Profetasmanta yachaqakuna: Amós
1. ¿Imaraykutaj Amospa kausaynin kallpachawasunman?
1 Ichapis wajcha familiapi uywakusqaykirayku chayri escuelata mana tukuchasqaykirayku, willanapaj mana wakichisqachu kasqaykita yuyanki. Jina kajtin, Amospa kausaynin mayta kallpachasunkiman. Imajtinchus payqa, ovejasta michispa, kʼita higosta pallaspataj llankʼakoj. Chaywanpis Jehovaqa, payta sutinpi willamunanpaj ajllarqa (Amós 1:1; 7:14, 15). Kunanpis Diosqa llampʼu sonqo runasllatataj ajllan (1 Cor. 1:27-29). Profeta Amospa ruwasqan, ¿imaynasmantawan willayninchejpi yanapawasunman?
2. Willayninchejman churanakojtinkupis, ¿imaraykutaj mana manchachikunachu tiyan?
2 Churanakuypipis sinchʼita sayarqa. Amós, Israelpa 10 ayllusninman Diospa juicionta willashajtin, lantita yupaychaj sacerdote Amasiasqa, waj palabraspi nerqa: “¡Riy kaymanta! ¡Wajkunaman parlamuy! ¡Religionniyojña kayku!”, nispa (Amós 7:12, 13). Chantá rey Jeroboamman llulla cuentoswan rerqa, manaña willajta saqenanpaj (Amós 7:7-11). Chaywanpis Amosqa mana mancharikorqachu. Kunanpis religionta kamachejkunaqa, Diospa llajtanta sayachinankupaj gobiernospa yanapanta maskʼanku. Chaywanpis Jehová niwanchej: “Mana mayqen arma ruwasqankupis qanta chinkachisunampaj jina kanqachu” (Isa. 54:17).
3. ¿Ima iskay willaykunatataj willanchej?
3 Diospa juicionta, bendicionesnintapis willarqa. Amosqa, mana Israelpa chunka ayllusnin juzgasqa kanallanmantachu parlarqa. Libronpa tukukuyninpeqa, Jehová llajtanta watejmanta sayarichinanta, bendecinanta ima nillarqataj (Amós 9:13-15). Noqanchejpis mana Diospa “juicio pʼunchay[nillanmantachu]” parlanchej. Imajtinchus chayqa, “reinomanta evangelio” willaymanta ujnillan (2 Ped. 3:7; Mat. 24:14). Jehová, sajra runasta Armagedonpi chinkachejtin, Jallpʼaqa uj paraisoman tukonqa (Sal. 37:34).
4. ¿Jehovaj munayninta juntʼayta atisunchu? Sutʼinchay.
4 Churanakuy ukhupi Reinomanta willayqa, Diosta munakusqanchej, munayninta ruwayta munasqanchejpis, imayna sinchʼichus kasqanta rikuchin (Juan 15:19). Chaywanpis Jehovaqa, munayninta juntʼanapaj, Amosta jina yanapawasun (2 Cor. 3:5).