¿Wañupojtinchej imallanchejpis kausashallanpunichu?

RUNASQA kausaymanta, wañuymantawan tukuy imata ninku. Wakenqa yuyanku wañuytawan waj lugarpi kausanallankutapuni. Wakintaj yuyanku waj runapi chayri uj animalpi nacekunankuta. Wajkunatajrí yuyanku wañupojtinchej kausayninchej tukukusqanta.

Ichá qanqa maypichus uywasqa kasqaykiman jina chayri waj lugarpi uywasqa kasqaykiman jina, mana kikintachu yuyanki. Runasqa wañuymanta tukuy imata creenku. Jinapis, ¿yachayta atisunmanchu wañuspa maymanchus risqanchejta?

Ashkha watasta iglesiasta kamachejkunaqa runa wañupojtin imallanpis kausashallasqantapuni yachachinku. Ashkha religiones hinduismos, judaísmos, musulmanes, cristianos kayku nejkuna ima, yachachinku runa wañupojtin imallanpis kausashallasqantapuni. Budistastaj creenku uj runa wañupuspa kutin kutita nacekusparaj ñakʼariymanta llojsisqanta, ajinamanta wiñaypaj kusisqa kananta ima.

Tukuy kay yachachiykunarayku runas creenku pillapis wañupojtin waj lugarpi kausashallasqantapuni. Chayrayku ashkha runas yuyanku wañunanchejpajpuni Dios ruwawasqanchejta. Jinapis, ¿imatataj Biblia nin? Chaypajqa qhepan yachaqanata leeriwaj. Imatachus nisqanqa ichapis mana yuyasqaykiman jinachu kanman.