‘Tukuy sunqu Jehovata servinachik’
1. ¿Imaynatá Diospa Reinonmanta willamunanchik tiyan?
1 Mana kamachisqajinallachu Diospa Reinonmanta willamunanchik tiyan, manaqa, tukuy sunqu. Chayrayku apóstol Pablo niwanchik: “Tukuy sonqotaj Señorta sirviychej”, nispa (Rom. 12:11). Chaywanpis ichá wakin kuti imallapis kanman mana tukuy sunqu willayta atinanchikpaq. Chayrayku tukuy sunqu willayninchikta “ninata jina” lawrarichinallanchikpaqpuni, ¿imatá ruwasunman? (2 Tim. 1:6, 7).
2. Sapallanchik Bibliamanta yachakusqanchik, ¿imaynatá tukuy sunqu runasman willamunanchikpaq yanapawanchik?
2 Sapallanchik Bibliamanta yachakuna. Tukuy sunqu runasman willaqqa, maytapuni Diospa kamachisqasninta munakun, chantá Bibliata ñawirichkaspa sumaq yachachiykunata tarisqanmanta mayta kusikun (Sal. 119:97). Sapallanchik Bibliamanta yachakuchkaspa, sumaq yachachiykunata yachakusqanchikmanta mayta kusikunchik, ¿icharí? Chaytaq Diosta astawan munakunanchikpaq, imatachus yachakusqanchikmanta runasman tukuy sunqu willamunanchikpaq ima yanapawanchik (Heb. 13:15). Arí, tukuy sunqu runasman willamuspaqa, Bibliamanta yachakusqanchikta may sumaqpaq qhawasqanchikta rikuchinchik.
3. ¿Imaynatá Diospa espiritun willayninchikpi yanapawasunman?
3 Diospa espiritunta mañakuna. Diospa yanapaynillanwan runasman tukuy sunqu willayta atinchik (1 Ped. 4:11). Chayrayku, ‘tukuy atiyniyuq’ Diosman qayllaykusunchik chayqa, astawan kallpachakusunchik mana manchachikuspa runasman willamunallanchikpaqpuni (Isa. 40:26, 29-31). Apóstol Pabloqa, wakin runas Diosmanta willayninman churanakuptinku, jinata nirqa: “Diospa yanapayninwanka sinchʼita willarallanipuni”, nispa (Hech. 26:21, 22, Dios Parlapawanchej). Jinallatataq Diosqa, tukuy sunqu willamunallanchikpaqpuni espíritu santonwan yanapawasunman. Chayrayku Paymanta espíritu santonta mañakunanchik tiyan (Luc. 11:9-13).
4. Tukuy sunqu Diospa Reinonmanta willay, ¿imaraykutaq allin, chantá imaynatá runaswan parlarinallapuni?
4 Diospa Reinonmanta tukuy sunqu willamusqanchikqa, ñuqanchikjinallataq ruwanankupaq wakin hermanosta yanapan (2 Cor. 9:2). Chantá tukuy sunqu willaptinchikqa, runas allinta uyariwasunchik. Chaywanpis tukuy sunqu willachkaspaqa, llampʼu sunquwanpuni parlarinanchik tiyan (Tito 3:2). Chantá tukuy runasta jatunpaq qhawasqanchikta rikuchinallapuni, jinallataq imatachus yuyasqankutapis.
5. ¿Ima ruwananchikpaqtaq kallpachakunallanchikpuni tiyan?
5 Diospa Reinonmanta tukuy sunqu runasman willamunanchikpaq kallpachakunallapuni. Chaypaqqa sapallanchik Bibliamanta yachakunallapuni, Diosmantataq espíritu santota mañakunallapuni. Ajinamanta ‘espíritu santop atiyninwan’ Diospa Reinon chiqapuni kasqanta yachaspa, runasman willamullasunchikpuni (1 Tes. 1:4, 5).