Mayllapipis Jehovata sirviyta munayku

CHAYQA 1949 watapi karqa. Chaywanpis, aswan ñaupajmanta willarisqaykichej. Tatayqa Hendrik sutikorqa, Donderen nisqa llajtitapitaj zapatero karqa, huertastapis allinchaj. Chaytaj, Países Bajospa Drenthe nisqa provincianpi tarikun. Noqaqa chay llajtitapi 1927 watapi nacekorqani, qanchis wawasmantataj chaupi kaj kani. Wasiykoqa campopi jallpʼa ñan patapi karqa, yaqha tukuy vecinosniykutaj chajra runas karqanku. Noqapajtaj chay kausayqa sumaj karqa. Kay 1947 watapeqa 19 watayoj kashajtiy, Theunis Been nisqa vecinoy cheqa yachachiymanta willariwarqa. Payqa ñaupajta mana allin runachu kaspa jinarqa. Chaywanpis Iskay Kaj Guerra Mundial tukukusqanmanta pisi tiemponman, Testigoman tukuspa aswan kʼacha runa karqa. Noqataj imaraykuchus ajinaman tukusqanta yachayta munaspa, Jallpʼata uj paraisoman Dios tukuchinanta willariwasqanta uyarerqani, usqhayllatataj bautizakorqani. Chaymantapachataj sumaj amigos karqayku.a

Kay 1948 watapitaj mayo killapi willayta qallarerqani, 20 junio killapitaj uj jatun tantakuypi bautizakorqani, Utrecht nisqa llajtapi. Chantá 1949 watapi, enero killapi precursor kayta qallarerqani, Países Bajospi tarikoj Borculo nisqa llajtitamantaj kachasqa karqani, maypichus uj juchʼuy qotuchakuylla karqa. Chayman rinaypajqa 130 kilometrosta viajanay karqa, sojta horasllapi chayanayta yuyaspataj bicicletallapi kachaykukorqani. Chaywanpis mayta parasqanrayku, sinchʼita wayrasqanrayku ima 12 horaspipuni chayarqani, 90 kilometrostataj trenpiraj rerqanipis. Tutatataj Testigo familiaj wasinman chayarqani. Chaypi precursor jina kashaspaqa wasinkupi tiyakorqani.

Runasqa guerra pasayta wajchaslla karqanku. Noqajtapis uj ternowan, uj pantalonllawan kapuwarqa, ternoyqa ancha jatun, pantalonniytaj juchʼuysitu. Qallariypi nerqani jina, Borculo llajtitapi killallataraj kashajteyqa mana willayta atillarqanichu. Chaywanpis Jehovaj yanapayninwan, ashkha runasman Bibliamanta yachacherqani. Jisqʼon killanmantaj Ámsterdam llajtaman kachasqa karqani.

CAMPOMANTA, LLAJTAMAN

Campopi wiñakuspapis, Ámsterdam llajtapi kasharqani, chaytaj Países Bajos nisqaj aswan jatun llajtan. Chaypeqa runas sumajta uyarikoj kanku, pasaj jisqʼon killasmanta nisqataj uj killallapi ashkha publicacionesta saqerqani. Niraj unayninman, pusaj runasman jinaña Bibliamanta yachachisharqani. Chantá qotuchakuymanta ancianosta umachaj jina kanaypaj sutichasqa kajtiy, ñaupaj kutirayku umallirichinayta niwarqanku. Chayta yachaspataj mancharikorqani, chayrayku niraj umallirichinay kashajtin waj qotuchakuyman kachasqa kajtiy mayta kusirikorqani. Chaywanpis, mana yacharqanichu watasninman 5.000 kutis kurajta umallirichinaytaqa.

Kay 1950 watapi mayo killapi, Haarlem nisqa llajtaman kachasqa karqani. Aswan qhepaman, qotuchakuykunata waturinayta niwajtinku kinsa tutatapuni mana puñuyta aterqanichu. Chantapis hermano Robert Winkler nisqaman, pichus sucursalpi llankʼaj, mana chaypaj jinachu kasqayta nerqani. Paytaj: “Solicitudta juntʼachillay, yachakullanki”, nispa niwarqa. Chaymantaqa killata wakichiwasqankutawan, qotuchakuykunata waturiyta qallarerqani. Ujnin qotuchakuyta waturishaspaqa Janny Taatgen sutiyoj sipas precursorata rejserqani, pichus Jehovata mayta munakorqa, maytataj kallpachakusharqa. Kay 1955 watapitaj paywan casarakorqani. Chaywanpis, niraj noqamanta astawan parlashajtiy, warmiy imaynatachus precursora jina llankʼayta qallarisqanmanta willarisonqachej.

QHARIWARMI DIOSTA SIRVIYKU

Janny: Mamayqa 1945 watapi Testigoman tukorqa, 11 watayoj kashajtiy. Payqa Bibliamanta yachakuyta qallarisqanmantapacha kinsantin wawasninman yachachiwarqayku. Chaywanpis tatay churanakusqanrayku, mana wasipi kashajtin yachachiwaj kayku.

Manaraj uj tantakuyman rishaspaqa 1950 watapi uj jatun tantakuyman rerqani, chaytaj La Haya nisqa llajtapi ruwakorqa. Semananmantaj Assen (Drenthe) nisqa llajtitapi ruwakoj tantakuyman ñaupaj kutirayku rerqani. Tatayqa chaymanta mayta phiñarikuspa, wasimanta wijchʼuwarqa. Mamaytaj: “Yachankiña maymanchus rinaykita waway”, nispa niwarqa. Chayta nispaqa hermanosmanta parlashasqanta repararqani. Chayrayku, qayllallapi tiyakoj hermanospa wasinkuman riporqani. Chaywanpis tatayqa churanakullawarqapuni, chayrayku Deventer (Overijssel) nisqa llajtitapi qotuchakuyman riporqani, chaytaj 95 kilometrospi jina tarikorqa. Chaywanpis autoridadesqa chayta yachaspa, wawallaraj kasqayrayku tatayta juchacharqanku. Chayrayku tatayqa wasiman kutipunayta niwarqa. Tatay ni jaykʼaj cheqa kajta japʼikojtinpis, tantakuykunaman, willayman ima rejta saqellawarqaña.

Wasiyman kutipusqaymanta pisi tiemponman mamay mayta onqoykusqanrayku, wasi ruwanaswan qhepakorqani. Jinapis ñauparillaspapuni 1951 watapi bautizakorqani, 17 watayoj kashajtiy. Mamay kutirisqantawantaj 1952 watapi, kinsa precursoraswan iskay killata precursora auxiliar jina karqani. Chay killaspeqa uj barcopi tiyakorqayku, Drenthe nisqa provinciaj iskay llajtitasninpitaj willarqayku. Kay 1953 watapitaj precursora regular kayta qallarerqani. Watanmantaj uj joven hermano qotuchakuyniykuta waturej jamorqa. Payqa Markus karqa, Jehovata khuska astawan sirviyta atinaykuta yuyaspataj, 1955 watapi mayo killapi casarakorqayku (Ecl. 4:9-12).

Markus: Casarakusqaykutawan, Veendam (Groninga) nisqa llajtaman precursores jina kachasqa karqayku. Chaypeqa saytʼunman 3 metroyoj, anchonmantaj 2 metroyoj cuartitollapi tiyakorqayku. Jinapis warmeyqa kʼachituman tukucherqa. Chaywanpis, camaykuta mastʼakunaykupajqa mesaykutawan iskay juchʼuy sillasniykutawan sapa chʼisi kʼuchunchanayku kaj.

Sojta killanmanqa Bélgica suyuman qotuchakuykunata waturinaykupaj kachasqa karqayku. Chaypeqa, 4.000 willajkuna jinalla suyuntinpi karqa, kunantaj 24.000 willajkunamanta astawanña tiyan. Belgicaj uranejninpi Flandes nisqa llajtapeqa Países Bajospi parlasqanku qallullatataj parlanku, chaywanpis uj jinata. Chayrayku qallariypeqa mana willayta atillarqaykuchu.

Janny: Qotuchakuykunata waturinaykupajqa bicicletapi rej kayku, hermanospa wasinkupitaj qhepakoj kayku, jinapis kusiywan chayta ruwaj kayku. Chantapis, waj qotuchakuymanqa martes paqarillantaña rej kayku. Chaywanpis chay ruwaytaqa Jehovaj bendicionninta jinapuni qhawaj kayku.

Markus: Qallariypeqa qotuchakuykunamanta ni mayqen hermanota rejserqaykuchu. Chaywanpis paykunaqa may kʼachas karqanku, wasinkumantaj wajyarikullawaj kayku (Heb. 13:2). Watasninmanqa Belgicapi holandés qotuchakuykunata ashkha kutista waturerqayku. Chaytaj may sumaj karqa, imajtinchus holandés distritomanta yaqha tukuynin hermanosta rejserqayku, munakorqaykutaj. Chantapis, may chhika jovenesta, sipaskunata ima wiñajta, Diospa llajtanpitaj ñauparejta rikorqayku. Paykunaqa kausayninkuta Jehovaman qospa, Reinonta ñaupajman churarqanku. Paykunamanta ashkhas Jehovata astawan sirvishasqankuta rikuspa mayta kusikuyku (3 Juan 4). Paykunawan “purajmanta” kallpachanakusqaykoqa ruwayniykuta tukuy sonqo juntʼanaykupaj yanapawayku (Rom. 1:12).

JATUN LLAKIYTAJ JATUN BENDICIONTAJ

Markus: Galaad Escuelamanqa casarakusqaykumantapacha riytapuni munarqayku. Chayrayku inglés qalluta sapa pʼunchay uj horata jina yachakoj kayku. Chaywanpis librosllamanta mana yachakuyta atisqaykurayku, vacacionespi Inglaterraman willaj rej kayku. Jinallapi 1963 watapi Brooklyn centralmanta uj carta chamuwarqayku. Chaypitaj iskay cartas kasqa ujnin noqapaj, ujnintaj warmiypaj. Noqataqa Galaad Escuelapi chunka killata kanaypaj wajyarishawarqanku. Chay escuelapeqa hermanosta wakichikunan karqa Diospa llajtanta ñaupajman apanankupaj. Chayrayku, 100 wajyarisqa kajkunamantaqa 82 qharis karqayku.

Janny: Apachimuwasqanku cartapeqa qosay Galaad Escuelapi kashanankama, sichus Belgicapi qhepakuyta munasqayta tapushawarqanku, Diosmanta mañakuspataj chaypi tʼukurinayta nishawarqanku. Chayta leespaqa sonqo pʼakisqa kasharqani, kallpachakusqayta Jehová mana bendecisqanta yuyarqani. Chaywanpis yuyarikorqani, Galaad Escuelaqa chayman rejkunata wakichinapaj kasqanta, sumaj willaykuna Jallpʼantinpi willasqa kananpaj. Chayrayku, Gante nisqa llajtapi precursora especial jina qhepakorqani. Chaypeqa iskay hermanaswan karqani: ujqa Anna sutikorqa, ujnintaj Maria, pikunachus unayña precursoras especiales karqanku.

Markus: Inglés qalluta astawan yachakunay kasqanrayku, niraj Galaad Escuela qallarikushajtin phishqa killa ñaupajta Brooklynman wajyariwarqanku. Chaypeqa Departamento de Envíos chantá Departamento de Servicio nisqapi llankʼarqani. Asiapi, Europapi chantá América del Sur nisqapi qotuchakuykunaman, Diospa llajtanpa centralninmanta publicacionesta apachispa yanapakusqayrayku, Jallpʼantinpi hermanosta aswan sumajpaj qhawarqani. Chantapis, hermano Alexander H. Macmillanmanta yuyarikunipuni. Payqa hermano Charles T. Russell kausashajtin, qotusta waturispa llankʼasqa. Chantapis machituña, pisi ninrisitutaj kajtinpis tukuy tantakuykunaman rejpuni. Chaytaj, hermanoswan tantakuyta ni jaykʼaj saqenata yachachiwarqa (Heb. 10:24, 25).

Janny: Maytapuni faltachanakusqaykurayku, semanapi ashkha kutista cartasta qhelqanakoj kayku. Chaywanpis payqa Galaadpi yachakushasqanmanta may kusisqa kasharqa, noqataj willaypi sumaj rishawasqanmanta. Qosay Estados Unidosmanta kutinpushajtenqa 17 runasman Bibliamanta yachachisharqani. Payqa wata kinsa killayojtapuni chinkarqa, chaytaj jatun llakiy karqa, chaywanpis Jehová bendeciwasqaykuta rikorqani. Kutinpushajtenqa avión mana horanpichu chayamorqa, chayrayku chayamojtin waqaspa taripanakorqayku. Chaymantapachataj khuskallapuni kayku.

RUWAYKUNATA JAPʼISQAYKUMANTA MAYTA AGRADECEKUYKU

Markus: Galaadmanta, 1964 watapi diciembre killapi kutinpusqaytawan Betelman wajyarisqa karqayku. Chaypeqa pisi tiempollata karqayku, imajtinchus kinsa killanman Flandes nisqa llajtaman superintendente de distrito jina kachasqa karqayku. Chaywanpis hermano Aalzen Wiegersma, warmin Elswan Belgicaman misioneros jina jamusqankurayku, paykuna cuentaykumanta llankʼarqanku, noqaykutaj Betelman kuterqayku. Chaypitaj Departamento de Servicio nisqapi llankʼarqani. Kay 1968 watamanta 1980 watakamaqa Betelpi sirvispataj, qotuchakuykunata waturispataj karqayku, jinallataj 1980 watamanta 2005 watakamapis superintendente de distrito karqani.

Ruwayniyku sapa kuti tijrakojtinpis, kausayniykuta Jehovata yupaychanaykupaj qosqaykuta mana qonqaykuchu. Chaykunatataj kusiywan ruwarqayku. Chantapis Diospa Reinonmanta willay ñaupajllamanpuni rinanpaj kasqanta yacharqayku.

Janny: May kusiy karqa qosaywan khuska Brooklynman 1977 watapi risqayku, 1997 watapitaj Pattersonman, maypachachus qosay Sucursalespi Kamachejkunapaj Escuelapi karqa.

JEHOVÁ YACHAN IMATACHUS NECESITASQANCHEJTA

Markus: Kay 1982 watapeqa warmiy operachikorqa, sumajllatataj kutirerqa. Kinsa watanmantaj, Lovaina llajtapi qotuchakuymanta hermanos, Tantakuna Wasej altosninta tiyakunaykupaj qowarqayku, 30 watasmanta ñaupaj kutirayku noqallaykupaj uj wasisitu karqa. Marteskunapeqa uj qotuchakuyta waturej rinaykupaj, qʼepisniykuta altosmanta apaqanaypaj 54 gradasta kutin kutita wicharej kani. Chayrayku, 2002 watapi waj wasisituta qowasqayku may sumaj karqa, imajtinchus niña altospichu tiyakorqayku. Noqa 78 watayoj kashajtiytaj, Lokeren nisqa llajtaman precursores especiales jina kachasqa karqayku. Chaymanta, sapa pʼunchayraj willayman riyta atisqaykumantapis, may kusisqa kashayku.

Janny: Kunankamaqa iskayniykumanta 120 wata kurajtaña Jehovapaj llankʼayku. Chantapis Jehová: “Mana wijchʼurparisqaykichu” nisqanta juntʼasqanta rikuyku. Arí, Payman cheqa sonqo kajtinchejqa mana “imatapis” pisichiwanchejchu (Heb. 13:5; Deu. 2:7).

Markus: Jovenllaraj kashajtiyku Jehovaman qokorqayku. Ni jaykʼaj ashkha kapuyniyoj kaytaqa maskʼarqaykuchu. Diospa llajtanpi ima ruwaytapis japʼikorqaykupacha. Imajtinchus, imata ruwaspapis chayri maypi kaspapis Jehovata sirviy aswan sumaj kasqanta yachayku.