TAPANMANTA | ¿IMARAYKÚ JESÚS WAÑORQA?
¿Jesús kausarimorqapunichu?
Jesustaqa 33 watapi wañucherqanku. Chʼajwata rikhurichejta jina tumparqanku, maqarqanku, kurkumantaj clavaykorqanku. Mayta ñakʼarispa wañuporqa. Chaywanpis Dios watejmanta kausaricherqa, 40 pʼunchayninmantaj cieloman riporqa.
Chaytataj Bibliapi Mateo libromanta Juan librokama parlashan, chayri Mosoj Testamento nisqapi. ¿Chaypi nisqan kanmanpunichu karqa? Chayqa tʼukurinapaj jina. Cristochus mana kausarimunman karqa chayqa, creesqanchej, wiñay kausayta suyakusqanchej imaqa qhasi manakajlla kanman (1 Corintios 15:14). Jinapis Jesús kausarimusqanrayku, runaspaj uj sumaj suyakuy tiyan. Chayrayku Mateo libromanta Juan librokama parlasqan, ¿cheqapunichu?
¿IMASTAJ RIKUCHIN JESÚS KAUSARIMUSQANTAPUNI?
Bibliaqa maychus kajtapuni willan, llulla cuentosmanta nisqaqa. Unay tiempomanta qhelqajkunaqa, Jesuspa tiemponpi kausaj runaspa, lugarespa sutisninkuta ima oqharinku. Chaykunamanta wakin lugaresqa kunankama kashallankupuni (Lucas 3:1, 2, 23).
Ñaupa cristianospa tiemponpi kausaj runaspis, Jesusmanta qhelqallarqankutaj.a Mateo libromanta Juan librokama nisqanman jinaqa, Jesusta wañucherqanku, imaynatachus romanos runasta wañuchej kanku ajinallatataj. Chantapis Bibliaqa maychus kasqantapuni nin, Jesuspa wakin yachachisqasnin imaspichus pantasqankutapis (Mateo 26:56; Lucas 22:24-26; Juan 18:10, 11). Chaytaj rikuchin Jesuspa kausayninmanta qhelqajkunaqa sutʼita, ni imata pakaspataj qhelqasqankuta.
¿JESÚS KAUSARIMORQAPUNICHU?
Ashkha runas Jesús kausasqantapuni creenku. Jinapis wakenqa mana creenkuchu kausarimusqanta. Apostolesninpis qallariypi nillataj creerqankuchu (Lucas 24:11). Chaywanpis, paykuna, wajkuna ima Jesusta kausarimusqantawan rikorqanku, mana uj lugarllapichu, nitaj uj kutillatachu. Uj kuteqa rikorqanku, phishqa pachaj runasmanta astawan (1 Corintios 15:6).
Jesuspa yachachisqasnenqa, wisqʼasqas, wañuchisqastaj kanankuta yachaspapis, mana manchachikuspa Jesús kausarimusqanmanta tukuyman willarqanku, Jesusta wañuchejkunamanpis (Hechos 4:1-3, 10, 19, 20; 5:27-32). Jesús kausarimusqanmanta iskayrayaspaqa, nichá ajinata mana manchachikuspa willankumanchu karqa. Astawanpis cristianosqa Jesús kausarimusqanrayku jaqay tiempopi jina kunanpis willashallankupuni.
Biblia Jesús wañuchisqa kasqanmanta, kausarichisqa kasqanmanta ima parlasqanqa cheqapuni kasqanta rikuchin. Qan Bibliata sumajta leerinki chayqa, mana iskayrayankichu Jesús kausarimusqanmanta. Chantapis imaraykuchus Jesús wañusqanta sutʼita entiendespaqa chaypi creesqayki astawan kallpachasqa kanqa. Qhepan yachaqanapitaj chayta qhawarisun.
a Tácito, pichus 55 wata chaynejpi nacekorqa. Payqa qhelqarqa: ‘Cristota, Poncio Pilato wañuchichisqanta Tiberio kamachishajtin’, nispa. Wajkunataj karqanku, Suetonio, judío Josefo (1-100 watas chaynejpi), Plinio ima, pichus Bitiniapi kamachej karqa (101 watas qallariypi).