Ama Pesachikuspa Diosta Yupaychay

1-3. 1) ¿Imamantataj wakin pesachikunku chayri llakikunku? 2) ¿Imatataj apóstol Pablomanta yachakusunman?

RUNASQA “amallapis chayta ruwaymanchu karqa” nispa imamantapis pesachikunku. Wakenqa imatachus ruwasqankumanta chayri mana ruwasqankumanta pesachikunku chayri llakikunku. ¿Imasmantataj qan pesachikunki?

² Wakin runasqa kausayninkupi pantarqanku chayri jatun juchaspi urmarqanku. Wakintaj mana jatun juchaspichu urmaspapis, kausayninkupi allintachus manachus imatapis ajllasqankuta tapukunku. Wakintajrí, imastachus ruwasqankuta qonqayman churaspa ñaupajllamanpuni rinku. Wajkunataj, “kaytachus chayri jaqaytachus ruwanman karqa chayqa”, nispa pesachikunku (Sal. 51:3). Qanrí, ¿imastachus ñaupajpi ruwasqaykimanta mana llakikuspa Diosta sirviyta munawajchu? Biblia nisqanman jina, apóstol Pabloj kausayninmanta mayta yachakusunman.

³ Pabloqa mayta pantaspapis, kausayninpi allin imasta ajllarqa. Pantasqanmanta mayta pesachikojtinpis, Jehovata kusiywan sirviyta yachakorqa. Chayrayku, paymanta astawan parlarina.

PABLOJ ÑAUPA RUWASQASNIN

4. ¿Imatataj Pablo fariseo kashaspa ruwarqa?

⁴ Pabloqa imastachus fariseo kashaspa ruwasqanmanta, qhepaman pesachikorqa. Sutʼincharinapaj, Cristopi creejkunata mayta qhatiykacharqa. Bibliaqa Estebanta wañuchisqankutawan, Saulo, pichus qhepaman Pablo sutiwan rejsisqa karqa, imatachus ruwasqanmanta nin: “[Qotuchakuywan] astawan japʼinakusharqa tukuchiyta munaspa. Wasimanta wasi yaykuytawantaj, creejkunata japʼiraspa, qharista, warmista ima carcelman wisqʼaracherqa” (Hech. 8:3). Uj profesor nisqanman jinaqa griego qallupi “astawan japʼinakusharqa tukuchiyta munaspa” rimaykuna, “phiña animal jina” qotuchakuyta tukuchiyta munasqanta niyta munan. Sauloqa judiospa yachachiyninman sayasqa kasqanrayku, cristianosta tukuchinanpaj Dios kamachishasqanta yuyarqa. Chayrayku “creejkunata japʼiraspa, qharista, warmista ima carcelman wisqʼaracherqa” (Hech. 9:1, 2; 22:4).a

5. ¿Imaynamantataj Jesuspi creejkunata Pablo niña qhatiykacharqachu, Cristomantataj willayta qallarerqa? Sutʼinchariy.

⁵ Pabloqa Damascoman riyta munarqa, Cristopi creejkunata wasisninkupi japʼimuspa Jerusalenman apananpaj, chaypitaj jatun juntapi juchachasqa kankuman karqa. Chaywanpis, Jesús qotuchakuypa Uman jina mana chayta saqerqachu (Efe. 5:23). Saulo Damascoman rishajtin, Jesús ñanpi taripaspa uj kʼanchaywan ciegoyarpacherqa. Chaymantataj, Damascoman yaykunanta kamacherqa, chaypitaj imatachus ruwananta ninanku karqa. Bibliaqa imachus qhepaman kasqanmanta parlallanpuni (Hech. 9:3-22).

6, 7. ¿Imataj rikuchin Pablo ñaupa ruwasqasninmanta sonqonta mayta nanachikusqanta?

⁶ Pabloqa cristianoman tukusqanmantapacha, kausayninta tijrachispa niña cristianosta qhatiykacharqachu, astawanqa sonqo kʼajaywan Cristomanta willarqa. Chaywanpis, ñaupa ruwasqasninmanta parlaspa jinata qhelqarqa: “Qankunaqa uyarerqankichejña noqamanta, imaynatachus ñawpajta judiospa yachachiynimpi kashaspa, Diospa [qotuchakuyninta] anchatapuni qhatiykachasqayta, chinkarparichiyta munaspa”, nispa (Gál. 1:13). Chantá Corintomanta, Filiposmanta ima cristianosman qhelqashaspa ñaupa ruwasqasninmanta parlallarqataj, Timoteoman qhelqashaspapis (1 Corintios 15:9 leey; Fili. 3:6; 1 Tim. 1:13). Pabloqa chaykunata qhelqaspa mana sumajta ruwasqantachu nisharqa. Astawanqa mayta pantasqanta yacharqa (Hech. 26:9-11).

⁷ Uj yachayniyoj runa, cristianosta Saulo qhatiykachasqanmanta parlarqa. Chay runa nisqanman jinataj, cristianosta may jinatachus ñakʼarichisqanta yachaspalla, “imaynatapunichus sonqonta nanachikusqanta, imastachus enemigosnin paypaj rimasqankuta ima entiendesunman”. Qotuchakuykunata waturishajtintaj, ichapis mana rejsisqan hermanos qayllaykuspa jinata nej kanku: “¿Qanchu Pablo kanki, qhatiykachawarqayku chay runa?”, nispa (Hech. 9:21).

8. ¿Imatataj Pablo yuyarqa Jehovawan Jesuswan munakuyninkuta, khuyakuyninkuta ima rikuchisqankumanta, imatataj paymanta yachakunchej?

⁸ Pabloqa Diospa qhasilla kʼacha yanapayninrayku, willayta atisqanta yacharqa. Payqa Bibliata qhelqajkunamanta ni mayqen jina, 14 cartasninpi Diospa khuyakuyninmanta 90 kutista jina parlarqa (1 Corintios 15:10 leey). Pabloqa Diospa khuyakuyninmanta mayta agradecekorqa, chayraykutaj tukuy apostolesmanta nisqaqa Diospaj aswan sinchʼita llankʼarqa. Pabloj kausaynenqa Jesuspa wañuyninpi creejtinchej, juchasninchejta rimarejtinchej, kausayninchejtataj tijrachejtinchej, Jehová juchasninchejta may jatun kajtinpis pampachananta rikuchin. Chaytaj juchasninkuta Dios mana perdonananta yuyajkunata, mayta sonqochan (1 Timoteo 1:15, 16 leey). Pabloqa Cristota mayta qhatiykachaspapis, qhepaman kayta qhelqarqa: “Diospa [Churin] munakuwarqa, noqaraykutaj wañuchisqa kanampaj jaywaykukorqa”, nispa (Gál. 2:20; Hech. 9:5). Rikunchej jina, Pabloqa pantasqanmanta mana llakikuspa Jehovata kusiywan sirviyta yachakorqa. Qanpis, ¿kikinta ruwawajchu?

¿IMAMANTAPIS PESACHIKUNKICHU?

9, 10. 1) ¿Imaraykutaj ashkhas imamantapis mayta llakikunku? 2) ¿Imaraykutaj ñaupa ruwasqasninchejmanta juchachakuy mana allinchu?

⁹ Ichapis imata ruwasqaykimanta mayta pesachikunki. Ichá tiempoykita, kallpaykita ima mana allin ruwaykunapi usucherqanki. Chayri ichá pejpa sonqonta nanacherqanki chayri waj imasta ruwasqaykimanta pesachikunki. ¿Imatataj ajinapi rikukuspa ruwawaj?

¹⁰ Ashkhasqa chaykunamanta llakikullankupuni. Chayllapipuni yuyaspataj paykunalla mayta ñakʼarinku. Chaywanpis, ¿llakikuspa imatapis allinchankumanchu? Mana. Chayqa unayta kikinpi chukusqalla kaspa maymanpis chayayta munay jina kanman. Chayta ruwaspaqa utichikullasunman. Chayrayku chayllapi yuyanamantaqa imatapis ruwana. Sutʼincharinapaj, pejpa sonqonta nanacherqanki chayqa perdonta mañakuwaj, paywan allinyakapunaykipaj. Chantapis, imata ruwasqaykichus juchaman chayachisusqanta niña ruwanaykipaj kallpachakuwaj, chayrí muchunallaykiña kanqa. Chaywanpis, chayllamanta llakikoyqa ni imapi yanapasonqachu. Nitaj Jehovapaj sumajta llankʼayta atinkichu.

11. 1) ¿Imatataj ruwasunman Jehová khuyakunawanchejpaj, kʼacha yanapaynintataj rikuchinawanchejpaj? 2) ¿Imatataj sonqonchej niña juchachanawanchejpaj ruwananchej tiyan?

¹¹ Wakin cristianosqa ñaupa ruwasqasninkumanta juchachakullankupuni, mana Jehová munakunanpaj jinachu kasqankutataj yuyakunku. Ichapis jatun juchaspi urmasqankurayku chayri ashkha kutispi juchallikusqankurayku Diospa khuyakuyninta mana tarinankuta yuyanku. Chaywanpis, ima juchapi urmarqanku chaypis, pesachikuyta, kausayninkuta tijrachiyta, perdonta mañakuyta ima atinku (Hech. 3:19). Jehovaqa khuyakuyninta, kʼacha yanapayninta ima paykunaman rikuchiyta atin, imaynatachus ashkhasmanña rikuchin ajinata. Payqa sonqomantapacha pesachikojkunata, llampʼu sonqo kajkunata ima khuyakun, Jobta khuyakorqa ajinata; pichus ajinata pesachikorqa: “Kutirikamuyki jallpʼa patapi, ushpha patapi ima tiyaspa”, nispa (Job 42:6). Diosqa sonqonchej niña juchachanawanchejpaj imatachus ruwananchejmanta kayta niwanchej: “Pichus juchanta pakaykojtaqa mana allinchu renqa; pitajchus juchanta rimarispa, chaymanta tʼaqakun, chay runaqa khuyakuyta tarenqa”, nispa (Pro. 28:13; Sant. 5:14-16). Chayrayku, Diosman juchasninchejta willakuna, perdonninta mañakuna, kausayninchejta tijrachinapajtaj kallpachakuna (2 Cor. 7:10, 11). Ajinata ruwajtinchejqa khuyakuyninta tarisun, Payqa “kantumanta pampachanqa, ima juchapis kachun” (Isa. 55:7).

12. 1) Davidpa kausayninpi rikusqanchejman jina, ¿imatataj ruwasunman niña sonqonchej juchachanawanchejpaj? 2) ¿Imaynamantataj Jehová pesachikorqa, imaynatataj chayta yachay sonqochawanchej? (Recuadrota leeriy.)

¹² Jehovaqa mañakojtinchej mayta yanapawasunman. Davidqa Salmo libropi rikuchin jina, Jehová uyarinanpi atienekuspa tukuy sonqo mañakorqa (Salmo 32:1-5 leey). Chantapis, juchanta pakaykusqanrayku sonqon juchachasqanta repararqa. Chayraykutaj niña kusisqachu karqa, maytataj ñakʼarerqa. ¿Imatataj ruwarqa perdonta tarinanpaj? Uj mañakuypi Diosman juchanta willakorqa. Jehovataj uyarerqa, allin kajta ruwaspa ñaupajman rinanpaj ima kallpacharqa. Qanpis Jehovaman tukuy imata willakunki chayqa, pay uyarisonqapuni. Ñaupa juchasniykimanta llakikushanki chayqa, allinchanaykipaj kallpachakuy. Chaymantataj amaña llakikuychu, Jehová perdonasunanpi atienekuy (Sal. 86:5).

ASWAN QHEPAMAN IMACHUS KANANPI YUYAY

13, 14. 1) ¿Imatataj kunan ruwashananchej tiyan? 2) ¿Ima tapuykunataj yanapawasunman imatachus ruwashasqanchejta reparakunapaj?

¹³ Imatachus ñaupajpi ruwasqanchejmantaqa yachakusunman, chaywanpis chayllapi yuyaspa llakikunamantaqa imatachus kunan chantá aswan qhepaman ruwayta atisqanchejpi yuyana. Tapurikuy: “¿Pesachikusajchu imatachus kunan ruwashasqaymanta? ¿Uj jinamanta ruwanay karqa nispachu nisaj? ¿Tukuy atisqaytachu Jehovata sirvishani qhepaman mana pesachikunaypaj?”, nispa.

¹⁴ Jatun ñakʼareyqa kaysitupiña kashan. Chayrayku, mana pesachikuyta munasunmanchu kaykunata tapukuspa: “¿Jehovapaj astawanchu llankʼayta atiyman karqa? ¿Imaraykutaj atishaspa mana precursor karqanichu? ¿Imataj jarkʼawarqa siervo ministerial kanaypaj? ¿Mosoj runa kaywan pʼachawan jina pʼachallikunaypaj maytachu kallpachakorqani? ¿Mosoj pachapi kausanaypaj jinachu kani?”. Chay tapuykunaqa Jehovapaj tukuy atisqanchejtachus manachus ruwashasqanchejta reparanapaj yanapawanchej. Chayrayku, qhepaman mana pesachikushanapaj jina imatapis ruwana (2 Tim. 2:15).

JEHOVATA SIRVISQAYKIMANTA NI JAYKʼAJ PESACHIKUYCHU

15, 16. 1) ¿Imastataj ashkha cristianos Jehovata astawan sirvinankupaj saqerqanku? 2) ¿Imaraykutaj chaykunamanta mana pesachikunachu?

¹⁵ Jehovata astawan sirvinaykipaj, ¿imatapis saqerqankichu? Ichapis kapususqallanwan kausakuspa Jehovapaj astawan llankʼanaykipaj, uj sumaj profesionta chayri uj sumaj negociota saqerqanki. Chayri betelita kanaykipaj, qotuchakuykunata waturej kanaykipaj, misionero kanaykipaj chayri Tantakuna Wasista ruwaypi yanapakunaykipaj mana casarakorqankichu chayri mana wawasniyojchu kanki. Ashkha watasña pasajtin, ¿pesachikuwajchu Jehovata sirvinaykirayku chaykunata saqesqaykimanta? ¿Mana kajllata imatapis saqesqaykitachu chayri mana allinta ajllasqaykitachu yuyawaj? ¡Ni imarayku!

¹⁶ Jehovata mayta munakusqaykirayku, wajkunata yanapayta munasqaykirayku ima chayta ruwarqanki. Waj imasta ruwawaj karqa chayqa mana aswan allinchu risunkiman karqa. Allinta ajllasqaykirayku, Jehovaman aswan sumajnin kajta qosqaykimanta kusikuy. Paytaj, imastachus ruwasqaykita ni jaykʼaj qonqanqachu. “Cheqa kaj” kausayta nisunman wiñay kausayta tarejtiykitaj, yuyasqaykimantapis astawanraj bendecisonqa (Sal. 145:16; 1 Tim. 6:19).

AMA PESACHIKUSPA DIOSTA SIRVINA

17, 18. 1) ¿Imatataj Pablo ruwarqa sonqon niña juchachananpaj? 2) ¿Imatá ruwanki Pablo jina ruwanaykipaj?

¹⁷ ¿Imatataj Pablo ruwarqa sonqon niña juchachananpaj? Pay nerqa: “Imachus kawsayniypi ñawpajta karqa, chayta qonqayman churaspa, atisqayta kallpakuni ñawpajpi kajta taripanaypaj. Ñawpajman rishallanipuni, maymanchus chayana kashan, chayman chayanaykama”, nispa (Filipenses 3:13, 14 leey). Pabloqa judiospa yachachiyninkupi kashaspa imastachus ruwasqallanpi yuyananmantaqa, cheqa sonqollapuni kananpaj kallpachakorqa, ajinamanta wiñay kausayta japʼinanpaj.

¹⁸ ¿Imatataj Pabloj nisqanmanta yachakunchej? Imastachus ruwasqanchejmanta anchata llakikoyqa mana allinchu kasqanta. Imaraykuchus ruwasqaqa ruwasqaña. Chayrayku, bendicionesta japʼinapaj imastachus kunan ruwayta atisqanchejpi yuyananchej tiyan. Ima juchaspichus urmasqanchejta mana llimphuta qonqayta atispapis, mana chaykunamanta kutin kutita juchachakuspachu kausana. Qhepapi saqesqanchejtaqa qhepapi saqepuna. Jehovata tukuy kallpanchejwan sirvina, ima bendicionestachus japʼinanchejpitaj yuyana.