Jatun llakiykuna kajtin

Sierra Leonamanta, Andrés nin: “Manchay llakisqa kasharqayku, nitaj ni imata ruwayta aterqaykuchu. Imaraykuchus yakuwan tʼuruwan tukuy imaykuta pʼampaykorqa”, nispa.

Islas Virgenesmanta, David nin: “Sinchʼi wayra pasasqantawan wasiykuman kutiporqayku, tukuy imaykutataj wayra apakapusqa. May llakisqa kasharqayku. Wawaykoqa qonqoriykukuspa waqarikorqa”, nispa.

MAYKʼAJLLAPIS ajina llakiypi rikukorqanki chayqa, yachankiñachá ajina llakiypi kajkuna imaynatapunichus sufrisqankuta. Ashkhasqa ajina llakiypi kaspa ni imata ruwayta atinkuchu, wañullaytañataj munanku.

Sinchʼi wayrapi, loco parapi chayri chayman rijchʼakoj llakiykunapi tukuy imaykita pierdesqaykirayku, ichá niña kausayta munankichu. Ichá yuyashanki: “Imapajñá kausaymanri”, nispa. Jinapis Bibliaqa niwanchej mana qhasipajchu kausashasqanchejta. Imajtinchus uj sumaj kausayta suyakushanchej.

BIBLIAJ NISQAN SONQOCHAWANCHEJ

Santiago 5:11 nin: “Pikunachus aguantarqanku chaykunata, kusikuyniyoj kasqankuta ninchej”, nispa. Sinchʼi wayrapi chayri loco parapi rikukorqanki chayqa, ichá yuyashanki kausanaykipaj kallpachakusqayki qhasillaña kasqanta. Jinapis pacienciawan kallpachakullankipuni chayqa allin risonqa.

Bibliaqa niwanchej aswan qhepaman ‘manaña jaykʼajpis waqajkunata uyarikunanta, nitaj llakiywan qhaparejkunatapis’ (Isaías 65:19). Chaytaj juntʼakonqa Diospa Gobiernon kay jallpʼata uj paraisoman tukuchejtin (Salmo 37:11, 29). Chaypachaqa manaña kanqachu loco wayras, loco paras, ni waj llakiykunapis. Kay tiempopi ñakʼarisqanchejmantaqa niña ujtawan yuyarikusunchu. Diosninchejqa niwanchej: “Chay ñawpaj kajkunaqa qonqasqa kanqa, manapunitaj yuyarisqachu kanqa”, nispa (Isaías 65:17).

Diosninchejqa allinta kausakunanchejpaj uj suyakuyta qowanchej, aswan qhepamanpis allin kausayllatapuni tarinanchejpaj. Payqa munan Gobiernonpi sumajta kausakunanchejta (Jeremías 29:11). Chay suyakuypi tʼukureyqa ñaupajman rinallaykipajpuni mayta yanapasunkiman. Ñaupaj yachaqanapi Saidamanta parlarerqanchej. Pay nin: “Diospa Gobiernon kamachishajtin imaynatachus kausakunanchejpi piensareyqa, ima llakiykunapichus rikukusqanchejta qonqanapaj yanapawanchej, nitaj llakiykunasninchejwan atipachikusunchu”, nispa.

¿Imastawantaj Diospa Gobiernon tumpamantawan ruwanqa? Sumaj kanman chayta yachakunayki. Ajinamanta reparanki ñakʼarerqanki chaypis mana qhasipajchu kausashasqaykita, llakiykunapis chinkananta. Bibliaj yuyaychaykunasnenqa kay tiempopi llakiyniykita aguantanaykipaj yanapasonqa. Chaymanta astawan yachakuna.

Kay textos yanapasunkiman

Sumajta samarikuy

“Aswan walej uj makillata juntʼachiy, mana anchata phutikuspa, iskay makita mayta phutikuspa juntʼachinamanta nisqaqa; chayqa wayra japʼiyta munay jinalla” (Eclesiastés 4:6).

Yachayniyoj runas nisqankuman jina, uj jatun llakiyta pasaytawan mana allinta puñuspaqa, onqoykusunman, nitaj llakiyninchejta aguantayta atillasunmanchu. Chayrayku allintapuni samarikuna tiyan.

Llakiyniykita pimanpis willariy

“Phuteyqa runata mana allinman tukuchin, miskʼi palabrasrí sonqonta tʼikarichin” (Proverbios 12:25).

Llakiyniykita ujnin familiarniykiman chayri sumaj amigoykiman willariy. Paykunaqa mana uyarillasonqankuchu, manaqa kallpacharisonqanku, yuyaycharisonqankutaj.a

Sumaj kausay kananpi piensariy

“Noqanchejtajrí mosoj cielota, mosoj jallpʼatawan suyakushanchej, pay qonanta nisqanman jina. Chaypitaj cheqan kausaylla kanqa” (2 Pedro 3:13).

a Uj runa manchay llakisqa kajtin, chayri unayta llakisqallapuni kajtenqa doctorman rinan tiyan.