jesusta uyarillasunmantaj, Diospa llajtanta ñaupajman pusajkunata kasukuspa (Heb. 13:7, 17). Kay watasllapi, Diospa llajtanpi ashkha imas waj jinasmanta ruwakushan. Diospa llajtanta ñaupajman pusajkunaqa, waj jinamanta predicayta yuyaychawanchej, chaypajtaj mosoj yanapasta qowanchej. Chaupi semanapi tantakuykunapis waj jinamanta ruwakushan. Tantakuna Wasistapis waj jinamanta ruwakushan, allinchakushantaj. Maytapuni kusikunchej Jehová Diospa llajtan munakuywan pusawasqanchejmanta. Paykunata kasukojtinchej, Jehová Diosqa maytapuni bendeciwasunchej. w19.03 págs. 10, 11 párrs. 11, 12

Uj noticiamanta wakillanta willariwajtinchejqa, mana reparayta atillasunmanchu verdadchus manachus kasqanta. Josuej tiempomanta parlarina (Jos. 22:9-34). Chay tiempomanta wakin israelitasqa Jordán mayumanta Canaán ladopi tiyakorqanku. Wakin israelitastaj chimpa ladopi. Chimpa ladopi tiyakoj israelitasqa yachasqanku Canaán ladopi tiyakoj israelitas uj altarta ruwasqankuta. Mana tukuy imata yachasqankuraykutaj, yuyasqanku Jehová Diosninchejpa contranpi sayaykusqankuta (Jos. 22:9-12). Chaywanpis manaraj maqanakamushaspa wakin kurajkunata kachasqanku imapajchus chay altarta ruwasqankuta yachamunankupaj. Canaán ladomanta israelitaswan parlaspañataj, enterakusqanku chay altarta mana llulla diosesta yupaychanankupajchu ruwasqankuta. Manachayqa Jehová Diosnillanchejta yupaychasqankuta mirayninku yachanankupaj. Chimpa ladomanta israelitasqa maytachá kusikorqanku manaraj imapis kashajtin waturimusqankumanta. Imajtinchus mana waturimunkumanchu karqa chayqa, hermanosninkuta qhasillamanta wañuchinkuman karqa. w18.08 pág. 5 párrs. 9, 10

Apóstol Pablo nerqa, noqanchejpis Jehová Diosta yupaychashaspa sajra imasta ruwayta qallariyta atisqanchejta. Sajra imasta ruwajtinchejtaj ichapis yuyasunman Jehová Dios allillanpaj qhawanawanchejta. Chay jinata yuyaspaqa pantasunman. Jehová Dios allinpaj qhawanawanchejpajqa, llimphu kausayniyoj kananchej tiyan, kamachisqasninta kasukunanchej tiyan, amigosnintaj kananchej tiyan (1 Cor. 10:1-5). Sinaí Orqomanta Moisés mana usqhayta uraykamojtin, israelitasqa sajra imasta ruwaspa pantarqanku. Noqanchejpis kay mundoj tukukuynin mana usqhayta chayamusqanrayku sajra imasta ruwaspa pantasunman. Ichapis yuyayta qallarisunman Jehová Dios sumaj kausayta apamunanpaj mayraj faltasqanta chayri manaña apamunanta. Ajinamantataj munaynillanchejta ruwayta qallarisunman, Jehová Diospa munayninta ruwanamantaqa. Munaynillanchejta ruwaspataj Diosmanta karunchakusunman millay sajra imasta ruwaspa. Chayrayku allinta qhawarikunanchej tiyan. w18.07 pág. 21 párrs. 17, 18

Jehová Dios allinta rejsiwajtinchejqa, ashkha bendicionesta japʼinchej. Chayrayku Jehová Diospa rejsisqasnin kananchejpajqa, payta munakuna, munasqanman jinataj kausakuna (1 Cor. 8:3). Jehová Diospa amigosnillanpuni kanapajqa, ama “kay mundoj qhasi manakaj” imasninta watejmanta maskʼanachu, nitaj runaspa ñaupaqenpi may rejsisqa kaytapis (Gál. 4:9). Chayta astawan entiendenapajqa ñaupa tiempo cristianosmanta parlarina. Paykunaqa Jehová Diospa ñaupaqenpi rejsisqa karqanku. Chaywanpis imastachá ñaupa kausayninkupi ruwaj kanku, chaykunata watejmanta ruwayta qallarisharqanku. Chayrayku apóstol Pabloqa paykunaman nerqa: “¿Imaraykutaj ujtawan kay mundoj qhasi manakaj imasninpa esclavosnin kayta munankichejri?”, nispa. w18.07 pág. 8 párrs. 5, 6

Diospa Palabranpa nisqasninta kasukuspaqa Jehová Diosninchejta uyarishanchej. Diospa kamachiykunasninta kasukuy allinninchejpajpuni kasqanta yachananchejpajqa, Jehová Diospa kamachisninmanta yachakusunman mana paykuna jina pantananchejpaj. Diospa Palabranqa niwanchej imaspichus paykuna pantasqankuta. Diospa kamachin Davidmanta parlarina. Payqa mayta ñakʼarerqa, Jehová Diosta mana kasukuspa Betsabewan qhenchachakusqanrayku (2 Sam. 12:7-14). David juchallikusqanmanta parlaj versiculosta leeshaspaqa, ichapis piensarisunman, imajtinchus David chay juchapi urmasqanpi. Piensarillasunmantaj David jina juchapi urmanapaj jina kashajtinchej, imatachus ruwananchejpi. Chantá piensarisunman ama David jina juchapi urmanapi, José jinataj juchamanta ayqekunapi (Gén. 39:11-15). Juchallikuy ñakʼariyllaman apawasqanchejta yachaspaqa, ni imarayku sajra kajta ruwayta munasunchu (Amós 5:15). w18.06 pág. 17 párrs. 5, 7

May chhika runasqa, uj partidota apoyaj churakunku mana justicia ruwakusqanrayku. Jesuspa tiemponpitaj, runasqa impuestota mana pagayta munasqankurayku romanospa contranpi oqharikojkunaj partenmanta karqanku. Impuestotaqa pagananku karqa, jallpʼasninkumanta, wasisninkumanta tukuy cosasninkumantawan. Impuesterostaj yapasqata cobraj kanku. Chayraykutaj chʼajwas astawan yapakorqa. Wakin impuesterosqa, sumaj cargoyoj kanankupaj autoridadesta llukʼiykoj kanku, ajinamanta astawan gananankupaj. Jericó llajtamanta impuesterospa kurajninku Zaqueopis, qhapajman tukorqa runasmanta impuestota kurajta cobrasqanrayku (Luc. 19:2, 8). Jesuspa tiemponpi judiosqa, impuestota uj día pagota pagaj kanku. Chayrayku Jesuspa enemigosninkoqa, Jesusta pantachiyta munaspa taporqanku impuestota judíos paganankuchus manachus kasqanta (Mat. 22:16-18). Imajtinchus judiosqa mana impuestota pagayta munajchu kanku. Impuestota pagaspaqa yuyarikoj kanku romanospa atiyninpi kasqankuta. w18.06 págs. 5, 6 párrs. 8-10

Satanaspa ladonman churakuspaqa, llakiyllapi rikukusunchej (Job 21:7-17; Gál. 6:8). Runas Kuraj Supaypa makinpi kasqankuta yachayqa, reparachiwanchej gobiernosta mana apoyanachu kasqanta. Chaywanpis Jehová Diosqa kamachiwanchej gobiernosta respetananchejta (1 Ped. 2:17). Jehová Diosqa munallantaj autoridadesta kasukunanchejta, chay autoridadespa leyesninku mana Diospa kamachiykunasninwan churanakojtin (Rom. 13:1-4). Autoridadesta kasukuna kajtinpis, mana politicaman satʼikunanchejchu tiyan gobiernosta apoyanapaj (Juan 17:15, 16; 18:36). Kay tiempopi Satanasqa, tukuy atisqanta ruwashan runas Diospa sutinta qonqanankupaj, pisipajtaj qhawanankupaj. Chayrayku tukuy atisqanchejta kallpachakunallanchejpuni tiyan Jehová Diospa sutinta runasman rejsichimunanchejpaj. Chantapis noqanchejqa Diospa sutinmanta parlaspa, Jehovaj testigosnin jina rejsichikuspataj mana pʼenqakunanchejchu tiyan. Aswan allinpuni Jehová Diosta munakuy qolqeta munakunamantaqa (Isa. 43:10; 1 Tim. 6:6-10). w18.05 pág. 24 párrs. 8, 9

Bibliaqa niwanchej uj runaqa qosan chayri warmin khuchichakuy juchapi urmajtillan divorciakuyta atisqanta. Chaywanpis Bibliaqa mana ninchu imamantachus qhariwarmis separakunanku kasqanta. Apóstol Pablo nerqa: “Sichus uj warmej qosan, Señorninchejpi mana creespapis paywan tiyakullaytapuni munan chayqa, warmeqa ama qosanta saqerpachunchu”, nispa (1 Cor. 7:12, 13). Chaytaqa noqanchejpis kasukunanchej tiyan. Wakin kutispi mana testigo qosaqa ruwasqasninwan rikuchin manaña warminwan ‘tiyakuyta’ munasqanta. Ichapis mana testigo qosaqa warminta llakiyta maqanman chayri mana qolqeta qoyta munanmanchu manachayrí mana saqenmanchu Jehová Diosta yupaychajta. Chaykunata ruwaspapis mana Testigo qosaqa ichá señoranmanta mana separakuyta munanmanchu. Chaywanpis wakin hermanasqa ajinapi rikukuspa qosankumanta separakorqanku. Wakin hermanastaj ajinapi rikukuspapis mana separakorqankuchu. Astawanpis mana saykʼuspa kallpachakorqanku qhariwarmi jina aswan ujchasqa kanankupaj. w18.12 pág. 13 párrs. 14, 16; pág. 14 párr. 17

Jesusqa Lucas 8:5-8, 11-15 versiculospi tarpoj runamanta parlashaspa, nerqa “mujoqa Diospa palabran” chayri Diospa Gobiernonmanta sumaj willaykuna kasqanta, jallpʼataj runaj sonqon kasqanta. Chantá nerqa: “Mujutaj sumaj jallpʼaman tʼakakusqa, pʼutumuytawantaj sapa muju pachajta poqosqa”, nispa. Chay mujitutaj sonqonchejpi pʼutumorqa chantá yurachakorqa chaymantataj poqoyniyoj karqa. Yachanchej jina trigo mujoj poqoynenqa mana waj yuraschu, manaqa ashkha mosoj trigo. Ajinallataj noqanchejwanpis, noqanchejpa poqoyninchejqa, mana uj runata bautizachiychu, manaqa “Diospa Gobiernonmanta” sumaj willaykunata willamuy. Arí, Diospa Gobiernonmanta willamuspaqa runaspa sonqonpi mosoj mujuta tarpunchej (Luc. 6:45; 8:1). Tarpoj runamanta kikinchayqa, yachachiwanchej “sinchʼita sayaspa” sumajta poqona kasqanta, nisunman llakiykuna kajtinpis sinchʼita sayaspa Diospa Gobiernonmanta willamunallapuni kasqanta. w18.05 pág. 14 párrs. 10, 11

Apóstol Pabloqa ‘tukuy ima kapusqanta, kausaynintapis kusiywan hermanosrayku tukucherqa’. Pabloqa ruwasqanwan rikucherqa hermanosninta yanapaytapuni munasqanta (2 Cor. 12:15). Ancianospis Pablo jinallataj ruwasqasninkuwan hermanosta kallpachananku, sonqochanankutaj tiyan, manataj parlaspallachu. Ajinamanta sutʼi yachakonqa, ancianos tukuy hermanosmanta llakikusqankuta (1 Cor. 14:3). Ancianosqa hermanosta yuyaycharinanku chayri kʼamirinanku tiyan creeypi sumaj sayasqa kanankupaj. Ancianosqa hermanosta kʼachamanta kʼamirinankupaj Bibliapi ashkha ejemplosta tarinkuman. Jesusmantaqa mayta yachakunkuman. Payqa wañuymanta kausarimusqanmanta pisi tiemponman, wakin congregacionesta kʼamirerqa. Chay congregacionesmanta wakenqa Éfeso llajtapi, Pérgamo llajtapi, Tiatira llajtapi, Laodicea llajtapi ima kasharqanku. Jesusqa chay llajtaspi kaj congregacionesta niraj kʼamirishaspa, allin ruwasqasninkumanta kusikusqanta nerqa (Apo. 2:1-5, 12, 13, 18, 19). Ancianosqa kallpachakunanku kashan Jesús jina wajkunata kʼamirinankupaj chayri yuyaycharinankupaj. w18.04 págs. 21, 22 párrs. 8, 9

Tatasqa tukuy imata ruwananku tiyan wawasninku mana Satanaswan engañachikunankupaj, imaynatachus tukuy imata ruwanku wawasninku mana onqonankupaj, ajinata. Ashkha tatasqa wawasninku mana onqonankupaj wasinkuta llimphituta japʼinku, onqochikoj imastataj wijchʼunku. Ajinallatataj tatasqa, mana allin peliculasmanta wawasninkuta jarkʼananku tiyan. Imaraykuchus películas, tele, videojuegos, Internetpis wawasta tanqan sajra imaspi yuyanankupaj. Chayrayku tatasqa wawasninkuman ninanku tiyan ima peliculastachus qhawayta atisqankuta, imastatajchus mana qhawayta atisqankuta. Bibliawantaj sutʼinchananku tiyan imaraykuchus chay kamachiykunata churasqankuta (Mat. 5:37). Imajtinchus tatasqa Dios nisqanman jina wawasninkuta yanapananku kashan Diospa qayllallanpipuni kanankupaj (Pro. 1:8). Chantapis wawasninkuta wiñasqankuman jina imachus allin, imatajchus mana allin kasqanta reparayta yachachinanku tiyan. Ajinamanta wawasninkoqa Bibliaman jina reparayta atenqanku imachus allin, imatajchus mana allin kasqanta (Heb. 5:14). Chantapis tatasqa mana parlaspallachu wawasninkuta yachachinanku kashan, manaqa ejemplonkuwanpis (Deu. 6:6, 7; Rom. 2:21). w19.01 pág. 16 párr. 8

Allin kanman jovenesqa machitu hermanoswan amigos ruwakunanku. Jovenesqa, tapurinkuman imachus paykunata yanapasqanta Jehová Diosta tukuy sonqo sirvinallankupajpuni. Jinamanta purajmanta kallpachanakunankupaj. Chantapis machitus chayri jóvenes kaspapis, tukuyninchej tantakuykunaman jamojkunata chunka makiwan japʼikusunman. Predicacionmanta encargado kajkunaqa, machitu hermanosta mayta yanapankuman tukuy sonqo predicanallankupajpuni. Predicacionmanta encargadosqa, machitu hermanosta ninkuman, maymantachá predicacionman llojsinku chay chayllapi predicanankuta. Chantapis jovenesta machitu hermanoswan predicachinkuman. Ajinamanta machitu hermanosqa, reparanqanku paykunamanta llakikusqankuta. Imajtinchus machitu hermanos, onqosqa hermanospis mayta llakikunku manaña ñaupajta jinachu predicayta atisqankumanta (Lev. 19:34). w18.06 pág. 23 párrs. 10-12

Noqanchejpis, apóstol Pablo jina Jehová Diosman agradecekunanchejpuni tiyan juchamanta, wañuymantawan kacharichiwasqanchejrayku. Jehová Diosta llimphu sonqowan, tukuy sonqotaj yupaychayta atinchej Wawannejta juchamanta kacharichiwasqanchejrayku (Sal. 40:8). Jehová Dios juchamanta kacharichiwasqanchejmanta mana agradecekunallachu, manaqa sajra kajta mana ruwanapaj kallpachakuna. Nitaj ajinata yuyanachu: “Jehová Dios juchamanta kacharichiwanñaqa, perdonallawanqa”, nispa. Imajtinchus apóstol Pedroqa, nerqa mana sajra kajta ruwanapajchu juchamanta kacharichisqa kasqanchejta. Chantapis ama qonqanachu, israelitas mayta ñakʼarisqankuta sajra kajllatapuni ruwasqankurayku. Chayrayku allin kajta ruwanallapajpuni mayta kallpachakunanchej tiyan. Imajtinchus Diablowan, sajra runaswanqa, munanku mikhuspa, tomaspa, fiestasman rispa, pujllaspa, modaman jina vestikuspa ima munasqanchejman jina kausananchejta. Chantapis runasqa, imata vendenankupajpis propagandasta ruwanku kʼachita warmiswan, alajito qhariswan. Ajinamanta imatapis rantirpanallanchejpaj mana necesitashajtinchejpis. Chayrayku sumajta qhawarikunanchej tiyan mana munayninchejman jina imatapis ruwarpanapaj. w18.04 págs. 9, 10 párrs. 7, 8