Ashkha ruwanasniykiwan ama atipachikuychu
1. ¿Imaraykutaj wakin hermanos Bibliamanta mana yachachinkuchu?
1 Wakenqa, ashkha ruwanasniyoj kasqankurayku Bibliamanta yachachiyta mana munankuchu, yachakojman mana kutiyta atinankuta yuyaspa. Cheqamanta nisunman Bibliamanta yachachinapaj, wakichikunapaj, yachakojta yanapanapaj imaqa tiempo necesitakusqanta. Apóstol Pabloqa, Tesalonicamanta kajkunaman cheqa kajta yachachinanpaj kausayninta qosqanta nerqa (1 Tes. 2:7, 8). ¿Imaynatá Bibliamanta yachachinapaj tiempochakusunman?
2. Jehovata munakusqanchej, ¿imaynatá yanapawanchej tiemponchejta allinta apaykachanapaj?
2 Diosta yupaychanapaj tiempochakuna. Diosta yupaychaypeqa, ashkha ruwanas tiyan. Sapa semana tantakuykunaman, willayman rinapaj, Bibliata leenapaj, Diosmanta mañakunapaj ima tiempochakunchej. Sutʼincharinapaj, imaynatachus uj casarasqa runa, ashkha ruwanasniyoj kaspapis munasqa qosanpaj chayri warminpaj tiempochakun, ajinallatataj noqanchejpis, Jehovata munakusqanchejrayku, payta yupaychanapaj tiempochakunanchej tiyan (Efe. 5:15-17; 1 Juan 5:3). Jesús nisqanman jinataj, Diosta yupaychallanchejtaj runasta Jesuspa discipulosninman tukuchej rispa (Mat. 28:19, 20). Chaypi tʼukuriytaj, runasman Bibliamanta yachachiy niwasqanchejta juntʼanapaj yanapawasunchej.
3. ¿Imaynatá Bibliamanta yachachillasunmanpuni ashkha ruwanasniyoj kaspapis?
3 Chantá, ¿imatá ruwasunman ashkha llankʼayniyoj, sinchi onqosqa chayri qotuchakuypi ashkha llankʼayniyoj kaspa? Wakin willajkunaqa, wakin kutis waj lugarman rispa, yachakojman telefononejta chayri computadoranejta yachachillankupuni. Wakintaj, sinchi onqosqa kaspa yachakojta wasinman rinanta ninku yachachinankupaj. Wajkunataj, Bibliamanta yachachej mana riyta atispa, waj willajkunata kachanku.
4. ¿Imatataj japʼisunchej Bibliamanta yachachejtinchej?
4 Pabloqa, cheqa kajta wajkunaman yachachinanpaj tiemponta, kallpanta ima qospa mayta kusikorqa (Hech. 20:35). Tesalonicapi wajkunata yanapasqan mana qhasichu kasqanta rikuspa, Jehová Diosman graciasta qorqa (1 Tes. 1:2). Noqanchejpis ashkha ruwanasniyoj kaspapis, Bibliamanta runasman yachachisun chayqa mayta kusikusunchej.