Bibliap nisqanta sumaqta riqsina
1. Bibliap nisqanta riqsispaqa, ¿imatá ruwayta atisunchik?
1 Bibliap nisqanta sumaqta riqsispaqa, Bibliamanta maychus kaqta yachachiyta, ima yachachiykunachus llulla yachachiykuna kasqanta runasman sutʼinchariyta ima atisunchik (2 Tim. 2:15; 1 Ped. 3:15).
2. Bibliamanta wakin pʼitikunata umanchikpi japʼinanchikpaq, ¿imataq yanapawasunman?
2 Bibliata sumaqta riqsina. Imaynatachus juk maquinata allinta riqsispaqa, chay maquinawan sumaqta llamkʼayta atinchik, jinallatataq Bibliata sumaqta riqsispaqa, Bibliamanta sumaqta yachachiyta atinchik. Bibliap tukuynin librosninta ñawiriyqa, yachachisqanta riqsinanchikpaq, wakin pʼitikunasninta umanchikpi japʼinanchikpaq, Bibliapi usqhayllata tarinanchikpaq ima yanapawasunchik. Jinamanta maypipis kachkaspa, Bibliap yachachisqanmanta mana iskaychakuspa sumaqta willayta atisunchik (1 Tes. 1:5).
3, 4. a) Bibliamanta wakin pʼitikunata umanchikpi japʼinanchikpaq, ¿imatá ruwasunman? b) Bibliamanta wakin pʼitikunata umaykipi japʼinaykipaq, ¿imatá qam ruwarqanki?
3 Tantakuypiqa, umallirichiq ima pʼitikunatachus ñawirichkasqanta Biblianchikpi ñawirinallataq. Chantá wakin publicacionesta sapallanchik ukhunchachkaspa, chayri tantakuykunapaq wakichikuchkaspaqa, Bibliamanta tukuy pʼitikunata ñawirina, tapurikunataq: Kay pʼitip nisqan, ¿imaynatá kawsayniypi yanapawanmanrí? Kay yachaqanamanta, ¿imatá astawan sutʼinchachkan? Wakinqa, Bibliap pʼitikunasninta computadorapi chayri imprimisqa papelpi ñawirinankumantaqa, Bibliankupi ñawirinku, jinamanta runasman willachkaspa wakin pʼitikunata Bibliankupi usqhayllata tarinku (Juan 14:26).
4 Wakin familiasqa, Bibliamanta wakin pʼitikunata umankupi japʼinankupaq juchʼuy hojitaspi Bibliamanta juk pʼitita qillqanku, chay hojitaspa wasanpitaq imatachus chay pʼiti nisqanta qillqanku, chantá imatachus qillqasqankuta rikuchinakuspa, imatachus chay pʼiti nisqanta tapunakunku. Wakintaq, wakin pʼitikunata umankupi japʼinankupaq, runaspa tapuykunasninkuman imaynatachus Bibliawan kutichinankuta familiajina wakichikunku.
5. ¿Imaraykutaq Bibliap nisqanta sumaqta riqsinanchik tiyan?
5 Bibliaqa, ni mayqin librowan kikinchakunchu, imaraykuchus Biblialla “salvacionta tarina[paq]” runata yanapan (2 Tim. 3:15). Chaywanpis achkha runas Bibliap nisqanta mana riqsinkuchu, chayrayku Bibliamanta paykunaman yachachinanchikpaq Bibliap nisqanta sumaqta riqsinanchik tiyan (Pro. 2:1-5).