Diospa Llaqtanta Kamachiqkunap cartanku
Munasqa hermanos:
Tukuyta Kamachiq Jehová Diospa sutinwan riqsisqa kasqanchikqa, ¡may sumaqpaq qhawanapaqjina! Paypa sutinqa wiñaypaq, manataq Diospa sutinjina wak suti kanchu. Jehová Diosllataq, Jehovamanta sutʼinchaqkuna sutichakunanchikta nirqa, chayrayku ñuqanchikqa 1931 watamantapacha chay sutiwan riqsisqa kanchik (Isa. 43:10). Jehovamanta sutʼinchaqkunajina riqsichikusqanchikmanta, ¡mayta kusikunchik!
Kuraq Supayqa, Diospa sutinta chinkachinanpaq tukuy imata ruwachkan. Atiyninpi kaq nacionestaq, Diospa sutinta qhisachanku. Llulla religionta kamachiqkunapis, Diospa sutinta chiqnikunku, Bibliata wak qallusman tikrachichkaspataq manaña Paypa sutinta churankuchu. Paykunamanta nisqa Jesusqa, Tatanpa sutinta pataman churarqa, imaynatachus Diosmanta mañakunankuta yachachichkaspataq discipulosninman nirqa: “Chayrayku qankunaqa kay jinata mañakunkichej: Janaj pachapi kashaj Tatayku, sutiyki jatunchasqa kachun”, nispa (Mat. 6:9). Chantapis wak kutipi tukuy sunqu Tatanmanta mañakuchkaspa jinata nirqa: “Sutiykita rejsicherqani kay pachamanta qowasqayki runasman”, nispa (Juan 17:6). Jesusjinallataq ñuqanchikpis Jallpʼantinpi Diospa sutinta tukuy runasman ni jaykʼaqjina riqsichiyta munanchik.
Kay 2009 watapaq akllasqa pʼiti, “Allin willaykunata tukuyman willana”, nispa nisqanqa, tukuy runasman Diospa Reinonmanta allin willaykunata willamunallanchikpaqpuni yanapawarqanchik (Hech. 20:24). Chiqamanta Jehová Diosqa, qayna watapi tukuy atisqanchikta llamkʼasqanchikmanta mayta bendeciwarqanchik. Diosninchikpa sutin jatunchasqa kananpaqjina, Jallpʼantinpi tukuy runasman Reinonmanta willarqanchik. Tukuy runasman willananchikpaq, astawan allinpi kawsakuyta munaqkunaman Bibliamanta yachachinanchikpaq ima, Jallpʼantinpi ni jaykʼaqjina 7.313.173 willaqkuna juk runajinalla llamkʼarqanchik. Jesuspa wañupuyninta yuyarinapaq tantakuypitaq pachantinpi 18.168.323 runas tantakurqanchik, chaytaq niraq kay pachap tukukuynin chayamuchkaptin may chhika runas Diospa sutinta jatunchayta munaqkuna kasqantaraq rikuchiwanchik.
Manaña willananchikta Jehová ninawanchikkama, sunqu kʼajaywan tukuy imaymanamanta Paypa Reinonmanta runasman willamullasunchikpuni (Mat. 24:14; Mar. 13:10). Wasimanta wasi, callespi, cartaniqta, telefononiqta, mayllapipis kachkaspa imataq, Diospa sutinta, munayninta ima runasman riqsichinanchikpaq kallpachakullasunchikpuni.
Jukchhikamantawan Jehová Diosqa sutin may santo kasqanta tukuy nacionesman rikuchinqa (Eze. 36:23). Arí, pisi tiempomantawan Diospa sutinta chʼichichaqkunaqa chinkachisqa kanqanku. Jehovap chiqa sunqu kamachisninpaq chay pʼunchayqa, juk jatun pʼunchay kanqa, imaraykuchus paykunaqa, Diospa sutinta runasman riqsichirqanku, Jehová Diosllatataq Kamachiqninkutajina qhawarqanku.
Jallpʼantinpi 2009 watapi, “Wakichisqapuni kaychik” sutichasqa Jatun Tantakuykunapi, Achkha Suyuspaq Jatun Tantakuykunapi imaqa, Jehová Dios llaqtanta munakuywan jarkʼasqan sutʼi rikukurqa. Chay Jatun Tantakuykunaqa, ni jaykʼaq qunqapunanchikpaqjina karqa, imaraykuchus chay tantakuykunapi yachachikusqanqa, Diospa pʼunchaynin chayamunankama wakichisqallapuni kananchikqa, may allin kasqanta reparachiwarqanchik (Mar. 13:37; 1 Tes. 5:1, 2, 4).
Chiqamanta Jehová Diosqa ñuqanchikwan may kʼachamin, ni imata pisichipuwanchikchu, astawanqa qʼumir pampaspi michiwanchik, quchasqa miskʼi yakusmantaq pusawanchik (Sal. 23:1, 2; 100:2, 5).
Kaymanta qhipaman Jehová Diospaq tukuy sunqu llamkʼallasunchikpuni chayqa, chiqamanta Payqa, ¡mayta bendeciwasunchik!
May munakuywan tukuy qamkunaman kay cartata apachimuyku.
Hermanosniykichik,
Diospa Llaqtanta Kamachiqkuna
[5-8 paginaspi tabla]
JEHOVAMANTA SUTʼINCHAQKUNA 2009 WATAPI RUWASQANKUMANTA WILLAYKUNA
(Publicacionpi qhawariy texto originalta)
2008 watapi septiembre killamanta 2009 watapi septiembre killakama, Jehovamanta sutʼinchaqkuna 140.000.000 (140 millones) dolaresta gastanku, precursores especiales, misioneros, superintendentes viajantes ima, ruwayninkuta juntʼanankupaq.
Tukuy pachantinpi Señorpa Cenanpi mikhuqkuna: 10.857
[9, 10 paginaspi sutʼinchaynin]
Qillqanapaq