Diosman Qayllaykuy
“Mañakuychej, qosonqachejtaj”
Uj discípulo Jesusman nerqa: “Señor, yachachiwayku Dios Tatamanta mañakuyta”, nispa (Lucas 11:1). Kutichinanpaj Jesusqa, 2 rijchʼanachinasmanta parlarqa. Chaykunawantaj Dios uyarinawanchejpaj, imaynatachus mañakunata yachacherqa. ¿Maykʼajllapis Dios mañakusqaykita uyarisqanta tapukorqankichu? Jina kajtenqa, Jesuspa kutichisqan yanapasonqa. (Lucas 11:5-13 leey.)
Ñaupaj rijchʼanachinaqa, mañakojmanta parlan (Lucas 11:5-8). Chaypeqa uj runa amigonpa wasinman chaupi tutata chayan, wasiyojtaj ni imata jaywariyta atinchu. Chaywanpis imallatapis jaywarinanpuni kasqanta yachasqanrayku, allin tutaña kajtinpis, ujnin amigonpa wasinman kinsa tʼantata mañarikoj rin. Chay amigontaj wawasninta mana rijchʼarichinanrayku, mana jatarimuyta munanchu. Chaywanpis anchata mañakusqanrayku, jatarispa imatachus mañakusqanta jaywan.a
¿Imatá kay rijchʼanachina yachachiwanchej? Diosmanta mana saykʼuspa mañakunata. Arí, mañakunallapuni, maskʼanallapuni, punkutapis takanallapuni (Lucas 11:9, 10). ¿Imaraykú Jesús chayta nerqa? ¿Nichu Dios uyariyta munawanchej? Mana jinachu. Payqa, mana chay mana uyariyta munaj runa jinachu. Astawanpis imallatapis munayninman jina, Paypi tukuy sonqo creespataj mañakojtinchejqa, uyariwasunpuni. ¿Imaynatá Paypi tukuy sonqo creesqanchejta rikuchinchej? Kutin kutita mañakuspa. Chayta ruwaspaqa, imatachus mañakusqanchejta necesitasqanchejtapuni, Dios qoyta atiwasqanchejpi creesqanchejta ima rikuchinchej (Marcos 11:24; 1 Juan 5:14).
Iskay kaj rijchʼanachinaqa, Jehovamanta parlan. Bibliaqa paymanta nin: “Qan uyarinki mañakususqankuta”, nispa (Salmo 65:2). Jesús taporqa: ¿Mayqen tatataj wawan “challwata mañajtin, katarita[...] qonman? Chayri, runtuta mañajtimpis, alacrantachu qonman?”, nispa. Wawasninta munakoj tataqa, mana chayta ruwanmanchu. Chayrayku Jesús jinata sutʼincharqa: “Qankunachus sajra runas kashaspa, allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Espíritu Santota [chaytaj imamantapis aswan sumaj] qonqa mañakojkunaman”, nispa (Lucas 11:11-13; Mateo 7:11).b
Diosqa paypi tukuy sonqo creespa mañakojtinchej, uyariwasunpuni
¿Imata Jesús kay rijchʼanachinawan yachachiwanchej? “Mañakuy[kunata]” Uyarej Diosta uj kʼacha Tatata jina qhawanata, pichus wawasninman necesitasqankuta jaywayta munan. Chayrayku Jehovata yupaychajkunaqa, imatachus sonqonkupi munasqankuta mañakuyta atinkuman. Chantá mañakusqankuman jina mana kutichimojtinpis, tukuy sonqo japʼikuyta atinkuman, imaraykuchus Diosqa allinninkutapuni maskʼan.c
ABRIL KILLAPI BIBLIATA LEENAPAJ:
a Jesuspa rijchʼanachinanqa, chay tiempopi ususta sutʼinchan. Judiosqa wasinkuman wajyarikuyta jatunpaj qhawaj kanku. Sapa familiataj, uj pʼunchayllapaj tʼantata ruwaj, pisichikuspaqa vecinosmanta mañarikoj. Chantapis wajcha familiasqa, uj cuartollapi mastʼa patapi puñoj kanku.
b Jesusqa “mashkhatarajchus” nispa, runamanta nisqaqa Dios aswan kʼacha Tata kasqanta niyta munasharqa.
c Dios uyarinawanchejpaj imaynatachus mañakunata astawan yachakuyta munaspaqa, ¿Imatapunitaq Biblia yachachin? libroj, 17 yachaqananta leey. Kaytaqa Jehovaj testigosnin orqhonku.