¿Cristianos santuariospipunichu Diosta yupaychananku tiyan?

SAPA wata, Japón suyupi 6 millonesmanta astawan runas península Shima nisqaman rinku. Gran Santuario de Ise nisqaman chayaspataj, Amaterasu Omikami nisqa china diosta yupaychanku. Chay diosqa Intej diosnin sintoismo religionmanta, 2.000 watasta jinañataj yupaychanku. Chayman rejkunaqa llimphuchakunku makisninkuta, siminkuta ima mayllakuspa. Chaymantataj maypichus yupaychanku chay wasej ñaupaqenpi sayaykukunku, tʼajllakunku, chay diosmantaj rezakunku.a Chay religionmanta kajkunaqa waj religionespa costumbresnintapis ruwallanku. Chantá budista religionmanta kajkuna, cristiano nichikojkuna, waj religionesmanta ima, chay lugarpi sintoismo religionpa costumbresninta ruwallanku.

Rejsisqa religionesqa uj santuarioyojb kanku, ashkhastaj chaykunaman rinku. Chantapis ashkha suyuspeqa, iglesiasta, capillasta ima ruwanku, Jesusta, Mariata, santosta ima yuyarinankupaj. Wakin iglesiastaqa ruwanku chaypi ñaupa tiempopi Diospa kamachisnin kausasqankurayku, chayri chay lugarpi “uj milagro” kasqanta yuyasqankurayku, ñaupa imasta chaypi jallchʼasqankuraykutaj. Ashkha runastaj creenku chayman rispa mañakojtinku Dios uyarinanta. Wakenqa karumanta chay santuariosman rinku Diosta yupaychashasqankuta rikuchinankupaj.

¿Dios uyarinawanchejpaj uj santuariopipunichu mañakunanchej tiyan? ¿Allinpajchu Dios qhawan runas chay lugaresman risqankuta? Cristianosrí, ¿uj santuariopipunichu Diosta yupaychananku tiyan? Chayta ukhuncharispaqa, yachasun imaynatachus chayta qhawanata, chantapis imatachus Diosta kusichinapaj ruwananchej kasqanta.

DIOSTAQA “ESPIRITUPI CHEQAPITAJ YUPAYCHANANKU TIYAN”

Jesusqa, Samaria llajtanejta viajasharqa, purisqanpi saykʼuspataj Sicar nisqa llajtaman chayaspa pujyu qayllapi tiyarikorqa. Chaypitaj Samaria llajtayoj warmiwan parlarerqa, pichus yakuta orqhoj jamusqa. Parlashajtinkutaj, chay warmi nerqa judioswan samaritanoswan mana kikintachu Diosta yupaychasqankuta. Jesús chay warmiwan parlarisqanqa rikuchin imaynatachus Dios santuariospi payta yupaychayta qhawasqanta. Chay warmi nerqa: “Ñawpa tatasniykoqa kay orqopi Diosta yupaycharqanku, qankuna judiosrí ninkichej Jerusalenllapi yupaychana kasqanta”, nispa (Juan 4:5-9, 20).

Chay warmeqa Gerizim orqomanta parlasharqa, mayqenchus Jerusalén llajtamanta 50 kilometrospi jina kasharqa. Samaritanosqa chaypi uj templota ruwasqanku Pascua fiestata, waj fiestasta ima ruwanankupaj. Chaywanpis Jesusqa mana maypipunichus Diosta yupaychanankutachu sutʼincharqa. Astawanpis chay warmita nerqa: “Warmi, creeway. Horaqa chayamushanña, chaypachataj mana kay orqopichu, nitaj Jerusalenpichu Dios Tatata yupaychankichej”, nispa (Juan 4:21). Jesús, judío kashaspa chayta nisqanqa tʼukunapaj jina karqa. ¿Imaraykutaj Diosta niña templopichu yupaychakunman karqa?

Jesús nillarqapuni: “Hora chayamushanña, kunantaj chay horapi kashanchej. Dios Tatata cheqamanta yupaychajkunaqa, espiritupi cheqapitaj yupaychanqanku. Dios Tataqa, ajinata yupaychanankuta munan”, nispa (Juan 4:23, Qheshwa Biblia, [QB]). Judiosqa ashkha watasta Jerusalén templopi Diosta yupaycharqanku. Chaymantaj watapi kinsa kutita rej kanku, Jehová Diosninkuta yupaychanankupaj (Éxodo 23:14-17). Chaywanpis Jesusqa nerqa “espiritupi cheqapitaj” yupaychanankuta.

Jerusalén temploqa uj lugarpi rikunapaj jina ruwasqa kasharqa. Chaywanpis espiritupi cheqapitaj Diosta yupaychayqa mana rikukunchu. Chayrayku Jesusqa sutʼincharqa Diostaqa mana Gerizim orqopichu, nitaj Jerusalén templopichu, chayri waj lugarpichu yupaychana kasqanta.

Chantapis Jesusqa samaritana warmiwan parlarishaspa nillarqataj, Diosta waj jinamanta yupaychakunanpaj hora chayamushasqantaña. Chay horataj chayamorqa Jesús kausayninta qojtin, jinamanta judíos Moisespa Leyninman jina yupaychasqankuta juntʼarqa (Romanos 10:4). Jinapis Jesús nerqa: “Hora chayamushanña, kunantaj chay horapi kashanchej”. ¿Imaraykú chayta nerqa? Imaraykuchus Jesusqa Mesías jina, yachachisqasninta tantasqaña, pikunachus kay kamachiyta kasukunanku karqa. “Diosqa Espiritumin; payta yupaychajkunaqa espiritupi cheqapitaj yupaychananku tiyan” (Juan 4:24, [QB]). ¿Ima niyta munan espiritupi cheqapitaj yupaychay?

Jesusqa parlasharqa Diospa espíritu santonwan yanapachikunamanta, mayqenchus Diospa Palabranta, waj imastataj entiendenapaj yanapawanchej (1 Corintios 2:9-12). Cheqataj, Bibliapi cheqa kajmanta yachakusqanchej kasqanta nerqa. Chayrayku Diosta yupaychananchej tiyan Biblia yachachisqanman jina, espíritu santowantaj yanapachikunanchej tiyan.

¿IMAYNATATAJ CRISTIANOS SANTUARIOSTA QHAWANKU?

Santuariosman riyta chaypi Diosta yupaychayta ima, ¿imaynatá cristianos qhawananku tiyan? Diosta uj santuariopi, chayri waj lugarpi runas yupaychasqankoqa qhasilla. Imaraykuchus Jesusqa nerqa Diospa kamachisninman imaynatachus espiritupi, cheqa kajpitaj Diosta yupaychanankuta. Chantapis Bibliapi nin, Diosqa santosta yupaychayta mana allinpajchu qhawasqanta. Chayrayku nin: “Ayqekuychej lantista yupaychanamanta” “lantismanta waqaychakuychej” (1 Corintios 10:14; 1 Juan 5:21). Chantapis cheqa cristianosqa mana may santopaj qhawasqa lugarpichu Diosta yupaychananku tiyan, nitaj lanti yupaychayman tanqananpaj jina lugarpichu. Astawanpis imapajchus santuarios kasqanta yachasqankurayku, cristianosqa mana chaykunaman Diosta yupaychaj rinankuchu tiyan.

Chaywanpis Diospa Palabranqa uj lugarpi paymanta mañakunata, estudianata, chayri tʼukurinata mana juchachanchu. Astawanpis, Diosmantaqa uj llimphu lugarpi tantakuspa aswan sumajta yachakunchej. Chantapis wakin runas wañupoj familiaresninkoj sutisninkuta yuyarikunankupaj rumispi ruwachisqankoqa mana juchachu. Chayqa wañupojta munakusqankuta rikuchinallankupaj kanman. Chaywanpis, ¿imataj mana allinchu? Chayta uj santota jina qhawaspa yupaychay, imajtinchus chayqa Jesús yachachisqanman jina jucha.

Chayrayku mañakusqaykita Dios uyarisunanpajqa mana uj santuariomanpunichu rinayki tiyan. Diosqa mana chayman risqaykiraykuchu astawan bendecisonqa. Bibliaqa nin Jehová Dios, pichus “janaj pachajta, kay pachajtapis Señornin. Manataj payqa runaj ruwasqan templopichu” tiyakusqanta. Jinapis Diosmanqa qayllaykuyta atinchej. Mañakojtinchejtaj pay uyariwasunpuni, imajtinchus “mana karupichu kashan sapa ujninchejmanta” (Hechos 17:24-27).