Qosayki chayri warmiyki wasanchasojtin
CASARASQAS wasanchanakojtinkoqa may llakiypi rikukunku. Wakin runasqa wasanchaj warminkuta chayri qosankuta perdonanku, watejmantataj allinta kausakunku.a Jinapis wakin kutisqa mana wasanchaj qosa chayri warmeqa chaymanta yuyarikuspa mayta llakikullanpuni. ¿Imataj paykunata yanapanman?
BIBLIA YANAPASUNKIMAN
Ashkha casarasqasqa, sonqo pʼakisqas kaspapis, Bibliapi sonqochayta tarerqanku. Paykunaqa Bibliata leespa repararqanku Dios llakiypi kashasqankuta yachasqanta, paykunamantataj llakikusqanta (Malaquías 2:13-16).
“Sonqoy ukhupi ashkha llakiyniyoj kashajtiy, sonqochawasqaykeqa almayta kusicherqa” (Salmo 94:19).
Bill nin: “Kay versiculota leespaqa, Jehová uj munakuyniyoj tata jina mayta munakuwasqanta repararqani”, nispa.
“Qanqa, Tata Dios, khuyajtaqa khuyallankitaj” (Salmo 18:25).
Carmentaqa qosan ashkha killasta wasanchasqa. Pay nin: “Qosay wasanchawarqa, jinapis yacharqani Jehová Diosqa ni jaykʼaj saqerpanawanta”, nispa.
“Ama imamantapis llakikuychejchu. Astawanpis tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa [...]. Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan [...] waqaychanqa” (Filipenses 4:6, 7).
Sasha nin: “Kay textotaqa ashkha kutista leerqani. Astawan orakojtiytaj, astawan sonqoy tiyaykoj”, nispa.
Kay yachaqanapi parlarerqanchej chay runasqa, wakin kutis llakiykunasninkuwan atipachikunankuta yuyarqanku. Jinapis Jehová Diospi atienekorqanku, Bibliataj paykunata yanaparqa. Bill nin: “Llakiywan atipachikusharqaniña, jinapis allin kausay kananpi creesqayrayku ñaupajllamanpuni rerqani. Wakin kutisqa chʼin Iaqha wayqʼostapis purishayman jina sientekorqani, jinapis Diosqa ladollaypipuni kasharqa”, nispa (Salmo 23:4).
a Casarasqa kajkuna wasanchanakuspa perdonanakusqankumanta astawan yachakuyta munaspaqa, ¡Despertad! del 22 de abril de 1999 revistapi “Cuando el cónyuge es infiel” nisqata leeriy.