Jesuspa Wañuyninta Yuyarinapaj tiempopi tukuy sonqo willamunapaj Jehovamantawan Jesusmantawan yachakuna
1. Jesuspa Wañuyninta Yuyarinapaj tiempopi, ¿imata ruwanapajtaj kallpachakusunman?
1 Jehovaqa nisqanta juntʼaytapuni munan. Reinon bendicionesta apamunanmanta Isaías 9:7 nin: “Tukuy Atiyniyoj Tata Diosmin sinchʼi munayninrayku ruwanqa”, nispa. Jesuspis cheqa yupaychay llimphupuni kananta munarqa (Juan 2:13-17; 4:34). Noqanchejpis Jehová jina chantapis Jesús jina tukuy sonqo imatapis ruwayta munanchej. Chayrayku sapa wata Jesuspa Wañuyninta Yuyarinapaj tiempopeqa, maytapuni willamunapaj kallpachakunchej. ¿Qanpis kallpachakushankichu?
2. ¿Imatá tukuy sonqowan ruwayta atisun 7 de marzo pʼunchaymantapacha?
2 Invitacionesta jaywasun. Kay wataqa 7 de marzo pʼunchaymantapacha invitacionesta jaywayta qallarisun. Kunanmantapacha astawan willamunapaj wakichikuna. Qotuchakuykunaqa tukuy runasman invitacionesta jaywarinankupaj mayta kallpachakushanqanku. Noqanchejpis Bibliamanta yachakojkunata, trabajonchejmanta, yachaywasimanta ima compañerosninchejta, familiaresninchejtawan invitarinapaj kallpachakuna. Invitaciontaqa jw.org nisqapi rikuchiyta atillasunmantaj.
3. ¿Imatá ruwasunman marzo, abril killaspi astawan willananchejpaj?
3 Precursor auxiliar jina. Tukuy sonqowan willayta munasqanchejqa astawan willanallapajpuni kallpachawasun. Marzo, abril killaspeqa 30 horasta willaspa precursores auxiliares kayta atisun. Chayta ruwanapajtaj familiapi Diosta yupaychashaspa chayri sapallanchejpi Bibliata ukhunchashaspa Jehovamanta mañakuspa yuyaycharikusunman (Pro. 15:22). Kusiywan willamojtinchejqa, wajkunapis kikillantataj ruwayta munanqanku. Astawan willamunapaj kallpachakuspaqa, Jesús jina maytapuni willayta munasqanchejta rikuchisun (Mar. 6:31-34).
4. Jehová jina chantá Jesús jina tukuy sonqo ruwajtinchej, ¿ima bendicionestataj japʼisun?
4 Jehovawan Jesuswan imaynatachus imatapis ruwasqankuta qhawarispaqa, tukuy sonqo willamuyta munanchej, chaytaj ashkha bendicionesta apamuwasun. Ashkha runas Reinonmanta yachakonqanku. Chantapis Jehovaj munayninta juntʼaspa, runastapis yanapaspaqa kusikusunchej (Hech. 20:35). Astawanpis Jehovata, Churinta ima kusichisunchej.