Sonqo kʼajayllawanpuni willamuna

SUMAJ willaykunata kay tiempopi willayqa mana ni ima llankʼaywanpis kikinchakunchu. Willaj rispaqa Diospa sutinpi willaj rishanchej, chaytaj may sumajpuni. Chaywanpis precursores, willajkuna ima, ichapis sonqo kʼajaywan willayta mana atillasunmanchu. ¿Imaraykutaj mana atillasunmanchu?

Wakin hermanosqa wasimanta wasi willashaspa runasta wasinkupi mana taripasqankumanta, ni piwan parlarisqankumanta ima llakikunku. Runasta wasinkupi taripajtinkutaj, runasqa mana uyariyta munankuchu, paykunapaj phiñakunku ima. Wakin hermanospata qotuchakuyninkoj territorion may jatun, tukuy runastaj willayninkuta uyarinku, chaywanpis chay hermanos llakikunku mana tukuy runasman willayninkuwan chayanankuta yuyaspa. Wakin hermanostaj ashkha watastaña Diosmanta willamuspapis, manaraj kay sajra pachaj tukukuynin chayamusqanmanta llakikunku.

Kaykunaqa ichá sonqo kʼajaywan willamunapaj mana yanapawasunmanchu. Chantapis kay pacha “Kuraj Supaypa atiynimpi” kasqanrayku willamuyta mana atinallanchejta yachanchej (1 Juan 5:19).

Ichapis willaypi chʼampaykunapi rikukuwaj. Chaywanpis ama iskayrayaychu Jehová yanapasunanmanta. ¿Imaynatá sonqo kʼajayllawanpuni willamuwaj? Imaschus yanapasunanta qhawarina.

MOSOJ WILLAJKUNATA YANAPAY

Sapa wata may ashkha runas bautizakunku. Kunallanraj bautizakunki chayqa, ashkha watastaña bautizasqa kajkunamanta mayta yachakuwaj. Ashkha watastaña bautizasqa kanki chaytaj, kunallanraj bautizakojkunata yanapawaj. Ajinata ruwaspaqa mayta kusikunki.

Jesusqa yacharqa yachachisqasnin sumaj yachachejkuna kanankupaj yanapata necesitasqankuta, chayrayku imaynatachus runasman willanankuta yachacherqa (Luc. 8:1). Kay tiempopipis mosoj willajkunaqa yanapata necesitanku sumaj yachachejkuna kanankupaj.

¿Imaynatá mosoj willajkunata yanapasunman? Uj mosoj willajqa, mana willayman llojsispallachu sumaj yachachejman tukonqa. Astawanpis unaytaña willayman llojsej hermanoj yanapanta necesitan 1) imaynatachus wakichikunanpaj, chayta amañananpaj ima, 2) wasimanta wasi chayri callepi pillawanpis parlarinanpaj, 3) runasman publicacionesta saqeyta yachananpaj, 4) yachakuyta munajkunaman kutinanpaj, 5) Bibliamanta yachachiyta qallarinanpaj ima. Mosoj willajqa, yachachejnin jina ruwaspa sumaj yachachejman tukonqa (Luc. 6:40). Arí, mosoj willajqa, waj hermanowan willashaspa, yanapata necesitajtin yanaparinanta yachasqanrayku ima, willayta mana manchachikonqachu. Chantapis chay hermanoj yuyaycharisqanwan, kallpacharisqanwan ima mayta yanapachikonqa (Ecl. 4:9, 10).

QANWAN WILLAYMAN LLOJSEJ HERMANOWAN PARLARIY

Willaypi runaswan parlarinapaj mayta kallpachakojtinchejpis, wakin kutisqa ni piwan parlarinchejchu, manaqa noqanchejwan willayman llojsej hermanollawan parlarinchej. ¿Maykʼajllapis ajinapi rikukorqankichu? Jina kajtin yuyarikuy, Jesús yachachisqasninta willaj rinankupaj “iskaymanta iskay” kachasqanta (Luc. 10:1). Ajinamanta paykunaqa purajmanta kallpachanakuyta aterqanku. Arí, hermanosninchejwan willaypi astawan unayta kayqa, yanapawanchej hermanosninchejwan “purajmanta kallpachanakunanchejpaj” (Rom. 1:12).

¿Imasmantataj willayman llojsinki chay hermanowan parlariwaj? Willariwaj, willaypi imaynachus risusqanmanta, sapallaykipi Bibliata ukhunchashaspa chayri familiaykiwan khuska ukhunchashaspa, ima sumaj yachachiykunatachus tarisqaykimanta, tantakuypi ima yachachiychus sonqoykiman chayasqanmanta ima. Willayman mana sapa kutichu llojsinki chay hermanowan llojsishanki chaytaj, tapuriwaj imaynatachus cheqa kajta rejsisqanta, imachus Jehovaj testigosnin Diospa llajtanpuni kasqanta reparananpaj yanapasqanta, qotuchakuypi ima ruwaykunatachus japʼisqanta, imaspichus rikukusqanta ima. Chantá qanpis kausayniykimanta willarillawajtaj. Willayninchejta runas uyarejtinku chayri manapis, hermanosninchejwan willayqa mayta kallpachawanchej (1 Tes. 5:11).

DIOSPA PALABRANTA UKHUNCHAYPUNI

Sonqo kʼajaywan willanallaykipajpuneqa, Bibliata sapallaykipi ukhunchanayki tiyan. Imajtinchus allin kamachi yuyayniyoj tukuy laya yachaqanasta orqhon, astawan ukhunchanapaj (Mat. 24:45). Sutʼincharinapaj, kay tapuypi tʼukuriy: ¿Imaraykutaj willamunapuni tiyan? Kaymanta astawan sutʼinchashan 16 paginapi rikhurej recuadro.

Chay recuadrota leey, chaypitaj tʼukuriy, astawan sonqo kʼajayllawanpuni willamunaykipaj yanapasonqa. Chantapis imaspiwanchus willamunallapajpuni yanapawasqanchejta Bibliapi maskʼay. Chaykunapi tʼukurinaykipaj tiempochakunki chayqa sonqo kʼajayllawanpuni willamunki.

YUYAYCHAKUSQANMAN JINA RUWAY

Diospa llajtanqa sapa kuti yuyaychawanchej imaymanamanta willamunata. Sutʼincharinapaj, wasimanta wasi willamunata yuyaychawajtinchejpis, cartanejta, telefononejta, callespi, waj lugarespi, negociospi ima willanata yuyaychallawanchejtaj. Chantapis kallpachakullasunmantaj pisi testigoslla kanku chay lugaresman, chayri maypichus testigos mana kankuchu chay lugaresman willaj rinapaj.

¿Kay ñaupaj parrafopi yuyaychakusqanman jina willamuyta munankichu? Ashkha hermanos ajinata willamorqanku, paykunatataj may allin rerqa. Kinsa hermanosmanta parlarina.

Reinomanta Willayninchej hojitapi Bibliamanta runaman yachachiyta qallarinapaj yuyaychakusqanman jina uj hermana ruwarqa, sutenqa April. Paytaj llankʼayninmanta kinsa warmiswan parlarerqa, tʼukunanpaj jinataj, kinsantin Bibliamanta yachakuyta munarqanku, tantakuykunamantaj riyta qallarerqanku.

Diospa llajtanqa yuyaychallawarqanchejtaj revistasninchejpa wakin yachaqanasninmanta pikunachus yachakuyta munasqankupi tʼukurinanchejta. Estados Unidos suyumanta qotuchakuykunata waturej hermano ¡Despertad! revistapi ruedasmanta parlaj yachaqanata leerqa. Chay revistatataj ruedasta vendej tiendasmanta encargadosman saqej rerqa. Chantapis chay hermanollataj waj kutipi warminwan khuska pachaj kuraj consultoriospi parlarerqa, “Los retos del médico de hoy” nisqa yachaqanamanta. Chay hermano nin: “Ajinata ruwasqaykoqa runasta yanapan rejsinawaykupaj, publicacionesninchejta rejsinankupaj ima. Paykunawan parlarispaña, waj kutipi paykunawan parlarej kutiyta atillarqayku”, nispa.

Judy sutiyoj hermana, Jehovaj testigosninpa centralninkuman uj cartata qhelqarqa. Chay cartanejtataj agradecekorqa telefononejta willanapaj yuyaychakusqanmanta. Mamanqa 86 watasniyojña, onqosqa kaspapis, telefononejta willayta atej. Ajinata ruwasqanraykutaj, 92 watasniyoj warmiman Bibliamanta yachachiyta qallarerqa.

Publicacionesninchejpi yuyaychakusqanqa yanapawanchejpuni, chayrayku chaypi yuyaychawasqanchejman jina ruwana. Ajinamanta sonqo kʼajayllawanpuni willamusunchej, willaypi kashaspataj astawan kusikusunchej.

IMATACHUS RUWAYTA ATISQALLAYKIPI YUYAY

¿Imataj yanapawasun willaypi allin rinawanchejpaj? Wakin hermanos yuyanku, ashkha publicacionesta saqey, ashkha runasman Bibliamanta yachachiy chayri ashkha runasta Jehovaj testigosninman tukuchiy yanapawasqanchejta. Chaywanpis chayqa mana cheqachu. Kunanqa Noepi tʼukurina. ¿Noeta willayninpi allinchu rerqa? Arí. Chaywanpis, ¿mashkha runastataj yanaparqa Jehovaj kamachisnin kanankupaj? Ni ujllatapis, manaqa familiallanta. Chaytaj Jehovaman cheqa sonqo kay aswan allin kasqanta yachachiwanchej (1 Cor. 4:2).

Ashkha hermanos sonqo kʼajayllawanpuni willanankupaj imastachus ruwayta atisqallankupi yuyananku kasqanta reparanku. ¿Imastaj chaykuna kanku? Chaymanta astawan yachakuwaj kay paginapi recuadrota leespa.

Jehovamanta yanapata mañakuy willaypi astawan kusisqa kanaykipaj. Imastachus ruwayta atisqaykita juntʼaspa kusisqa kanki, imaraykuchus yachanki tukuy atisqaykita ruwashasqaykita Bibliamanta wajkunaman yachachinaykipaj.

Arí, runasman willayqa mana atikullanchu. Chaywanpis ashkha yanapas tiyan sonqo kʼajayllawanpuni willamunaykipaj. Qanwan willayman llojsej hermanowan parlariy, Bibliata ukhunchay, allin kamachi yuyayniyoj yuyaychasqanman jina ruway, imatachus ruwayta atisqallaykipitaj yuyay. Astawanpis yuyarikuy, Jehovaqa paymanta willajta, jinallataj testigon kananchejta ima saqewasqanchejta (Isa. 43:10). Chayrayku sonqo kʼajayllawanpuni willamusun chayqa, kusisqas kasunchej.