Mayo

Jesusqa wawamantapacha tatantawan mamantawan kasukorqa. Payqa ni jaykʼaj yuyarqachu tatasninmanta nisqa, astawan yachasqanta, nitaj paykunaj kamachisqankuta pisipaj qhawarqachu. Chantapis Jesusqa, kuraj wawa kasqanrayku familianta maytachá yanaparqa. Payqa mamanpaj, hermanitosninpajwan trabajananpaj, tatanmanta carpintero kayta yachakorqa. Josewan Mariawanqa, Jesusman willarqankuchá uj milagronejta nacekusqanta. Chantapis willallarqankutajchá, imatachus ángeles, Diospa kamachisninpis paymanta nisqankuta (Luc. 2:8-19, 25-38). Jinapis Jesuspuni Diospa Palabranta sumajta estudiarqa. ¿Imaynapí chayta yachanchej? Imaraykuchus Jesús 12 watasniyoj kashajtin, templopi “yachachejkunaj chaupinkupi” tiyasqa kasharqa. Paykunataj Jesusta uyarispa, “mayta tʼukusharqanku yachayninmanta, kutichisqasninmanta ima” (Luc. 2:46, 47). Jesusqa Diospa Palabranta estudiasqanrayku, chaypachaña yacharqa Jehová Dios Tatan kasqanta (Luc. 2:42, 43, 49). w20.10 pág. 29 párrs. 13, 14

Jesús wañuymanta kausarimusqanpi creespaqa, wañusqas kausarimunankutapis creellasuntaj. Pabloqa wañusqas kausarimunankumanta parlayta qallarishaspa, kinsa imasta nerqa: 1) “Cristoqa juchasninchejrayku wañorqa, 2) pʼampasqataj karqa. 3) Chantá kinsa pʼunchayninman kausarichisqa karqa, Diosmanta Qhelqasqapi nisqanman jina”, nispa (1 Cor. 15:3, 4). Jesús wañusqan, pʼampasqa kasqan, kausarichisqa kasqan ima, ¿imapitaj yanapawanchej? Profeta Isaías nerqa, Mesiasqa “runas chawpimanta chinkachisqa” kananta, ‘sajra runaswan khuskataj pʼampasqa’ kananta. Chantá nillarqataj, Mesiasqa “tukuypa juchasninkuta” apananta. Jesustaj chaytapuni ruwarqa juchasninchejrayku wañuspa (Isa. 53:8, 9, 12; Mat. 20:28; Rom. 5:8). Ajinamanta Jesusqa juchamanta, wañuymantawan kacharichiwanchej. Chantapis Jesús kausayninta qosqanrayku, wañupoj familiaresninchejta watejmanta rikukapusun. w20.12 págs. 2, 3 párrs. 4-6; pág. 5 párr. 11

Apóstol Pabloqa judiospa sinagogasninkupi predicayta yachaj. Tesalónica llajtapi kashaspa, payqa “sinagogaman yaykorqa. Chaypitaj kinsa Samarikuna Pʼunchaykunapi [judiosta] yachacherqa Diosmanta Qhelqasqapi allinta tʼukurichispa” (Hech. 17:1, 2). Ichapis Pabloqa judío kasqanrayku, sinagogasman yachachej yaykoj (Hech. 26:4, 5). Payqa llajta masisninta entiendej. Chayraykutaj mana manchachikuspa paykunaman predicaj (Fili. 3:5). Pabloqa qhatiykachasqankurayku, Tesalónica llajtamanta, Berea llajtamantawan ayqekorqa, Atenas llajtamantaj rerqa. Chayman chayaspataj “sinagogapi yachacherqa judiosman, jinallatataj Diosta yupaychaj waj runasmanpis” (Hech. 17:17). Chantá mercado plazaman rerqa. Chaypeqa mana judío kajkunaman, yachaysapa runasmanwan predicarqa. Chay runaspajqa, Pabloj yachachisqan “mosoj yachachiy” karqa. Chayrayku Pabloman nerqanku: “Parlasqaykimanta wakin imastaqa mana jaykʼajpis uyarerqaykuchu”, nispa (Hech. 17:18-20). w20.04 pág. 9 párrs. 5, 6

Imapi pantanchej chayqa, ama yuyanachu ni imapaj valesqanchejta. Sapallanchejmantaqa, mana Diospa ñaupaqenpi allinpaj qhawasqa kayta atisunmanchu. Chayrayku Jesuspa wañuyninnejta Jehová khuyakunawanchejta necesitanchej (Efe. 1:7; 1 Juan 4:10). Hermanospis, hermanaspis mayta kallpachawanchej. Paykunaqa imallamantapis parlayta necesitajtinchej uyariwanchej, parlasqankuwantaj kallpachawanchej (Pro. 12:25; 1 Tes. 5:14). Nigeriamanta hermana Julia, llakiyninwan mana atipachikunanpaj mayta kallpachakorqa. Pay nin: “Manachus hermanosqa, imachus kayman karqa. Jehová Diosqa mañakusqayta hermanosnejta uyariwan. Hermanosmanta yachakorqani imaynatachus llakiypi tarikoj hermanosta kallpachariyta”, nispa. Hermanosninchejqa mana yachayta atillankuchu, maykʼajchus kallpachanata necesitasqanchejta. Chayrayku llakisqa kashaspaqa, noqanchejpuni creeypi sinchʼi sayasqa hermanoswan parlarina, yanapatataj mañakuna. w20.12 págs. 23, 24 párrs. 7, 8

Pillawanpis sumaj amigos kanapajqa, paywan sumajta rejsinakunchej. Chaypajtaj tukuy imamanta parlarikunchej, imachus sonqonchejpi kasqantapis willanarikunchej. Ajinamanta sumaj amigosman tukunchej. Jinapis Jesuspa amigosnin kayqa mana atikullanchu. Imaraykuchus Jesusta mana rikunchejchu. Ichapis chayrayku yuyasunman, mana paypa amigosnin kayta atisqanchejta. Ñaupa tiempomanta ashkha cristianospis, Jesusta manallataj rikorqankuchu. Jinapis apóstol Pedro paykunaman nerqa: “Cristota mana jaykʼaj rikuspapis, payta munakunkichej. Kunan payta mana rikushankichejchu chaypis, paypi creenkichej”, nispa (1 Ped. 1:8). Apóstol Pedro nisqanman jinaqa, Jesusta mana rikuspapis, paypa amigosnin kayta atisunman. Chantapis Jesuswanqa mana uyapura parlayta atinchejchu. Ichapis chayrayku yuyasunman, mana paypa amigosnin kayta atisqanchejta. Jehová Diosmanta Jesuspa sutinpi mañakuspapis, orakuspaqa Jehová Dioswan parlanchej, manataj Jesuswanchu. Jesuspunitaj niwanchej Diosmanta mañakunanchejta, manataj paymantachu. Imaraykuchus mañakoyqa, Diosta yupaychaywan ninakun. Noqanchejtaj Jehová Diosllata yupaychananchej tiyan (Mat. 4:10). Jinapis Jesusta munakusqanchejta rikuchiyta atisunman. w20.04 pág. 20 párrs. 1-3

Ñaupa tiempomanta Greciapi atipanakupi correjkunaqa, saykʼusqa kaspapis chayri imanku nanajtinpis correllajpuni kanku. Paykunaqa yachachisqa kasqankuman jina, kallpankuman jinataj correj kanku. Noqanchejpis Jehová Dios yachachiwasqanchejman jina correshanchej. Jinapis atipanakupi correjkunamanta nisqaqa, noqanchejtaqa Jehová Dios yanapashawanchej. Payqa mana tukukoj atiyninwan kallpachawanchej. Jehová Diosqa niwanchej, paywan yanapachikojtinchej yachachinawanchejta, kallpatataj qonawanchejta. Apóstol Pabloqa ashkha llakiykunasniyoj karqa. Runasqa payta tukuy imata nerqanku, qhatiykacharqankutaj. Chantapis wakin kutis kallpan pisiyasqanta yuyarqa, mana tukukoj llakiyniyojtaj karqa. Chay llakiyninmanta nerqa: “Aychaypi khishkayoj jina kani”, nispa (2 Cor. 12:7). Pabloqa chay llakiykunasninrayku, ichapis Jehová Diosta niña sirvinmanchu karqa. Jinapis payqa Jehová Diospi astawan atienekorqa (2 Cor. 12:9, 10). Chayrayku Jehovaqa payta yanapallarqapuni. w20.04 pág. 29 párrs. 13, 14

Mana rikukoj valorniyoj imasmanta ujqa, Jehová Dioswan Jesuswan angeleswan ima llankʼayta atisqanchej (2 Cor. 6:1). Paykunawan khuska llankʼanchej, Diosmanta runasman willamuspa, yachachimuspa ima. Apóstol Pabloqa paymanta, waj cristianosmanta ima nerqa: “Noqaykoqa Dioswan khuska llankʼayku”, nispa (1 Cor. 3:9). Predicaj rispaqa, Jesuswan khuska llankʼashallanchejtaj. Jesusqa yachachisqasninman nerqa: “Tukuy laya runasta yachachisqasniyman tukuchimuychej”, nispa. Chayta niytawan nillarqataj: “Noqaqa qankunawan tuta pʼunchay kasaj”, nispa (Mat. 28:19, 20). Chanta, ¿angeleswanpis llankʼallanchejtajchu? Arí. Imaraykuchus paykuna yanapashawanchej, “wiñay wiñaypaj sumaj willaykunata jallpʼapi tiyakojkunaman” willananchejpaj (Apo. 14:6). Jehová, Jesús, ángeles ima yanapawasqanchejrayku, ashkha runas Diospa Gobiernonmanta uyarishanku. Chay Gobiernonmanta willasqanchejqa, mujuta tʼakay jina. Chay mujitu sumaj jallpʼaman chayajtintaj, pʼutumuytawan wiñanpacha (Mat. 13:18, 23). ¿Pitaj chay mujituta sumaj jallpʼawan ninakoj runaspi wiñachin? Jesusqa kay pʼunchaypaj textopi chayta sutʼincharqa. w20.05 pág. 30 párrs. 14, 15

Ashkha familiasqa tʼaqanasqas kausanku, qhariwarmis divorciakusqankurayku. Wakin familiastaj khuska tiyakuspapis, waj runaspis kankuman jina kausanku. Familiasta yuyaychaj runa nin: “Ashkha familiaspeqa, tatas, mamas, wawaspis mana parlarikuyta yachankuchu. Sapa ujpis computadora, tablet, celular, chayri videojuegos qhawarisqalla kanku. Chay familiasqa uj wasillapi tiyakuspapis, mana allintachu rejsinakunku”, nispa. Kay sajra mundomanta runasqa, mana munakuyniyojchu kanku. Noqanchejtaj mana paykuna jina kayta munanchejchu. Astawanpis familianchejta, hermanosninchejtapis astawan munakunanchej tiyan (Rom. 12:10). Imaynatachus tatanchejta, mamanchejta, hermanosninchejtapis munakunchej, ajinallatataj cristiano hermanosninchejta munakunanchej tiyan. Chayta ruwasun chayqa, Jehová Diospa familian ujchasqallapuni kananpaj yanapakusun (Miq. 2:12). w21.01 pág. 20 párrs. 1, 2

Futbolta pujllajkuna uj runa jinalla pujllajtinkoqa, ganankuman. Sonqonchejqa chay ujchasqa equipo jina kanan tiyan. Chaypajtaj yuyayninchejta, munayninchejtapis, Jehová Diosta sirviyllapi churananchej tiyan. Satanasqa Jehová Diosta iskay sonqolla sirvinanchejta munan. Chaypajtaj yuyayninchejta, munayninchejtawan tʼaqanachiyta munan. Jinapis Jehová Diosninchejtaqa, tukuy sonqo sirvinanchej tiyan (Mat. 22:36-38). Amapuni saqenachu Satanás pantachinawanchejta. Noqanchejpis Jehová Diosmanta David jina mañakuna: “Uj yuyayllata ruwaway sutiykita jatumpaj qhawanaypaj”, nispa. Chay mañakuyman jina kausanapajtaj kallpachakuna. Tukuy ima ruwasqanchej Jehová Diospa sutinta jatunchananpaj jina kachun. Ajinata ruwasunchej chayqa, mana pʼenqakuspa nisunchej Jehová Diospa testigosnin kasqanchejta (Pro. 27:11). Chantapis profeta Miqueas jina niyta atisunchej: “Señorninchej Tata Diospa sutimpi purisunchej wiñaypaj” (Miq. 4:5). w20.06 pág. 13 párrs. 17, 18

Wichaynejmanta reywan, mundontinmanta gobiernospiwan Diospa llajtanta chinkachinankupaj oqharikojtinku, Tukuy Atiyniyoj Jehová Diosqa mayta phiñakonqa. Chaypachataj Armagedón guerra qallarenqa (Apo. 16:14, 16). Chay guerrapeqa Magogmanta Gogwan ninakoj naciones chinkachisqa kanqanku. Wichay ladomanta reypis, chay nacionesmanta ujnin kasqanrayku chinkachisqallataj kanqa, “manataj pipis payta yanaparej kanqachu” (Dan. 11:45). Daniel 12:1 astawan sutʼita willawanchej, imaynatachus wichay ladomanta rey, payman ujchasqa gobiernos ima chinkachisqa kanankuta. Willallawanchejtaj imaynatachus salvasqa kananchejta. ¿Imastá chay versículo niwanchej? Chaypi Miguelmanta parlan. Miguelqa Reyninchej Jesucristoj ujnin sutin. Payqa 1914 watapi Diospa Gobiernonpi Rey jina churasqa karqa. Chaymantapachataj Diospa llajtanta ‘qhawashan’. Tumpamantawantaj Jesusqa, Armagedón guerrapi Diospa enemigosninta chinkachinanpaj “rikhurimonqa”. Chay guerrapitaj, Danielpa nisqan “llakiy” tiempo tukukonqa. Pay nerqa: “Chay jina llakeyqa manapuni jaykʼajpis karqachu runas kasqankumantapacha”, nispa (Apo. 6:2; 7:14). w20.05 págs. 15, 16 párrs. 15-17

Joseqa esclavo kashaspa, chantá carcelpi kashaspapis, ni imata ruwayta aterqachu librakunanpaj. ¿Imatataj ruwarqa llakiywan mana atipachikunanpaj? Llakiynillanpi yuyananmantaqa, ruwanasninta sumajta ruwananpaj kallpachakorqa. Chantapis Jehová Diosta kausayninpi ñaupajman churarqa. Chayrayku Jehovaqa, payta tukuy ima ruwasqanpi bendicerqa (Gén. 39:20-23). Josej kausaynenqa yuyarichiwanchej, kay mundoqa llakiykunamanta juntʼa kasqanta, runastaj qhasimanta ñakʼarichiyta atiwasqanchejta. Chantapis ichá uj hermanonchej sufrichiwasun. Jinapis Tatanchej Jehovata ‘pakakunanchej chhankata jina, waqaychawajninchejta’ jinataj qhawakuna. Ajinamanta mana llakiykunawan atipachikusunchu, paytataj sirvillasunpuni (Sal. 62:6, 7; 1 Ped. 5:10). Joseqa Jehová Dios mosqochishajtin 17 watasnillayojraj karqa. Chaytaj rikuchiwanchej, Jehovaqa joven kamachisninpi atienekusqanta. Kay tiempopipis, ashkha jóvenes José jinallataj sinchʼi creeyniyoj kanku. Wakenqa Jehová Diosta mana wasanchasqankurayku carcelpi wisqʼasqa kashanku (Sal. 110:3, TNM). w20.12 pág. 16 párr. 3; pág. 17 párrs. 5, 7

Apóstol Pedrowan Juanwanqa, Jesuspa discipulosnin kasqankurayku, paymanta yachachisqankurayku ima qhatiykachasqas karqanku. Jinapis paykunaqa, Jesuspa sutinrayku ñakʼarisqankumanta kusikorqanku (Hech. 4:18-21; 5:27-29, 41, 42). Ñaupa tiempomanta cristianosqa, mana imamantapis pʼenqakunankuchu karqa. Paykunaj ruwasqankoqa kunankama yanapashawanchej. Paykunata chejnikoj runaspa ruwasqankurí, wakin runasllata yanaparqa. ¿Imaraykutaj chayta ninchej? Chay cristianosmanta wakenqa, Bibliaj wakin librosninta qhelqarqanku. Chay librostaj may chhika runasta yanapashallanpuni. Chantapis paykunaqa, Diospa Gobiernonmanta runasman yachacherqanku. Chay Gobiernotaj cielopi kamachishanña, pisimantawantaj kay jallpʼatawan kamachenqa (Mat. 24:14). Paykunata qhatiykachaj atiyniyoj gobiernorí, unayña chinkapun. Jinapis wañupunankukama Diosta sirvej cristianosqa, cielopi reyesña kashanku. Paykunaman churanakoj runasrí wañupunkuña. Chay runas kausarimonqanku chaytaj, Diospa Gobiernonpa kamachiyninpi kananku kanqa. Chay Gobiernomantaqa chejnikusqanku cristianosllataj parlarqanku (Apo. 5:10). w20.07 pág. 15 párr. 4

Abrahanqa Diospa nisqan juntʼakunanpi creerqa. Diospa ajllasqan Mesiasta mana rikuspapis, paypajqa chay Mesías Diospa Gobiernonpi kamachishanmanñapis jina karqa. Chayrayku Jesusqa judiosman nerqa: “Tataykichej Abrahanqa rikuytapuni munarqa imastachus ruwanay karqa chayta, rikuspataj maytapuni kusikorqa”, nispa (Juan 8:56). Abrahanqa Jehová Dios uj Gobiernota sayarichinanta yacharqa. Yachallarqataj mirayninmanta wakin, chay Gobiernopi reyes kanankuta. Chayrayku Abrahanqa, Jehovaj nisqasnin juntʼakunanta suyakorqa. ¿Imaynapitaj yachanchej Abrahán “sumaj cimientosniyoj llajtata”, nisunman Diospa Gobiernonta suyakusqanta? Ñaupaj kaj, payqa mana mayqen llajtatapis llajtanta jina qhawakorqachu. Astawanpis forastero jina purikorqa, nitaj mayqen gobiernotapis apoyarqachu. Iskay kaj, Abrahanqa mana uj gobiernota chayri uj llajtata sayarichiyta yuyarqachu. Astawanpis Jehovata kasukorqa, imatachus nisqanta juntʼanantataj suyakorqa. Chayta ruwaspa, Diospa nisqasninpi creesqanta rikucherqa. w20.08 pág. 3 párrs. 4, 5

Jehová Dios nisqanman jina, Cristo kamachishajtenqa mana pipis nenqachu: “Onqosqa kani”, nispaqa (Isa. 33:24). Chayrayku nisunman, Jehová Diosqa runasta sano cuerpoyojta kausarichimunanta. Jinapis kausarimojkunaqa, pantaj runasllapuni kanqanku. Mana jina kajtenqa, familiasnenqa mana paykunata rejsikapunkumanchu. Chantapis Cristo Waranqa Watasta kamachimushajtinraj, tukuy runas pisimanta pisi juchamanta llimphuchasqa kasunchej. Chay waranqa watas tukukuytataj, Jesusqa Gobiernota Tatanman kutichiponqa. Chaypachataj manaña pantaj runaschu kasunchej. Ajinamanta Diospa Gobiernonqa munayninta juntʼanqa (1 Cor. 15:24-28; Apo. 20:1-3). Wañupoj familiaresninchejwan tinkukapojtinchej, ichapis kusiymanta waqasun, asisun chayri Jehová Diosta takiykunawan alabasun. Imayna kusisqapunichus kananchejtaqa, mana yachanchejchu. Jinapis sutʼita yachanchej, Jehová Diosninchejta Wawan Jesustawan astawan munakunanchejta. Imaraykuchus wañusqastaqa paykuna kausarichimonqanku. w20.08 págs. 16, 17 párrs. 9, 10

Apóstol Pabloqa cristianosman yuyaycharqa, Jehová Diosta sirvinankupaj solteros kakuypi piensarinankuta (1 Cor. 7:8, 9). Payqa solterosta mana pisipajchu qhawarqa. Chayrayku joven Timoteota ajllarqa Diospa llajtanpi uj jatun ruwanata qonanpaj. Timoteotaj soltero karqa (Fili. 2:19-22). ¿Imatá chaymanta yachakunchej? Mana allinchu kanman ninanchej: “Kayta ruwanapajqa uj casado aswan wakichisqa kashan”, nispa. Nillataj allinchu kanman ninanchej: “Kaytaqa uj soltero aswan sumajta ruwanman”, nispa (1 Cor. 7:32-35, 38). Ni Jesuspis ni Pablopis yachacherqankuchu, casarakunapuni kasqanta chayri solteropuni qhepakuna kasqanta. Noqanchejrí, ¿imatá yuyananchej kanman? Qhawarina imatachus uj revistanchej casarakuymanta, soltero kaymantawan nisqanta. 1 de octubre de 2012 watamanta La Atalaya revista nin: “Casarasqa kaypis soltero kaypis, Diospa regalon. [...] Jehová Diosqa mana munanchu, soltero cristianos mana casarakusqankumanta pʼenqakunankuta, nitaj llakikunankutapis”, nispa. Chayrayku soltero hermanosninchejta jatunpaj qhawananchej tiyan. w20.08 pág. 28 párrs. 8, 9

Wakin suyusmanta runasqa, Diospa Gobiernonmanta willasqanchejta tukuy sonqo japʼikunku. Paykunaqa willasqanchejta uyarispa mayta sonqochakunku. Wakin lugaresmanta runastajrí, mana Diosmanta, nitaj Bibliamantapis uyariyta munankuchu. Predicanchej chaypi runas uyariwajtinchejpis manapis, noqanchejqa willamunallanchejpuni tiyan. Imajtinchus Jehová Diosqa, “kaykamalla” ninawanchejkama predicananchejta munan. Payqa maykʼajkamachus predicananchejpaj uj fechata churanña. Chay pʼunchay chayamojtintaj niña predicasunchu. “Chaypachamá tukukoyqa jamonqa” (Mat. 24:14). Jesusqa yachachisqasninman willarqa, tukukuy tiempopi imaschus kananta, imaynachus runas kanankutapis. Yachachisqasnintaj chay imasta rikuspa, ichapis predicacionta niña ñaupajman churankumanchu karqa. Chayrayku Jesús paykunaman nerqa: “Rijchʼarisqallapuni kaychej”, nispa (Mat. 24:42). Noej tiemponmanta runasqa, ruwanasninkuwan musphasqankurayku mana Noeta uyarerqankuchu. Noqanchejpis chay runas jina musphasunman chayqa, niña predicacionta ñaupajman churasunmanchu (Mat. 24:37-39; 2 Ped. 2:5). Chayrayku kallpachakunanchej tiyan, Jehová Dios qowanchej chay llankʼayta ñaupajman churanapaj. w20.09 pág. 8 párrs. 1, 2, 4

Satanasqa “manchay phiñasqa” kashan. Chay phiñakuyninmantataj nipuni ayqeyta atisunchu (Apo. 12:12). Pisi tiempomantawanqa, tukuy cristianospa creeyninku pruebaman churasqa kanqa. Imajtinchus tumpamantawanqa “manchay ñakʼariy kanqa, mayqenchus kay mundoj qallariyninmantapacha kunankama manaraj karqachu” (Mat. 24:21). Chay tiempopeqa, familiaresninchejpis ichá contranchejpi sayaykonqanku. Autoridadespis ichá manaña predicajta saqewasunchu (Mat. 10:35, 36). Chay tiempo chayamojtin, ¿rey Asa jinachu Jehová Dios yanapanawanchejpi, jarkʼanawanchejpi ima atienekusun? (2 Cró. 14:11). Sapa ujninchej chaypi piensarinanchej tiyan. Jehová Diosqa imaschus jamonqa chaypaj, kunanmantaña creeyninchejta kallpachashan. Payqa ‘allin kamachi yuyayniyojnejta’ “tiemponpi mikhunata” qoshawanchej. Ajinamanta sinchʼita sayanallanchejpajpuni (Mat. 24:45). Jinapis sapa ujninchej, Jehová Diospi astawan creenapaj kallpachakunanchej tiyan (Heb. 10:38, 39). w20.09 pág. 18 párrs. 16-18

Jehová Diosqa munayninta ruwananpaj, wakin kutis gobiernosmanta chayri autoridadesmanta valekun. Payqa atiyninnejta chayta ruwan. Runasqa larqʼata ruwaspa yakuta maymanchá munanchej chayman pusanchej. Ajinallatataj Jehová Diospis, munayninta ruwananpaj autoridadespa sonqonkuta atiyninwan kuyurichiyta atin. Jehová Dios chayta ruwajtin, autoridadesqa Diospa llajtanta yanapananpaj jina imatapis ruwanku (Esdras 7:21, 25, 26, kikinchay). Noqanchejrí, ¿imatá ruwasunman? “Mañapunallataj reyespaj, tukuy kamachejkunapaj ima”. Chayta ruwasunman, paykuna Diosta yupaychayta jarkʼanawanchejtachus manachus qhawarishajtinku (1 Tim. 2:1, 2; Neh. 1:11). Chantapis ñaupa cristianosmanta yachakuspa, carcelpi wisqʼasqa hermanosninchejpaj Diosmanta mañapusunman (Hech. 12:5; Heb. 13:3). w20.11 pág. 15 párrs. 13, 14

Pillapis bautizakojtenqa, mayta kusikunchej. Noqanchej payman Bibliamanta yachacherqanchej chaytaj, astawanraj kusikunchej (1 Tes. 2:19, 20). Bautizakoj runataqa mana yachachejnillanchu bautizakunanpaj yanapan, manaqa tukuynin congregación. Chayrayku bautizakoj runaqa, yachachejninmanta, congregacionmantapis ‘allinta parlaj carta’ jina (2 Cor. 3:1-3). Pasaj wataspeqa, mundontinpi sapa killa 10 millones runasta jina Bibliamanta yachacherqanchej. Chay kikin tiempollapitaj, sapa wata 280 milmanta astawan bautizakorqanku. Rikunchej jina, may chhika runasraj bautismoman chayayta atinkuman. Jehová Diosqa pacienciayoj kasqanrayku, chay runas Jesuspa discipulosninman tukunankuta munan. Jinapis pisi tiempollaña tiyan. Chayrayku tukuy atisqanchejta ruwana, paykunata usqhayllata bautismoman chayachinapaj (1 Cor. 7:29 qallariynin; 1 Ped. 4:7). w20.10 pág. 6 párrs. 1, 2

Rey Saulqa mana Jehová Diosta kasukorqachu. Chayrayku profeta Samuelqa, Saulman pantasqanta reparacherqa. Saultaj “arí juchallini” ninanmantaqa, wajkunataraj juchacharqa, mana chaykamapunichu juchallisqantataj nerqa (1 Sam. 15:13-24). Saulqa aswan ñaupajpi kikillantataj ruwarqa (1 Sam. 13:10-14). Payqa jatunchakusqanrayku, mana yuyayninta cambiarqachu. Chayrayku Jehová Diosqa niña payta allinpajchu qhawarqa, niñataj rey kanantapis saqerqachu. Mana rey Saúl jina kanapajqa, kay tapuykunapi piensarina: “Bibliapi imatapis leeytawan, ¿‘kayqa mana noqapajchu’ nispachu ninchej? Chayrí, ¿yuyanchejchu ruwasqanchej mana ancha juchapunichu kasqanta? Imapi pantaspapis, ¿wajkunatarajchu juchachanchej?”. Mayqen tapuymanpis “arí” ninchej chayqa, yuyayninchejta cambiananchej tiyan. Mana cambiayta munanchej chayqa, sonqonchejpi jatunchakushanchejña. Jehová Diostaj niña amigosninta jinachu qhawawasun. w20.11 pág. 20 párrs. 4, 5

Jóvenes, pitachus sirvinaykichejta ajllakuychej. Wawas chayri jóvenes, qankunapuni Jehová Diosta rejsiychej. Reparaychej imachus paypa munaynin kasqanta, imaynatachus chayta ruwanaykichejtapis (Rom. 12:2). Chayta ruwaspalla, Jehovata sirviyta ajllankichej (Jos. 24:15). Bibliata sapa kuti leenkichej, estudiankichejtaj chayqa, Jehová Diosta astawan munakunkichej, astawantaj paypi creenkichej. Jehová Diospa munayninta ñaupajman churayta ajllaychej. Wawas chayri jóvenes, Satanaspa mundonqa creechiyta munasunkichej munayniykichejta ruwaspa kusisqa kanaykichejta. Chayrayku imastachus ruwayta yachasqaykichejwan, qhapajyayta maskʼanaykichejpaj tanqasunkichej. Jinapis qolqeta maskʼajkunaqa, ‘imaymana llakiykunawan ñakʼarinku’ (1 Tim. 6:9, 10). Chayrayku Jehová Diosta kasukuyta, paypa munayninta ruwayta ima ajllakuychej. Chayta ruwankichej chayqa, yachayniyojman tukunkichej, ‘tukuy ima ruwasqaykichejpitaj allin risonqachej’ (Jos. 1:8). w20.10 pág. 30 párrs. 17, 18

Ñaupa tiempopi, Jesusqa tukuy runaspaj allin kausay kananmanta willarqa. Discipulosninmantaj kamacherqa, chay sumaj willayta “kay jallpʼaj tukuy kʼuchusnintinpi” willamunankuta (Hech. 1:8 ). Discipulosnenqa kallpallankuwan mana chayta ruwayta atinkumanchu karqa. Paykunaqa Diospa atiyninta necesitarqanku. Jesustaj ñaupajpiña nerqa, Jehová Dios paykunata atiyninwan yanapananta (Zac. 4:6; Juan 14:26). Jesuspa discipulosnenqa, 33 watamanta Pentecostespi Diospa atiyninta japʼerqanku. Chay atiyta japʼispataj, sumaj willaykunata willayta qallarerqanku. Pisi tiemponman, may chhika runas chay willayta japʼikorqanku (Hech. 2:41; 4:4). Discipulosqa qhatiykachasqa kaspapis, mana manchachikorqankuchu. Astawanpis Diosmanta mañakorqanku: “Yanapariwayku ari, mana manchachikuspa palabraykimanta willanallaykupajpuni”, nispa. Diostaj paykunaman atiyninta qorqa. Paykunataj ‘Diospa palabranta mana manchachikuspa willarqanku’ (Hech. 4:18-20, 29, 31). w20.10 pág. 21 párrs. 4, 5

¿Imajtintaj creesunman Jehová Dios, Jesusta kausarichisqantapuni? Ashkha runas Jesús kausarimusqanta rikorqanku (1 Cor. 15:5-7). Apóstol Pabloqa chay rikojkunamanta parlashaspa, Cefasmanta ñaupajta parlarqa. Chaytaj apóstol Pedroj ujnin sutin. Waj discipulospis nillarqankutaj, Pedroqa Jesús kausarimusqanta rikusqantapuni (Luc. 24:33, 34). Jesuspa 12 apostolesninpis pay kausarimusqanta rikullarqankutaj. Chay qhepatataj, kausarimoj Jesusqa “500 kuraj tantasqa hermanosman” rikhurillarqataj. Chaytaj ichapis karqa, Galilea orqopi tantasqa kashajtinku (Mat. 28:16-20). “Chaymantaqa Santiagoman rikhurerqa”. Chay Santiagoqa ichá Jesuspa hermanon karqa. Payqa mana creerqachu Jesús Mesías kasqanta (Juan 7:5). Jinapis Jesús kausarimusqanta rikuspaqa, Mesiaspuni kasqanta creerqa. Pablo 55 watapi corintiosman qhelqashajtin, Jesusta rikojkunamanta ashkhasraj kausasharqanku. Chayrayku Jesús kausarimusqanta mana creejkunaqa, paykunata tapurikuyta atinkuman karqa. w20.12 pág. 3 párrs. 5, 7, 8

Imanchej nanawajtinchej, chayri unaytaña onqosqa kajtinchej, llakiynillanchejpi yuyasunman. Jina kajtin, Jehová Diosmanta yanapata mañakuna. Payqa kay tiempopi mana uj milagronejta sanoyachiwasunchu. Jinapis payqa sonqochawanchej, onqoyninchejta aguantanapajtaj kallpata qowanchej (Sal. 94:19). Jehová Diosqa hermanosninchejnejta yanapawasunman. Payqa hermanospa sonqonkuta kuyurichinman, wasinchejpi yanaparinawanchejpaj chayri noqanchejrayku paymanta mañapunawanchejpaj. Jehovaqa yanapallawasunmantaj, sonqocharinawanchejpaj jina textosta yuyarikunapaj. Chaytaj kanman, mosoj mundopi mana onqospa kausananchejmanta parlaj textos (Rom. 15:4). Jinapis niña anchata predicayta atisqanchejmanta llakikusunman. Estados Unidosmanta Laurel sutiyoj hermanaqa, sinchʼi onqosqa kasqanrayku uj máquina ukhupi 37 watasta karqa. Chay maquinaqa samayta atinanpaj yanaparqa. Chantapis payqa cancerniyoj karqa, ashkha kutista operachikorqa, aycha qaranpitaj waj onqoykunasniyoj karqa. Ajina onqosqeta kaspapis, predicallarqapuni. Payqa enfermeras, chayri waj runas wasinman yanapaj rejtinku, paykunaman predicaj. Ajinata predicaspa, 17 runasta yanaparqa Bibliamanta yachakunankupaj. w20.12 pág. 24 párr. 9; pág. 25 párr. 12

Kay 56 wata chaynejpi, ashkha judíos Pablota qhatataspa templomanta orqhorqanku, wañuchiytataj munarqanku. Qʼayantintaj Pablota Jatun Juntaman pusacherqanku, enemigosnintaj casi chaypi wañucherqanku (Hech. 21:30-32; 22:30; 23:6-10). Chay jina llakiykunapi kaspa, ichapis Pablo nerqa: “Maykʼajkamataj kay jina llakiykunapi kasajri”, nispa. ¿Imaynatá Jehová Dios Pablota yanaparqa? Presochasqankumanta qʼayantin chʼisi, Señor Jesusqa Pabloman rikhurispa nerqa: “Pablo, ¡kallpachakuy! Imaynatachus Jerusalenpi noqamanta allinta sutʼinchanki, ajinallatataj Romapipis sutʼinchanayki tiyan”, nispa (Hech. 23:11). Jesuspa nisqanqa maytachá Pablota kallpacharqa. Jesusqa Pabloman nerqa, Jerusalenpi allinta willasqanta. Chantapis nillarqataj, Romaman chayanantapuni, chaypitaj paymanta willanallantapuni. Chayta uyarispa, Pabloqa niñachá imatapis manchachikorqachu. Payqa tatanpa marqʼayninpi wawita jinachá kasharqa. w20.11 pág. 12 párr. 1; pág. 13 párrs. 3, 4

Diospa Gobiernonta suyakusqanchejqa, “barco sayachina gancho jina”. Imaraykuchus chay suyakusqanchejqa, llakiykunata, problemastapis aguantanapaj yanapawanchej. Jehová Dios tumpamantawan allin kausayta qonawanchejpi piensarina. Paraisopeqa imaschus kunan llakichiwanchej, chaykunata niña yuyarikusunchu (Isa. 65:17). Chayrayku mosoj mundopiñapis kashasunman jina piensarina. Chaypeqa niña imamantapis llakikusunchu, may allintataj kausakusun (Miq. 4:4). Chay sumaj kausaymanta wajkunaman willarispapis, kallpachakullasunmantaj. Chayrayku tukuy atisqanchejta runasman willamuna, yachachimunataj. Chayta ruwajtinchej, ‘imatachus suyakushanchej chayta, tukukuykama mana iskayrayaspa suyakullasunpuni’ (Heb. 6:11). Kay sajra mundoj tukukuynin astawan qayllamusqanman jina, problemaspis llakiykunapis astawan yapakonqa. Chaytaj ichá astawan llakichiwasun. Chayrayku llakiykunapi kaspapis sonqo tiyasqallapuni kanapajqa, mana kallpanchejpichu atienekunanchej tiyan, manaqa Jehová Diosninchejpi. Chaytataj ruwasqanchejwan rikuchina. Jehová Diospa kay nisqanpi tukuy sonqo atienekuna: “Ni imata ruwaspalla, tukuy sonqo atienekuspataj kallpayoj kankichej” (Isa. 30:15). w21.01 pág. 7 párrs. 17, 18

Santiago 5:11 versiculopi leerinchej jina, Jehová Diosqa khuyakuyniyoj. Chayta yachaspataj payman astawan qayllaykuyta munanchej (Éxo. 34:6). Jehovaqa munakuwasqanchejrayku khuyakuwanchej. Khuyakuwasqanchejraykutaj juchasninchejta perdonawanchej (Sal. 51:1). Noqanchejpis hermanosninchejmanta khuyakusunman, sonqonchejta nanachiwajtinchej paykunata perdonaspa, nitaj paykunapaj phiñasqallapuni kaspa (Efe. 4:32). Bibliaqa “khuyakuy” nispa, mana wajkunata perdonayllamantachu parlashan. Parlashallantaj wajkunata sufrejta rikuspa yanaparinamantapis. Jehová Diosqa, maytapuni yanapayta munawasqanchejta niwanchej. Payqa uj mama wawitanta yanapayta munasqanmanta, astawanraj yanapayta munawanchej (Isa. 49:15). Jehová Diosqa llakiypi kashajtinchej, khuyakuwasqanchejrayku yanapawanchej (Sal. 37:39; 1 Cor. 10:13). Noqanchejpis hermanosninchejta khuyakusunman, llakiypi kashajtinku paykunata yanaparispa. Chayta ruwaspaqa, Tatanchej Jehová jina ruwashanchej. Payqa ni pi jina manchay munakuyniyoj, khuyakuyniyojtaj (Efe. 5:1). w21.01 pág. 21 párr. 5

Qosasqa sumajta qhawarikunanku tiyan mana trabajollaman qokunankupaj. Trabajollaman qokuspaqa, niña familiankuta yanapankumanchu Jehovaj qayllallanpipuni kanankupaj, kusisqa kanankupajtaj. Chantapis qosasqa familiankuta yachachinanku tiyan. Jehová Diosqa allinninchejpi yuyaspa yachachiwanchej, pantajtinchejtaj cheqanchawanchej (Heb. 12:7-9). Jesuspis Tatan jinallataj, paypa kamachiyninpi kajkunata munakuywan yachachin (Juan 15:14, 15). Payqa yachachisqasninwan kʼacha kaspapis, imatapis mana allinta ruwajtinku reparachejpacha (Mat. 20:24-28). Jesusqa yachallantaj, noqanchejpis juchasapas kasqanchejrayku imapipis pantasqanchejtapuni (Mat. 26:41). Jehová jina, Jesús jinataj ruwaj qosaqa, yachan familianmanta kajkuna pantaj runas kasqankuta. Chayrayku warminpaj, wawasninpajpis mana ‘sinchʼita phiñakunchu’ (Col. 3:19). Astawanpis Gálatas 6:1 nisqanta kasukun. Chayrayku familianmanta kajkuna imapi pantajtinkupis, “llampʼu sonqowan” paykunata reparachin, yuyarikuntaj paypis pantaj runa kasqanta. Chantapis Jesús jinallataj, familianta ruwasqasninwan yachachin. w21.02 págs. 6, 7 párrs. 16-18

Jehová Diosqa llajtanmanta sapa ujta Wawanpa yawarninwan ranterqa (Mar. 10:45; Hech. 20:28; 1 Cor. 15:21, 22). Chayrayku Wawan Jesusta, llajtanpa uman kananpaj churan. Jesustaj chayrayku congregacionpaj kamachiykunata churayta atin, chay kamachiykunata juntʼachiytapis (Gál. 6:2). Jinapis Jesusqa, mana kamachiykunallatachu churan. Payqa congregacionmanta kajkunata munakuywan qhawan, imatachus necesitasqankutapis qon (Efe. 5:29). Hermanasqa congregacionta ñaupajman apaj hermanosta kasukuspa, Cristota respetashanku. Hermanospis Jehovamanta japʼisqanku ruwanata entiendenankupaj, mayta kallpachakunku. Chayta ruwaj hermanosqa, hermanasta respetanku, sumajpajtaj qhawanku. Yachakunchej jina, Jehová Diosqa familianmanta sapa ujman imatachus ruwanankuta kamachin. Tukuyninchej chayta kasukusun chayqa, congregacionpi allin kausay kananpaj yanapakusun. Jinapis astawanqa, munakuyniyoj Tatanchej Jehovata jatunchasun. w21.02 págs. 18, 19 párrs. 14-17

Imapichus David waj kutipi rikukusqanmanta parlarina. Davidwan soldadosninwanqa, Saulmanta ayqeykachakuspa kausashajtinku, uj maqanakuman rerqanku. Chaykamataj enemigosninkoqa, familiasninkuta, tukuy kapuyninkutawan apakaporqanku. Davidqa sumaj maqanakoj soldado kasqanrayku, soldadosninwan chay rato paykunata qhatiykunman karqa. Jinapis chayta ruwananmantaqa, Jehovaj yanapayninta maskʼarqa. Davidqa Jehovata taporqa: “Chay suwa runasta qhatiykuymanchu?”, nispa. Jehová Diostaj kuticherqa: “Qhatiykullay, taripankiraj, chay presostapis qhechukapunki”, nispa (1 Sam. 30:7-10). ¿Imatataj Davidpa ruwasqanmanta yachakunchej? Imata ruwanapajpis, wajkunawan yuyaychachikunata. Jóvenes, qankunaqa tataykichejta mamaykichejta tapurikuychejpuni. Experienciayoj ancianospis mayta yanapasunkichejman. Jehovaqa paykunata “regalosta jina” congregacionpi churan (Efe. 4:8). Payqa ancianospi atienekun. Qankunapis paykunapi atienekullawajchejtaj. Creeyninkumanta yachakuychej, yuyaychasqankutapis japʼikuychej. w21.03 pág. 4 párrs. 10, 11

Jesús nisqanman jina, yachakusqanta mana ruwaj runaqa, tʼiyu patapi wasita ruwakoj runaman rijchʼakun. Chay runaj wasenqa, sinchʼi wayras chayri paras jamojtin urmapunpacha. Tiemponta, qolqenta gastasqantaj qhasillapaj (Mat. 7:24-27). Ajinallataj noqanchejwanpis kanman, yachakusqanchejman jina mana ruwasunman chayqa. Imajtinchus problemas jamuwajtinchej chayri qhatiykachasqa kajtinchej, mana sinchʼita sayayta atisunmanchu. Jinapis Bibliapi yachakusqanchejman jina ruwasun chayqa, aswan sumajta imatapis ruwasun, sonqo tiyasqataj kasun. Creeyninchejpis aswan sinchʼi kanqa (Isa. 48:17, 18). Ajina llakiypi kashaspa sinchʼita sayanapajqa, Jehovamanta yanapata mañakunallapuni, Palabrantapis estudianallapuni, Jehová Diosta jatunchaytataj ñaupajman churana. Payqa ni jaykʼaj saqerpariwasunchu. Munakuyninmantaqa ni imapis, nitaj pipis tʼaqawasunchu. Chayta ni jaykʼaj qonqananchejchu tiyan (Heb. 13:5, 6). w21.03 pág. 15 párr. 6; pág. 18 párr. 20