BIBLIAJ KUTICHIYKUNASNIN
¿Tukuy religioneschu Diosta yupaychanku?
Noticiasta uyarispa ichá reparanki wakin kutisqa, religionpa sutinpi millay imasta ruwasqankuta. Chayrayku nisunman mana tukuy religioneschu cheqa Diosta yupaychasqankuta (Mateo 7:15). Ashkha runas, chʼaukiyasqas kashanku. (1 Juan 5:19 leey.)
Diosqa yachan kʼacha sonqoyoj runasqa, cheqa kajta, cheqan kajtawan munakusqankuta (Juan 4:23). Chayrayku Bibliapi cheqa yachachiyta maskʼanankuta munan. (1 Timoteo 2:3-5 leey.)
¿Imaynatá cheqa religionta tariwaj?
¿Imaynatá Jehová runasta tukuy laya religionesmanta ujchashan? Cheqa kajta, purajmanta munanakunankuta ima yachachispa (Miqueas 4:2, 3). Purajmanta munanakuyta, rikuchisqankutachus manachus qhawarispa, mayqenchus chay cheqa religión kasqanta yachayta atiwaj. (Juan 13:35 leey.)
Jehovaqa cheqa religionnejta tukuy laya runasta ujchashan uj sonqolla kausakunankupaj. (Salmo 133:1)
Diospa kamachisnenqa Bibliaj yachachiykunasninpi creenku, kamachisqasnintataj kasukunku (2 Timoteo 3:16). Diospa sutintapis jatunpaj qhawanku (Salmo 83:18). Chantapis Diospa Reinollan runaj chʼampayninta allinchananta yachachinku (Daniel 2:44). Paykunaqa Jesús jinallataj kʼanchayninkuta kʼanchachinku vecinosninkupaj allin kajta ruwaspa (Mateo 5:16). Chayrayku paykunaqa sutʼita rejsichikunku, imaraykuchus wasimanta wasi Diospa Reinonmanta willanku, mayqenchus uj sumaj kausayta apamonqa. (Mateo 24:14; Hechos 5:42; 20:20 leey.)