Sunqu kʼajaywan willanallapuni
1 Jehovamanta sutʼinchaqkuna, tukuy pachantinpi willayman, discipulosta ruwayman ima, mayta qukunchik, kay 1992 watamantapachataq waranqa junu (1.000.000.000) horasta churanchik runaman willaypi. ¡Ñuqanchikpis mayta kusikunchik chayjinatapuni willakunanpaq yanapasqanchikmanta! (Mat. 28:19, 20.)
2 Kay willayqa, Jehová Diosta mayta jatunchan, chayrayku pay, kay “qhipa sajra pʼunchaykunapi” willanallanchikpaqpuni yanapawasqanchikmanta, mayta agradecenchik (2 Tim. 3:1). Chaywanpis, kay sumaq willaykunata sunqu kʼajaywan willanallanchikpaqpuni, ¿imatá ruwananchik tiyan?
3 Imaraykutaq willanchik. Diospa Reinonmanta willamunchik, Diosninchikta, runa masinchiktapis mayta munakusqanchikrayku, jinallataq Diosman qukusqanchikta juntʼayta munasqanchikrayku (Mat. 22:37-39; 1 Juan 5:3). Chay munakuyninchik, tanqawanchik imatapis saqispa atisqanchikmanjinataq willananchikpaq (Luc. 9:23).
4 Imaynatá chayta ruwasunman. Satanás enemigonchikqa, mana sunqu kʼajaywan willananchikpaq tukuy imata ruwanqa. Kaykunata apaykachan, mana uyariyta munaq runata, kay pachap ruwayninta, unquykunata, sapa pʼunchay kawsaymanta llakikuyta, wak imasta ima.
5 Chayrayku, sunqu kʼajaywan willanallapaqpuni sumaqta kallpachakuna tiyan. ‘Ñawpa kaq munakuyninchiktaʼ kallpachanallapuni tiyan, chayta ruwanapaqqa Diospa Palabranta sapa kuti ñawirina, nisqanpitaq tʼukurina, chantapis ‘allin kamachi yuyayniyuqtaq’ quwasqanchikwan sumaqta yanapachikuna (Apo. 2:4; Mat. 24:45; Sal. 119:97).
6 Bibliap profeciasninqa, Jehová juk pʼunchayta saqra runasta chinkachinanpaq wakichisqan, usqhayllata qayllamuchkasqanta sutʼita rikuchiwanchik (2 Ped. 2:3; 3:10). Chay pʼunchaymanta allinta yuyarikuspa, sunqu kʼajaywan willanallapaqpuni, ima jarkʼaytapis atipana, jinamanta tukuy pachapi maychus atisqanchikmanjina willanapaq, discipulosta ruwanapaqtaq, kay ruwaytaq manaraq tukukuchkanchu.