Kay 2015 watapi Diosmanta Parlayta Yachanapaj tantakoyqa sumajta yachachinapaj yanapawasun

¹ David nerqa: “Pakakunay chhanka, kacharichiwaj Tata Dios, ñawpaqeykipi parlasqasniy yuyasqasniypis allin kachun”, nispa (Salmo 19:14). Noqanchejpis munanchej parlayninchejwan Jehovata kusichiyta, jatunpajtaj qhawanchej cheqa kajmanta tantakuypi parlariyta chayri willamuyta. Sumajta willamunanchejpajtaj Jehovaqa, Diosmanta Parlayta Yachanapaj tantakuypi wakichiwanchej. Chaytaj 111.000 kurajniyoj qotuchakuykunapi sapa semana ruwakun. Tukuy laya runastataj yanapan sumaj willaykunata sonqo kʼajaywan, mana manchachikuspa, allin yuyaywantaj yachachimunankupaj (Hech. 19:8; Col. 4:6).

² Kay 2015 watapi Diosmanta Parlayta Yachanapaj tantakuykunapeqa, ¿Imatá Bibliamanta yachakusunman? nisqa folletomanta, chantá Biblia yachachisqanmanta librituy (wak tapuykuna) nisqamanta, waj publicacionesmanta ima ukhunchakonqa. Chantapis sapa semana Bibliata leesqanchejmanta wakin yachachiykunata sutʼinchaj hermanoqa, aswan pisi tiempollapiña ruwanqa, ñaupaj kaj umallirichiypis aswan pisi tiempollapiña ruwakonqa. Chayrayku sutʼincharina imaynatachus sapa umallirichiy ruwakunanta.

³ Bibliamanta wakin allin yachachiykuna. Kayta wakichikoj hermanoqa chay semanapi Bibliata leekusqanmanta iskay minutosllapi, uj sumaj yachachiyta sutʼincharenqa, chay yachacheyqa hermanosta yanapananpaj jina kanan tiyan, chantapis tiemponpi tukunanpaj allinta wakichikunan tiyan. Chantá 6 minutospi, uyarejkunañataj leesqankumanta wakin allin yachachiykunata sutʼinchanqanku. Sapa ujtaj 30 segundosllata parlarinanku kanqa. Uj sumaj yachachiyta 30 segundosllapi chayri astawan pisillapi sutʼinchayta atinapajqa, sumajta wakichikuna kanqa. Chayta ruwaytaj mayta yanapawasun, imajtinchus astawan ashkha hermanos, yachakusqankumanta parlariyta atenqanku.

⁴ Ñaupa kaj. Kinsa minutospi chayri astawan pisi tiempollapi, Bibliata leena kanqa, chaypajtaj pisi versiculosllata ajllakonqa. Pichus Bibliata leejqa kutin kutita jatunmanta leespa wakichikunan tiyan. Wakichikushaspaqa qhawarikunan tiyan chay leesqan chʼuwitachus manachus kashasqanta. Tukuy Jehovaj testigosnin sumajta leenapaj kallpachakunanchej tiyan, imajtinchus chayta ruwaspaqa, Diosta jatunchanchej. Tantakuykunapi wawasta sumajta leejta rikuspaqa mayta kusikunchej. Chayrayku Tatastaqa wawasninku sumajta leenankupaj munakuywan yanapasqankumanta “allinta ruwanki” ninanchej tiyan.

⁵ Iskay kaj. Uj hermana uj rikuchiyta phishqa minutospi ruwanqa. ¿Imatá Bibliamanta yachakusunman? nisqa folletomanta umallirichiynin orqhosqa kajtenqa, chayman jina qhawarispa ruwanqa, uyarejkunata yanapananpaj jinataj wakichikonqa, chayri maypichus willanchej chaypaj jina. Biblia yachachisqanmanta librituy (wak tapuykuna) nisqamanta chayrí waj publicacionesmanta orqhospa, Diospa ñaupa kamachisninmanta sutʼinchanan kajtenqa, chaypaj jina Bibliamanta versiculosta ajllanqa, chantapis imatachus paykunamanta yachakusqanchejta sutʼinchanqa. Mana chayllachu yachakojqa umallirichiyninta sumajta sutʼinchananpaj, waj versiculostapis ajllayta atillanqataj. Yachachej ancianoqa uj hermanata ajllanqa umallirichejta yanapananpaj.

⁶ Kinsa kaj. Kay umallirichiytaqa uj hermana chayri uj hermano phishqa minutospi ruwanqa. Uj hermana ruwajtenqa iskay kaj umallirichiypi sutʼinchakusqanman jina ruwanqa. Uj hermano Diospa ñaupa kamachisninmanta sutʼinchanan kajtenqa, uyarejkunapaj uj umallirichiyta ruwanqa. Chantá mayqen versiculosmantachus parlanan kasqanta allinta ukhunchanqa, chayman jinataj versiculosta leenanpaj ajllanqa, imatachus paykunamanta yachakusqanchejtataj sutʼinchanqa. Chay umallirichiykunaqa kay Biblia yachachisqanmanta librituy (wak tapuykuna) nisqamanta chayri waj publicacionesmanta orqhosqa kanqa.

⁷ Kinsa kaj umallirichiyta uj jinamantañataj ruwakonqa. Kinsa kaj umallirichiypa ñaupaqenpi uj asterisco rikhurejtenqa, uj hermano uj rikuchiyta ruwanqa, Familiapipis Diosta Yupaychashanman jina chayri willaypipis kashanman jina. Yachachej ancianoqa uj hermanota ajllanqa umallirichejta yanapananpaj, ajllallanqataj imaynatachus chay rikuchiyta ruwananta. Umallirichejta yanapajqa familian ukhumanta kanan tiyan chayri qotuchakuymanta uj hermano kanan tiyan. Umallirichejqa waj versiculostapis ajllayta atillanqataj, imamantachus parlashan chayta sutʼincharinanpaj. Uj ancianota kay umallirichiyta ruwananta nikojtenqa, pay kikin ajllayta atenqa piwanchus ruwananta, chantá imaynatachus ruwanantapis. Ancianos imaynatachus familiankuta chayri uj hermanota sumajta yachachishasqankuta qhawareyqa, tukuypaj may sumajpuni kanqa.

⁸ Yuyaychay. Yachachej ancianoqa iskay minutospi, sapa umallirichej umallirichiyninta tukojtinkama, yachakojta kallpacharenqa chayri yuyaycharenqa, kay Benefíciese libro nisqanman jina. Yachachej ancianoqa, umallirichinankupaj sapa uj yachakojta wajyarishajtin kay Benefíciese libromanta, ima yachaqanapichus yachakoj llankʼashasqanta mana tantakuypi kajkunaman nenqachu. Sapa umallirichej umallirichiyninta tukojtinkamataj, yachachej ancianoqa allinta ruwasqanta nenqa, nillanqataj Benefíciese libromanta ima yachaqanapichus llankʼasqanta. Chantapis imaraykuchus chay ruwasqan sumaj kasqanta nenqa, chayri kʼachallamanta nenqa imapichus tumpatawan llankʼanan kasqanta.

⁹ Yachakojkunaqa Benefíciese libroj 79-81 paginasninpi, imapichus llankʼashasqankuta qhawariyta atenqanku. Tantakuy tukukojtintaj yachachej ancianoqa yachakojta tareanta ruwasqantachus manachus sapallanpi tapurenqa, imapichus llankʼashasqanta qhawarispataj, yachakojpa libronpi anotanqa. Chantapis yachachej ancianoqa chayllapitaj chayri waj kutipi kallpachariyta, yuyaychariyta ima atenqa. Yachakojqa astawan ñauparichinanta yachaspa, chay yuyaycharisqanta tukuy sonqo japʼikonqa (1 Tim. 4:15).

¹⁰ Yachakoj umallirichishajtin, tiempo tukurpakojtenqa, yachachej anciano chayri paypaj yanapajnin, uj timbreta waqachispa, chayri lapizwan mesaman wajtarispa tiempon tukukapusqanta reparachenqa. Chayta uyariytawantaj, yachakojqa nisharqa chay palabrata tukuychaytawankama uraqanpunan tiyan (Benefíciese libromanta, 282 paginapi, 4 parrafonta leey).

¹¹ Tukuypis kay Diosmanta Parlayta Yachanapaj tantakuyman qhelqachikunankupaj kallpachakuyta atinku (Benefíciese libromanta, 282 paginapi, 6 parrafonta leey). Diosmanta Parlayta Yachanapaj tantakoyqa Diospa llajtanta yanapan sumaj willaykunata sonqo kʼajaywan, mana manchachikuspa, allin yuyaywantaj yachachinanpaj. Jehová Diosqa mayta kusikun chay tantakuypi yachakusqanchejwan payta jatunchasqanchejmanta (Sal. 148:12, 13; Isa. 50:4).