Mana aswan sumaq llamkʼay kanchu
1. Diospa Reinonmanta willayta juk sumaq llamkʼaytajina qhawaspa, ¿imatá ruwallasunchikpuni?
1 ¡Diospa Reinonmanta willayqa, juk sumaq llamkʼay! Chayrayku allin kamachi yuyayniyuqqa, runaman willamunallanchikpaqpuni tiemponchikta, kallpanchikta, kapuwasqanchikmanta ima churanata niwanchik. Imaraykuchus willamunanchik kasqanpi tʼukurispaqa, sunqu kʼajaywan willamullasunchikpuni (Hech. 20:24).
2. ¿Imaynatá runasman willamuspa Diospa sutinta jatunchanchik?
2 Jehovap sutinta jatunchanchik. Diospa Reinonmanta willamuspaqa, Diospa Reinon kay pachapi tukuy reinosta, chantá ñakʼariykunata chinkachinanmanta runasman parlarinchik (Mat. 6:9, 10). Chantá Jehovalla, unquykunata, wañuyta ima wiñaypaq chinkachinanmanta parlarillanchiktaq (Isa. 25:8; 33:24). Sunqu kʼajaywan willamusqanchik, tukuy imapi allinta purisqanchik imaqa, Jehovata jatunchanankupaq runasta tanqan (1 Ped. 2:12). Chayrayku, Jallpʼantinpi Diospa sutinta tukuy runasman riqsichispa, ¡mayta kusikunchik! (Sal. 83:18, Qhechua de Cuzce.)
3. ¿Ima bendicionestataq tarin pichus Biblia nisqanmanjina kawsayta qallarin chay runa?
3 Salvacionta tarinankupaq runasta yanapanchik. Jehovaqa, mana “munanchu pipis juchanrayku chinkayman rinanta. Astawanqa pay munan tukuy runas [Payman] kutirikunankuta” (2 Ped. 3:9). Chaywanpis, ¿imaynatá runas yachanqanku ima ruwaykunatachus Dios juchatajina qhawasqanta, paykunaman ni pi yachachiptinrí? (Jon. 4:11; Rom. 10:13-15.) Juk runa Biblia nisqanmanjina kawsayta qallarin chayqa, may kusiywan wiñay kawsayta suyakun, kunan tiempopitaq sunqu juntʼasqa kawsakun (Miq. 4:1-4). Diospa Reinonmanta runaman willamullaspapuniqa, ñuqanchik kikinchikta salvakusunchik, jinallataq pikunachus uyariwanchik paykunatapis (1 Tim. 4:16). ¡Mayta kusikunchik Diospaq llamkʼachkasqanchikmanta!
4. ¿Imaraykutaq Diospa Reinonmanta willamuy juk sumaq llamkʼay?
4 Tumpamantawan kay saqra pacha chinkachisqa kanqa, Diospa munayninta ruwaqkunataqrí mana wañunqankuchu. Chayrayku Diospa Reinonmanta runaman willay, runasta Jesuspa discipulosninman tukuchiy imaqa, juk sumaq llamkʼay. Chaytataq kawsayninchikpi ñawpaqman churanallapuni (Mat. 6:33).