¿Religionpi creesunmanchu? Jatun maqanakuy
Albertoqa, chunka watata jina soldado karqa. Pay nin: “Curaqa, ‘Dios qankunawan kashan’, nispa bendeciwaj kayku. Bibliataj, ‘ama runa masiykita wañuchinkichu’ nin. Chantá, ‘¿imajtin runata wañuchej rishaniri?’, nispa tapukoj kani”.
Reneqa segunda guerra mundialpi, maqanakupaj barcopi soldado karqa. Uj kutipi, pastorman nisqa: “Qanqa barcoman wicharimuspa, enemigosta atipanaykupaj rezapuwayku. Chantá, ¿manachu paykunapis kikillantataj ruwanku?”, nispa. Pastortaj, Diospa ñankunasnenqa mana yachay atina kasqanta nispalla kutichisqa.
Chay nisqan, ¿imayná rijchʼasunki? ¿Allinchu? Ichapis mana. Ashkhas jinata yuyanku.
¿IMATÁ BIBLIA YACHACHIN?
Jesús nerqa: “Runa masiykita munakunki qan kikiykita jina”, nispa. Chaytaj jatun kamachiykunamanta ujnin (Marcos 12:31). Chaywan, ¿nisharqachu nacionninchejmanta kajkunallata munakunata? Mana. Chayrayku yachachisqasninman nerqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta” (Juan 13:34, 35). Cristoj discipulosnenqa, mayta munanakusqankurayku rejsisqa kananku karqa. Nitaj runa masinkoj kausayninta qhechunankuchu karqa, astawanpis paykunarayku kausayninkuta qonkuman karqa.
Chaytapunitaj ruwarqanku. Uj libro nin: “Iglesiata jatarichejkunaqa, Tertuliano, Orígenes jina ima, cristianos mana runa masinkuta wañuchiyta atisqankuta nej kanku, chayrayku mana romanospa cuartelesninkuman rejchu kanku”, nispa (The Encyclopedia of Religion).
¿IMATÁ JEHOVAJ TESTIGOSNIN RUWANKU?
Jehovaj testigosnenqa, Jallpʼantinpi kashanku. Chayrayku mayqen lugarllapipis uj guerra kajtin, paykunaqa purajmanta munanakusqankuta rikuchinankupaj kallpachakunku.
¿Yachachinkuchu religiones tukuy sonqo munanakuyta?
Kay 1994 watapi Ruandapi hutuswan tutsiswan wañuchinakushajtinku, Jehovaj testigosnenqa chay chʼajwapi mana satʼikorqankuchu. Astawanpis kausayninkuta wañuy pataman churaspa jarkʼanakorqanku. Sutʼinchanapaj, hutus ayllumanta iskay Jehovaj testigosnin, tutsis ayllumanta hermanosninkuta wasinkupi pakarqanku. Chayraykutaj Interahamwe nisqamanta soldados paykunata japʼispa nerqanku: “¡Imapaj tutsista yanapankichej! ¡Kunan yachaychej!” nispa. Chantataj iskayninkuta wañucherqanku (Juan 15:13).
¿Ima ninkitaj? ¿Jesús kamachisqanman jinachu tukuy sonqo munanakunku?