¿Imaraykutaj cristianos bautizakunku?

Kay yachaqanaqa, tapuykunasniykiman Bibliaykipi kutichiykunasta tarinaykipaj yanapasonqa. Munajtiykeqa Jehovamanta sutʼinchajkunawan kay yachaqanata ukhunchayta atiwaj.

1. ¿Imataj bautizakuy niyta munan?

Bautizakuspaqa, Diosman qayllaykuyta munasqanchejta rikuchinchej. Chayrayku cristianosqa, mana uña wawas kashaspachu bautizakunanku tiyan, manaqa Diosta rejsinankupaj, Jesuspa discipulosninman tukunankupaj edadniyoj kaspalla (Hechos 8:12; 1 Pedro 3:21). Jesuspa discipulosnin kanankupajtaj, pay nisqanta ukhunchananku tiyan, chayman jinataj kausananku tiyan. (Mateo 28:19, 20 leey.)

Apostolespa tiemponpi ashkha runas, Diosta, Jesusta ima astawan rejsiyta munarqanku. Sutʼincharinapaj, uj runa Jesuspa wañuyninrayku, salvasqa kayta atisqanta entiendeytawan, Jesuspa discipulonman tukorqa. Kay tiempopipis may chhika runas Jesuspa discipulonman tukullankutaj. (Hechos 8:26-31, 35-38 leey.)

2. ¿Imaraykutaj Jesús bautizakorqa?

Jesusqa, Juan Bautista Jordán mayupi pʼulltiykushajtin, yaqha 30 watayoj kasharqa. Jesús bautizakorqa, Diospa munayninta ruwayta munasqanta rikuchinanpaj (Hebreos 10:7). Chantá bautizakorqa, runaj juchanrayku kausayninta qoyta munasqanta rikuchinanpaj. Niraj Jallpʼaman jamushaspa, janaj pachapi Jehová Tatanta munakusqanta, kasukusqanta ima rikucherqa. (Marcos 1:9-11; Juan 8:29; 17:5 leey.)

3. ¿Imaraykutaj cristianos bautizakunku?

Noqanchejqa, mana Jesús jinachu juntʼa runa kanchej. Chaywanpis Jesús kausayninta qosqanrayku, Diosman qayllaykuyta atinchej (Romanos 5:10, 12; 12:1, 2). Chantá llajtanman yaykuyta atinchej (2 Corintios 6:18). ¿Imatá llajtanman yaykunapaj ruwasunman? Sapallanchejpi uj mañakuypi Diosman qokusunman, munayninta ruwayta munasqanchejta ninapaj. Qokusqanchejta rikuchinapajtaj, tukuypa rikunankuta bautizakunchej. (Mateo 16:24; 1 Pedro 4:2 leey.)

4. ¿Imaynatá bautizakunaykipaj wakichikuwaj?

Jehovamanta sutʼinchajkunaqa, Diosman qayllaykuyta munajkunaman Bibliamanta yachachinku. Bibliata ukhunchay, tantakuykunaman riy imaqa, Diosta munakusqaykita, creeyniykita ima kallpachanqa. Chantapis allin imasta ruwanaykipaj, Diosmanta yachakunallaykipajpuni ima yanapasonqa. Kʼacha kaykunata, nisunman munakuyta, creeyniykita ima rikuchejtiykeqa, Jehová Diosman wiñaypaj sirvisqayki nisqaykita juntʼayta atillanki. (Juan 17:3; Hebreos 10:24, 25 leey.)

Astawan yachakuyta munaspaqa, kay libroj, ¿Imatapunitaq Biblia yachachin?, 18 yachaqananta leey. Kaytaqa Jehovamanta sutʼinchajkuna orqhonku.