Jehovata astawan jatunchayta atinchej
1. ¿Imata ruwakusqantaj Jehovata “maytapuni” jatunchanapaj yanapawanchej?
1 Ñaupajta willakorqa jina, marzo, abril killaspi, jinallataj qotuchakuykunata waturej hermano jamojtinpis, precursor auxiliar kanapaj 30 horasta juntʼasunman. Qotuchakuykunata waturej hermano, uj killaj tukukuyninmanta qhepan killaj qallariyninkama, qotuchakuyta waturin chaytaj, chay iskay killasmanta mayqellanpipis precursor auxiliar kayta ajllasunman. Chantá precursores regulareswan, especialeswan ima tantakojtin, tukuy tantakuyninkupi kayta atisunman. Mana 50 horasta juntʼayta atispapis, watapi 4 kutita 30 horasta juntʼaspa precursores auxiliares kayta atisun, jinamantataj Jehová Diosninchejta “maytapuni” jatunchasun (Sal. 109:30; 119:171).
2. Qotuchakuykunata waturej hermano jamojtin, ¿ima bendicionestataj precursores auxiliares japʼinkuman?
2 Qotuchakuykunata waturej hermano jamojtin. Kunanqa astawan hermanos precursores auxiliares kayta atenqanku, paywan khuska willaspataj purajmanta kallpachanakonqanku (Rom. 1:11, 12). Ashkha precursores auxiliares, semanapi uj pʼunchayllatapis waturej hermanowan willaj llojsinankupaj tiempochakonqanku. Semanantinta llankʼajkunataj, sabadopi chayri domingopi hermanowan willaj llojsinankupaj parlarinkuman. Chantapis precursores regulareswan, especialeswan ima khuska tantakoyqa, paykunata mayta kallpachanqa.
3. Jesuspa Wañuyninta Yuyarina tiempo, ¿imaraykú precursor auxiliar kanapaj may sumaj?
3 Marzo, abril killaspi. Jesuspa Wañuyninta Yuyarina tiempopi, 30 horasta juntʼaspa uj killata precursor auxiliar jina llankʼajkunaqa, iskay kutita chay “sumaj jaywana[ta]” qoyta atinkuman (Heb. 13:15). Marzo, abril killasqa, precursor auxiliar jina llankʼanapaj may sumaj. Chay killaspeqa, Jesuspa Wañuyninta Yuyarinapaj tantakuyman runasta wajyarinchej. Chantapis astawan hermanos willaj llojsisqankurayku, paykunaman astawan ujchaykukuyta atinchej. Chay tantakuy pasaytaqa, yachakuyta munajkunata yanapanchej, qhepan sumaj umallirichiyman jamunankupajtaj wajyarinchej. Arí, precursor auxiliar jina llankʼaspaqa, Jehovata astawan jatunchasunman. Chayta ruwanapaj, ¿sonqonchej tanqawasunchu? (Luc. 6:45.)