BIBLIAJ KUTICHIYKUNASNIN
¿Kanmanchu Jallpʼantinpaj uj gobiernolla?
Imaynatá Jallpʼantinta kamachej gobierno tukuy nacionesmanta runasta ujchanman (Isaías 32:1, 17; 54:13)
Jina kajtenqa sumajchá tukuy runaspaj kanman. Kay tiempopeqa ashkha runas ñakʼarinku wajchas kasqankurayku, wakillantaj qhapaj kanku. Jallpʼantinta kamachej gobiernoqa runaspa llakiyninkumanta yachaspa tukuy necesitasqankuta qoyta atinman. ¿Runas chay jina gobiernota rikhurichiyta atinkumanchu? (Jeremías 10:23 leey.)
Tiempo pasasqanman jina gobiernosqa, runasta ñakʼarichillanku, astawanraj wajchastaqa. Wakenqa rumi sonqos ima kanku (Eclesiastés 4:1; 8:9). Chaywanpis, tukuy atiyniyoj Diosqa tukuynin gobiernosta chinkachenqa, uj kamachejtataj churan runasta yanapananpaj. (Isaías 11:4; Daniel 2:44 leey.)
¿Imatá Diospa Reinon ruwanqa?
Jehovaqa Wawan Jesucristota Reinonpi kamachinanpaj ajllarqa. Payllataj kamachinanpaj jina (Lucas 1:31-33). Jesusqa Jallpʼapi kashaspa, runasmanta llakikorqa. Kunanqa Reyña, tukuy llajtasta ujchanqa, llakiyninkutataj chinkachenqa. (Salmo 72:8, 12-14 leey.)
¿Tukuychu Jesusta reyninkuta jina qhawanku? Mana. Chaywanpis Jehovaqa pacienciakun (2 Pedro 3:9). Chayrayku tukuy runasta suyashan Jesusta reyninkuta jina qhawanankupaj. Tumpamantawan Jesusqa sajra runasta chinkachenqa, Jallpʼantinpitaj allin kausay kanqa, niñataj sajra ruway kanqachu. (Miqueas 4:3, 4 leey.)