¿Imaynatá ñawpaq kutillataraq willaq lluqsiqkunata yanapasunman?
1. Ñawpaq kutillataraq willaq lluqsichkaspa, ¿mancharisqachu kachkarqanki?
1 ¿Yuyarikunkichu ñawpaq kutillataraq wasimanta wasi willaq lluqsisqaykita? Chay kutipi mancharisqachá karqanki. Chaywanpis, Bibliamanta yachachiqniyki chayri wak hermano chay kutipi yanapasusqanqa, ¡maytachá kallpachasurqa! Kunantaq sumaqtaña willayta yachakusqaykirayku, ñawpaq kutillataraq lluqsiqkunata yanapayta atinki.
2. ¿Imatataq ñawpaq kutillataraq willayman lluqsiqkuna yachakuyta necesitanku?
2 Ñawpaq kutillataraq willayman lluqsiqkunaqa, wasimanta wasi runawan parlariyta, Bibliawan sutʼinchayta, yachakuyta munaqkunaman kutiyta, Bibliamanta yachachiyta ima yachakuyta necesitanku. Chantá callespi, qhatuspi, tukuyniqpi Diosmanta willayta yachakuyta necesitallankutaq. ¿Imaynatá paykunata yanapawaq? Imaynatachus willanata rikuchispa, allinta yuyaychaspa ima.
3. ¿Imaynatá ñawpaq kutillataraq willaqta yanapasunman?
3 Imaynatachus willanata rikuchiy. Jesusqa, discipulosninman imaynatachus runaman willanankuta rikuchirqa (Luc. 8:1-3; 1 Ped. 2:21). Jesusjina ruwanaykipaqqa, ñawpaq kutillataraq willaqwan willaq lluqsinaykipaq parlaspaqa, publicaciones nisqanmanjina ñawpaqmantapacha allinta wakichikuy, ñawpaq kutillataraq willaq kikinta ruwananpaqjina. Willaypi kachkaspañataq qamraq iskay runallamanpis willay, imaynatachus willanata yachakunanpaq, chantá imaynatachus willasqayki, allinchus manachus kasqanta tapuriy. Jinamanta payqa wak hermanowan khuska willay may allin kasqanta reparanqa, chantá astawan allinta willananpaq yuyaychanayki kaptin, yuyaychasqaykita japʼikuyta atillanqa.
4. Ñawpaq kutillataraq willaq juk runawan parlayta tukusqantawan, ¿imaynatá yanaparisunman?
4 Yuyaychariy. Jesusqa, discipulosninman imaynatachus runaman willanankuta yuyaycharqa (Mat. 10:5-14). Jesusjina ruwanaykipaqqa, ñawpaq kutillataraq willaqñataq willachkaptin, sumaqta uyariy. Chantá wak wasimanñataq richkaptiykichik, allinta ruwasqanta niy. Chaywanpis imapichus pantasqanmanta amaraq yuyaychaychu, astawanqa wak runawanñataq parlananta suyariy. Imaraykuchus ichá mancharisqa kasqanrayku mana allintachu willarqa. Chantá mana tukuyninchikchu kikinta ruwayta atisqanchikta, imata ruwanapaqpis wakjinasmanta ruwasqanchikta ima yuyarillaytaq (1 Cor. 12:4-7).
5. ¿Imaynatá ñawpaq kutillataraq willaqta yuyaychariwaq?
5 Wakin kutiqa, willaqllataq yuyaycharinaykita nisunqa. Mana ajina kaptintaq ichá sumaqta willaq hermanosjina, kʼachamanta jinata tapuriwaq: “¿Yuyaychariykimanchu?”, chayri “¿Imayna ruwasqaykitataq yuyanki?”, nispa. Chayri jinata niwaq: “Ñawpaq kutillataraq willaq lluqsichkaspa, mana atillarqanichu..., chaywanpis kay yanapawarqa ...”. Wakin kutiqa allin kanqa Razonamiento nisqa librota ñawirinaykichik. Chantá ama tukuy imamantañataq yuyaychaychu, manaqa imapichus astawan llamkʼanallanmanta.
6. ¿Imaynatá puraqmanta yanapanakusunman?
6 Fierroqa fierrollawantaq awsakun. Timoteoqa juk sumaq willaq karqa, chaywanpis apóstol Pablo jinata yuyaycharqa: “Chay imaspi sonqoykita churay Señorpi wiñasqaykita tukuy rikunankupaj”, nispa (1 Tim. 4:13, 15). Chayrayku unaytaña Diosmanta willachkaspapis, sumaq willaq kanaykipaq kallpachakullaypuni. Chantapis unaytaña willaq hermanosmanta, chayri kunallanraq willayman lluqsiqkunamanta yachakuy. Astawanpis qutuchakuymanta hermanosta, astawanraq ñawpaq kutillataraq willaqkunata kʼachamanta yanapanaykipaq wakichisqallapuni kay, ajinamanta paykunapis sumaq willaqkunaman tukunankupaq (Pro. 27:17).